Mujh se Shuja Bin Waleed ne bayan kiya ‘ unhon ne Nazr Bin Muhammad se suna ‘ kaha hum se Sakhar Bin Juwairiya ne bayan kiya aur in se Nafi ne bayan kiya ke log kehte hain ke Abdullah, Umar Radi Allahu Anhu se pehle Islam mein dakhil hue thay, halanke ye ghalt hai. Albatta Umar Radi Allahu Anhu ne Abdullah Bin Umar (Radi Allahu Anhuma) ko apna ek ghora lane ke liye bheja tha ‘ jo ek Ansari sahabi ke pas tha taake isi par sawar ho kar jung mein shareek hon. Isi dauran Rasul Allah Sallallahu Alaihi Wasallam darakht ke neeche baith kar baiat le rahe thay. Umar Radi Allahu Anhu ko abhi is ki ittela nahi hui thi. Abdullah Bin Umar (Radi Allahu Anhuma) ne pehle baiat ki phir ghora lene gaye. Jis waqt wo ise le kar Umar Radi Allahu Anhu ke pas aaye to wo jung ke liye apni zira pehen rahe thay. Unhon ne is waqt Umar Radi Allahu Anhu ko bataya ke Nabi Kareem Sallallahu Alaihi Wasallam darakht ke neeche baiat le rahe hain. Bayan kiya ke phir Aap apne larke ko sath le gaye aur baiat ki. Itni si baat thi jis par log ab kehte hain ke Umar Radi Allahu Anhu se pehle Ibn Umar (Radi Allahu Anhuma) Islam laye thay
.

Aur Hisham Bin Ammar ne bayan kiya ‘ in se Waleed Bin Muslim ne bayan kiya ‘ in se Umar Bin Umri ne bayan kiya ‘ unhein Nafi ne khabar di aur unhein Abdullah Bin Umar (Radi Allahu Anhuma) ne ke sulh-e-Hudaibiya ke mauqe par sahaba (Radi Allahu Anhum) jo Nabi Kareem Sallallahu Alaihi Wasallam ke sath thay ‘ mukhtalif darakhton ke saye mein phail gaye thay. Phir achanak bahut se sahaba Aap Sallallahu Alaihi Wasallam ke charon taraf jama ho gaye. Umar Radi Allahu Anhu ne kaha: Beta Abdullah! Dekho to sahi log Nabi Kareem Sallallahu Alaihi Wasallam ke pas jama kyun ho gaye hain? Unhon ne dekha to sahaba baiat kar rahe thay. Chunancha pehle unhon ne khud baiat kar li. Phir Umar Radi Allahu Anhu ko aa kar khabar di phir wo bhi gaye aur unhon ne bhi baiat ki
.

Hum se Muhammad Bin Abdullah Bin Numair ne bayan kiya ‘ kaha hum se Ya'la Bin Ubaid ne bayan kiya ‘ kaha hum se Ismail Bin Abi Khalid ne bayan kiya ‘ kaha ke mein ne Abdullah Bin Abi Aufa Radi Allahu Anhu se suna ‘ Aap ne bayan kiya ke jab Nabi Kareem Sallallahu Alaihi Wasallam ne umra (qaza) kiya to hum bhi Aap ke sath thay. Aap Sallallahu Alaihi Wasallam ne tawaf kiya to hum ne bhi Aap ke sath tawaf kiya. Aap Sallallahu Alaihi Wasallam ne namaz parhi to hum ne bhi Aap ke sath namaz parhi aur Aap Sallallahu Alaihi Wasallam ne safa-o-marwa ki sayi bhi ki. Hum Aap ki ahl-e-Makka se hifazat karte thay taake koi takleef ki baat Aap ko pesh na aa jaye
.

Hum se Hasan Bin Ishaq ne bayan kiya ‘ kaha hum se Muhammad Bin Sabiq ne bayan kiya ‘ kaha hum se Malik Bin Maghool ne bayan kiya ‘ kaha ke mein ne Abu Husain se suna ‘ in se Abu Wail ne bayan kiya ke Sahl Bin Hunaif Radi Allahu Anhu jab jung-e-Siffin (jo Ali Radi Allahu Anhu aur Muawiya Radi Allahu Anhu mein hui thi) se wapas aaye to hum in ki khidmat mein haalat maloom karne ke liye hazir hue. Unhon ne kaha ke is jung ke bare mein tum log apni raye aur fikr par nazan mat ho. Mein Yaum-e-Abu Jandal (sulh-e-Hudaibiya) mein bhi maujood tha. Agar mere liye Rasul Allah Sallallahu Alaihi Wasallam ke hukm ko manne se inkar mumkin hota to mein is den zaroor hukm udooli karta. Allah aur is ka Rasul khoob jaante hain ke jab hum ne kisi mushkil kaam ke liye apni talwarom ko apne kandhon par rakha to surat-e-haal aasan ho gayi aur hum ne mushkil hal kar li. Lekin is jung ka kuch ajeeb haal hai ‘ is mein hum (fitne ke) ek kone ko band karte hain to dusra kona khul jata hai. Hum nahi jaante ke hum ko kya tadbeer karni chahiye
.

Hum se Sulaiman Bin Harb ne bayan kiya ‘ kaha hum se Hammad Bin Zaid ne bayan kiya ‘ in se Ayub Sakhtiyani ne ‘ in se Mujahid ne ‘ in se Ibn Abi Laila ne ‘ in se Kaab Bin Ujrah Radi Allahu Anhu ne bayan kiya ke wo umra-e-Hudaibiya ke mauqe par Nabi Kareem Sallallahu Alaihi Wasallam ki khidmat mein hazir hue to jooein in ke chehre par gir rahi thin. Nabi Kareem Sallallahu Alaihi Wasallam ne daryaft farmaya ke ye jooein jo tumhare sar se gir rahi hain ‘ takleef de rahi hain? Unhon ne arz kiya: Ji haan! Nabi Kareem Sallallahu Alaihi Wasallam ne farmaya ke phir sar mundwa lo aur teen den roza rakh lo ya che miskeenon ka khana khila do ya phir koi qurbani kar dalo. (Sar mundwane ka fidiya hoga) Ayub Sakhtiyani ne bayan kiya ke mujhe maloom nahi ke in teeno umoor mein se pehle Nabi Kareem Sallallahu Alaihi Wasallam ne kaun si baat irshad farmai thi
.

Mujh se Abu Abdullah Muhammad Bin Hisham ne bayan kiya ‘ kaha hum se Hushaim ne bayan kiya in se Abu Bisr ne ‘ in se Mujahid ne ‘ in se Abdur Rahman Bin Abi Laila ne aur in se Kaab Bin Ujrah Radi Allahu Anhu ne bayan kiya ke sulh-e-Hudaibiya ke mauqe par hum Rasul Allah Sallallahu Alaihi Wasallam ke sath thay aur ihram baandhe hue thay. Udhar mushrikeen humein Bait-Allah tak jane nahi dena chahte thay. Unhon ne bayan kiya ke mere sar par baal bare bare thay jin se jooein mere chehre par girne lagin. Nabi Kareem Sallallahu Alaihi Wasallam ne mujhe dekh kar daryaft farmaya ke kya ye jooein takleef de rahi hain? Mein ne kaha: Ji haan. Unhon ne bayan kiya ke phir ye ayat nazil hui «faman kana minkum marizan au bihi azan min rasihi fafidyatun min siyamin au sadaqatin au nusukin» ”Pas agar tum mein koi mareez ho ya is ke sar mein koi takleef dene wali cheez ho to ise (baal mundwa lene chahiyein aur) teen den ke roze ya sadqa ya qurbani ka fidiya dena chahiye.“
.