Hum se Ahmad bin Isa ne byaan kiya , kaha ke hum se Abdullah bin Wahb ne byaan kiya , kaha ke mujhe Amr bin Harith ne khabar di ke Muhammad bin Abdur Rahman Asadi ne un se byaan kiya , un se Urwah ne , un se Aisha razi Allahu anha ne , unhon ne batlaya ke aik din Nabi Karim salla Allahu alaihi wasallam mere ghar tashreef laaye is waqt mere paas (Ansar ki) do larki'an Jang-e-Bu'as ke qisson ki nazmein parh rahi theen . Aap salla Allahu alaihi wasallam bistar par lait gaye aur apna chehra doosri taraf pher liya . Is ke baad Abu Bakr razi Allahu anhu aaye aur mujhe danta aur farmaya ke yeh shaytani baaja Nabi Karim salla Allahu alaihi wasallam ki maujoodgi mein? Aakhir Nabi Karim salla Allahu alaihi wasallam un ki taraf mutawajje hue aur farmaya ke jaane do khamosh raho phir jab Abu Bakr razi Allahu anhu doosre kaam mein lag gaye to main ne unhein isharah kiya aur woh chali gayeen .

Hum se Ubaid bin Ismail ne byaan kiya , unhon ne kaha ke hum se Abu Usamah ne byaan kiya , in se Hisham bin Urwah ne , in se un ke baap (Urwah bin Zubayr) ne , in se Aisha razi Allahu anha ne , Aap ne batlaya ke Abu Bakr razi Allahu anhu tashreef laaye to mere paas Ansar ki do larki'an woh ashaar ga rahi theen jo Ansar ne Bu'as ki jang ke mauqa par kahe thay . Aisha razi Allahu anha ne kaha ke yeh gaane waliyan nahi theen , Abu Bakr razi Allahu anhu ne farmaya ke Rasool Allah salla Allahu alaihi wasallam ke ghar mein yeh shaytani baaje aur yeh Eid ka din tha aakhir Rasool Allah salla Allahu alaihi wasallam ne Abu Bakr razi Allahu anhu se farmaya ay Abu Bakr! har qaum ki Eid hoti hai aur aaj yeh hamari Eid hai .

Hum se Yahya bin Bukayr ne byaan kiya , kaha ke in se Layth bin Saad ne byaan kiya , in se Aqeel ne , in se Ibn Shihab ne , in se Urwah ne , in se Aisha razi Allahu anha ne kaha Abu Bakr razi Allahu anhu in ke yahan (Mina ke dinon mein) tashreef laaye is waqt ghar mein do larki'an daf baja rahi theen aur Bu'as ki larayi ki nazmein ga rahi theen . Nabi Karim salla Allahu alaihi wasallam chehra mubarak par kapra daale hue tashreef farma thay . Abu Bakr razi Allahu anhu ne in dono ko danta . Is par Aap salla Allahu alaihi wasallam ne chehra mubarak se kapra hata kar farmaya ke Abu Bakr jaane bhi do yeh Eid ke din hain (aur woh bhi Mina mein) .

Aisha (Radi Allahu Anha) ne bayan kiya ke eid ke din Sudan ke kuch sahaba dhaal aur hirab ka khel dikha rahe thay, ab ya mein ne khud Rasul Allah (Sallallahu Alaihi Wasallam) se kaha ya aap (Sallallahu Alaihi Wasallam) ne hi farmaya ke tum bhi dekhna chahti ho? Mein ne kaha ji haan. Aap (Sallallahu Alaihi Wasallam) ne mujhe apne peeche khara kar liya, mera chehra aap (Sallallahu Alaihi Wasallam) ke chehre par tha (is tarah mein peeche parde se khel ko bakhubi dekh sakti thi) aur aap (Sallallahu Alaihi Wasallam) farma rahe thay: "Khoob Banu Arfida!" Jab mein thak gayi to aap (Sallallahu Alaihi Wasallam) ne farmaya: "Bas?" Mein ne kaha ji haan, aap (Sallallahu Alaihi Wasallam) ne farmaya: "To phir jao." Ahmad ne bayan kiya aur un se Ibn Wahb ne (Abu Bakr Radi Allahu Anhu ke aane ke baad doosri taraf mutawajje ho jaane ke liye lafz «eml» ke bajaye) «flma gfl .» naqal kiya hai. Yani jab wo zara ghafil ho gaye
.

Hum se Sulaiman Bin Harb ne bayan kiya, kaha hum se Hammad Bin Zaid ne bayan kiya, un se Sabit ne aur un se Anas (Radi Allahu Anhu) ne bayan kiya ke Nabi Kareem (Sallallahu Alaihi Wasallam) sab se ziyada khoobsurat aur sab se ziyada bahadur thay. Ek raat Madinah par (ek awaz sun kar) bara khauf chha gaya tha, sab log is awaz ki taraf barhe lekin Nabi Kareem (Sallallahu Alaihi Wasallam) sab se aage thay aur aap (Sallallahu Alaihi Wasallam) ne hi waqea ki tahqeeq ki. Aap (Sallallahu Alaihi Wasallam) Abu Talha (Radi Allahu Anhu) ke ek ghore par sawar thay jis ki pusht nangi thi. Aap (Sallallahu Alaihi Wasallam) ki gardan se talwar latak rahi thi aur aap (Sallallahu Alaihi Wasallam) farma rahe thay ke daro mat. Phir aap (Sallallahu Alaihi Wasallam) ne farmaya ke hum ne to ghore ko samundar ki tarah tez paya hai ya ye farmaya ke ghora jaise samundar hai
.

Aur Aisha (Radi Allahu Anha) ne bayan kiya ke mein ne dekha ke Nabi Kareem (Sallallahu Alaihi Wasallam) mujh ko parda mein rakkhe hue hain aur mein Habshiyon ko dekh rahi thi jo nezon ka khel masjid mein kar rahe thay. Abu Bakr (Radi Allahu Anhu) ne unhein danta. Lekin Nabi Kareem (Sallallahu Alaihi Wasallam) ne farmaya "Unhein chor do, Bani Arfida tum be-fikr ho kar khelo
."

Mujh se Muhammad Bin Musanna ne bayan kiya, kaha hum se Ghundar ne bayan kiya, un se Shuba ne bayan kiya, un se Hisham ne, un se un ke walid ne aur un se Aisha Radi Allahu Anha ne ke Abu Bakr Siddiq Radi Allahu Anhu in ke yahan aaye to Nabi Kareem Sallallahu Alaihi Wasallam bhi wahin tashreef rakhte thay Eid-ul-Fitr ya Eid-ul-Adha ka din tha, do larkiyan Yaum-e-Buas ke bare mein wo ashaar parh rahi theen jo Ansar ke shu'ara ne apne fakhar mein kahe thay. Abu Bakr Radi Allahu Anhu ne kaha ye shaitani gaane baaje! (Nabi Kareem Sallallahu Alaihi Wasallam ke ghar mein) do martaba unhon ne ye jumla dohraya, lekin aap Sallallahu Alaihi Wasallam ne farmaya ”Abu Bakr! Unhein chor do. Har qaum ki eid hoti hai aur hamari eid aaj ka ye din hai.“
.