Hum se Busrah bin Safwan ne bayan kiya, unhon ne kaha hum se Ibrahim ne bayan kiya, in se Zuhri ne bayan kiya, in se Qasim ne bayan kiya aur in se Aisha razi Allahu anha ne bayan kiya ke Nabi Karim salla Allahu alaihi wasallam andar tashreef laaye aur ghar mein ek parda latka hua tha jis par tasveerein thien. Nabi Karim salla Allahu alaihi wasallam ke chehre ka rang badal gaya. Phir Aap ne parda pakra aur usay phaar diya. Umm al-Momineen ne bayan kiya ke Nabi Karim salla Allahu alaihi wasallam ne farmaya ”Qayamat ke din in logon par sab se zyada azab ho ga, jo yeh suratein banate hain.“

Hum se Abdullah Bin Abdul Wahhab ne bayan kiya, unhon ne kaha ke hum se Yazid Bin Zuraie ne bayan kiya, unhein Auf Bin Abi Humaid ne khabar di, unhein Saeed Bin Abi Hasan ne, kaha ke mein Ibn Abbas (Radi Allahu Anhuma) ki khidmat mein hazir tha ke ek shakhs un ke paas aya, aur kaha ke ay Abu Abbas! mein un logon mein se hoon, jin ki rozi apne hath ki sana'at par mauqoof hai aur mein ye mooratein banata hoon. Ibn Abbas (Radi Allahu Anhuma) ne is par farmaya ke mein tumhe sirf wahi baat batlaonga jo mein ne Rasul Allah (Sallallahu Alaihi Wasallam) se suni hai. Unhon ne kaha ke mein ne Aap (Sallallahu Alaihi Wasallam) ko ye farmate hue suna tha ke jis ne bhi koi moorat banayi to Allah Ta'ala ise us waqt tak azab karta rahega jab tak wo shakhs apni moorat mein jaan na daal day aur wo kabhi is mein jaan nahi daal sakta (ye sun kar) is shakhs ka saans charh gaya aur chehra zard par gaya. Ibn Abbas (Radi Allahu Anhuma) ne farmaya ke afsos! agar tum mooratein banani hi chahte ho to in darakhton ki aur har us cheez ki jis mein jaan nahi hai mooratein bana sakte ho. Abu Abdullah (Imam Bukhari Rahimahullah) ne kaha ke Saeed Bin Abi Arubah ne Nadhr Bin Anas se sirf yahi ek hadees suni hai
.

Hum se Ibrahim Bin Al-Munzir ne bayan kiya, kaha hum se Anas Bin Iyaz ne bayan kiya, un se Ubaidullah Umri ne, un se Abdur Rahman Bin Qasim ne, un se un ke walid Qasim ne aur un se Aisha (Radi Allahu Anha) ne ke unhon ne apne hujre ke saiban par ek parda latka diya jis mein tasveerein bani hui theen. Nabi Kareem (Sallallahu Alaihi Wasallam) ne (jab dekha to) use utar kar phaara dala. (Aisha Radi Allahu Anha ne bayan kiya ke) phir mein ne is parde se do gadde bana dale. Wo donon gadde ghar mein rehte thay aur Nabi Kareem (Sallallahu Alaihi Wasallam) un par baitha karte thay
.

Hum se Humaydi Abdullah bin Zubayr ne bayan kiya, kaha hum se Sufyan bin Uyaynah ne bayan kiya, in se Aamash ne bayan kiya aur in se Muslim bin Sabeeh ne bayan kiya ke hum Masrooq bin Ajda ke saath Yasar bin Numair ke ghar mein thay. Masrooq ne in ke ghar ke saibaan mein tasveerein dekhein to kaha ke main ne Abdullah bin Masood razi Allahu anhu se suna hai, unhon ne bayan kiya ke main ne Nabi Karim salla Allahu alaihi wasallam se suna, Nabi Karim salla Allahu alaihi wasallam ne farmaya ”Allah ke paas Qayamat ke din tasveer banane walon ko sakht se sakht-tar azab ho ga.“

Hum se Ibrahim bin al-Munzhir ne bayan kiya, unhon ne kaha hum se Anas bin Iyaz ne bayan kiya, unhon ne kaha hum se Ubaidullah Umri ne bayan kiya, in se Nafi ne bayan kiya aur unhein Abdullah bin Umar razi Allahu anhuma ne khabar di ke Rasool Allah salla Allahu alaihi wasallam ne farmaya ”jo log yeh muratein banate hain unhein Qayamat ke din azab kiya jaye ga aur in se kaha jaye ga ke jis ko tum ne banaya hai ab is mein jaan bhi daalo.“

Hum se Ali bin Abdullah Madini ne bayan kiya, kaha hum se Sufyan bin Uyaynah ne bayan kiya, kaha ke main ne Abd-ur-Rahman bin Qasim se suna, in dinon Madinah Munawwarah mein in se barh kar aalim fazil naik koi aadmi nahi tha, unhon ne bayan kiya ke main ne apne walid (Qasim bin Abi Bakr) se suna, unhon ne bayan kiya ke main ne Aisha razi Allahu anha se suna ke Rasool Allah salla Allahu alaihi wasallam safar (Ghazwa e Tabook) se tashreef laaye to main ne apne ghar ke saibaan par ek parda latka diya tha, is par tasveerein thien jab Aap salla Allahu alaihi wasallam ne dekha to usay khainch kar phenk diya aur farmaya ke Qayamat ke din sab se zyada sakht azab mein woh log giraftar hon ge jo Allah ki makhlooq ki tarah khud bhi banate hain. Aisha razi Allahu anha ne bayan kiya ke phir main ne phaarh kar is parda ki ek ya do toshak bana lein.

Hum se Hajjaj bin Minhal ne bayan kiya, kaha hum se Juwayriyah ne bayan kiya, in se Nafi ne, in se Qasim bin Muhammad ne aur in se Aisha razi Allahu anha ne ke unhon ne ek gadda khareeda jis par tasveerein thien. Rasool Allah salla Allahu alaihi wasallam (usay dekh kar) darwaze par khare ho gaye aur andar tashreef nahi laaye. Main ne arz kiya ke ya Rasool Allah! Main ne jo ghalati ki hai is se main Allah se maafi maangti hoon. Nabi Karim salla Allahu alaihi wasallam ne farmaya ke yeh gadda kis liye hai? Main ne arz kiya ke Aap ke baithne aur is par taik lagaane ke liye hai. Nabi Karim salla Allahu alaihi wasallam ne farmaya ke in murat ke banane walon ko Qayamat ke din azab diya jaye ga aur in se kaha jaye ga ke jo tum ne paida kiya hai usay zinda bhi kar ke dikhao aur farishte is ghar mein nahi dakhil hote jis mein murat ho.

Hum se Abdullah bin Maslamah ne bayan kiya, in se Imam Malik ne, in se Nafi ne, in se Qasim bin Muhammad ne aur unhein Nabi Karim salla Allahu alaihi wasallam ki zauja mutahhara Aisha razi Allahu anha ne khabar di ke unhon ne ek gadda khareeda jis mein muratein thien. Jab Rasool Allah salla Allahu alaihi wasallam ne usay dekha to Aap darwaze par khare ho gaye aur andar nahi aaye. Main Aap ke chehre se narazgi pehchan gayi. Main ne arz kiya: ya Rasool Allah! Main Allah se is ke Rasool ke samne tauba karti hoon, main ne kya ghalati ki hai? Aap salla Allahu alaihi wasallam ne farmaya ke gadda kaisa hai? Main ne arz kiya ke main ne hi usay khareeda hai taake Aap is par baithein aur taik lagayein. Nabi Karim salla Allahu alaihi wasallam ne farmaya ke in muraton ke banane walon ko Qayamat ke din azab diya jaye ga aur in se kaha jaye ga ke jo tum ne paida kiya hai ab in mein jaan bhi daalo aur Nabi Karim salla Allahu alaihi wasallam ne farmaya ke jis ghar mein murat hoti hai is mein (rahmat ke) farishte nahi dakhil hote.

Hum se Ay-yash bin al-Waleed ne bayan kiya, kaha hum se Abd-ul-A'la ne bayan kiya, kaha hum se Saeed bin Abi Aroobah ne bayan kiya, unhon ne kaha ke main ne Nadr bin Malik se suna, woh Qatadah se bayan karte thay ke main Ibn Abbas razi Allahu anhuma ke paas tha log in se mukhtalif masail pooch rahe thay. Jab tak in se khaas taur se poochha na jata woh Nabi Karim salla Allahu alaihi wasallam ka hawala nahi dete thay phir unhon ne kaha ke main ne Muhammad salla Allahu alaihi wasallam se suna hai Nabi Karim salla Allahu alaihi wasallam ne farmaya ke jo shakhs duniya mein murat banaye ga Qayamat ke din is par zor dala jaye ga ke usay woh zinda bhi kare haalan ke woh usay zinda nahi kar sakta.

`Hum se Ali bin Abdullah ne bayan kiya, kaha hum se Sufyan ne, un se Ayub ne, un se Ikrima ne, un se Ibn Abbas Radi Allahu Anhuma ne ke Nabi Kareem صلی اللہ علیہ وسلم ne farmaya ”Jis ne aisa khwab bayan kiya jo us ne dekha na ho to ise do jau ke do daanon ko qayamat ke din jodne ke liye kaha jaye ga aur wo ise hargiz nahi kar sake ga (is liye maar khata rahe ga) aur jo shakhs doosre logon ki baat sunne ke liye kaan lagaye jo ise pasand nahi karte ya is se bhagte hain to qayamat ke din is ke kaanon mein seesa pighla kar dala jaye ga aur jo koi tasveer banaye ga ise azab diya jaye ga aur is par zor diya jaye ga ke is mein rooh bhi dale jo wo nahi kar sake ga. Aur Sufyan ne kaha ke hum se Ayub ne yeh hadees mausooolan bayan ki aur Qutaiba bin Said ne bayan kiya, hum se Abu Awana ne, un se Qatada ne, un se Ikrima ne aur un se Abu Hurairah Radi Allahu Anhu ne ke jo apne khwab ke silsile mein jhoot bole. Aur Shu'ba ne kaha, un se Abu Hashim al-Rummani ne, unhon ne Ikrima se suna aur un se Abu Hurairah Radi Allahu Anhu ne (ka qaul mauqoofun) jo shakhs moorat banaye, jo shakhs jhoota khwab bayan kare, jo shakhs kaan laga kar doosron ki baatein sune. Hum se Ishaq Wasiti ne bayan kiya, kaha hum se Khalid Tahhan ne bayan kiya, un se Khalid Hazza ne, un se Ikrima ne aur un se Ibn Abbas Radi Allahu Anhuma ne bayan kiya ke jo kisi ki baat kaan laga kar sunne ke peeche laga aur jis ne galat khwab bayan kiya aur jis ne tasveer banayi (aisi hi hadees naql ki mauqoofun Ibn Abbas se) Khalid Hazza ke saath is hadees ko Hisham bin Hassan Firdousi ne bhi Ikrima se, unhon ne Ibn Abbas Radi Allahu Anhuma se mauqoofun riwayat kiya.

Hum se Qutaybah bin Saeed ne bayan kiya , in se Layth ne bayan kiya , in se Nafi ne bayan kiya , in se Qasim bin Muhammad ne bayan kiya aur in se Umm al-Momineen Aisha Siddiqa razi Allahu anha ne bayan kiya ke Rasool Allah salla Allahu alaihi wasallam ne farmaya ”in tasveeron ko banane walon par Qayamat mein azab ho ga aur in se kaha jaye ga ke tum ne jo banaya hai usay zinda bhi kar ke dikhao .“

Hum se Abu al-Nu-man ne bayan kiya , in se Hammad bin Zayd ne bayan kiya , in se Ayub ne , in se Nafi ne aur in se Abdullah bin Umar raziAllahu anhuma ne bayan kiya ke Nabi Karim salla Allahu alaihi wasallam ne farmaya ”in tasveeron ko banane walon par Qayamat mein azab ho ga aur in se kaha jaye ga ke tum ne jo banaya hai usay zinda bhi karo .“