Hum se Musa bin Ismail ne bayan kiya, kaha hum se Abdul Aziz bin Muslim ne bayan kiya, kaha hum se Sulayman Aamash ne bayan kiya, in se Ibrahim Taymi ne, in se Haris bin Suwayd ne aur in se Abdullah bin Masood razi Allahu anhu ne bayan kiya ke main Nabi Karim salla Allahu alaihi wasallam ki khidmat mein hazir hua to Aap ko bukhar aaya hua thu main ne Aap ka jism chhoo kar arz kiya ke Aap ko bara teiz bukhar hai. Nabi Karim salla Allahu alaihi wasallam ne farmaya ke haan tum mein ke do aadmiyon ke barabar hai. Ibn Masood razi Allahu anhu ne arz kiya ke Nabi Karim salla Allahu alaihi wasallam ka ajar bhi do guna hai. Kaha haan phir Aap ne farmaya ke kisi Musalman ko bhi jab kisi marz ki takleef ya aur koi takleef pahunchti hai to Allah is ke gunah ko is tarah jhaarr deta hai jis tarah darakht apne patton ko jhaarrta hai.

Hum se Abu al-Yaman Hakam bin Nafi ne bayan kiya, unhon ne kaha hamain ko Shuayb ne khabar di, in se Zuhri ne bayan kiya, unhon ne kaha mujhko Urwah bin Zubayr ne khabar di aur in se Nabi Karim salla Allahu alaihi wasallam ki zauja mutahhara Aisha Siddiqah razi Allahu anha ne bayan kiya ke Rasool Allah salla Allahu alaihi wasallam ne farmaya ke jo musibat bhi kisi Musalman ko pahunchti hai Allah Ta'ala usay is ke gunah ka kaffara kar deta hai (kisi Musalman ke) ek kanta bhi agar jism ke kisi hissa mein chubh jaye.

Hum se Abdullah bin Muhammad ne bayan kiya, unhon ne kaha hum se Abd-ul-Malik bin Amr ne bayan kiya, unhon ne kaha hum se Zuhayr bin Muhammad ne bayan kiya, in se Muhammad bin Amr bin Halhala ne, in se Ata bin Yasar ne aur in se Abu Saeed Khudri aur Abu Hurairah razi Allahu anhuma ne bayan kiya ke Nabi Karim salla Allahu alaihi wasallam ne farmaya ke Musalman jab bhi kisi pareshani, beemari, ranj o malal, takleef aur gham mein mubtala ho jata hai yahan tak ke agar usay koi kanta bhi chubh jaye to Allah Ta'ala usay is ke gunahon ka kaffara bana deta hai.

Hum se Muhammad bin Yusuf ne bayan kiya, kaha hum se Sufyan Sawri ne bayan kiya, in se Aamash ne, in se Ibrahim Taymi ne, in se Haris bin Suwayd ne aur in se Abdullah bin Masood razi Allahu anhu ne ke main Rasool Allah salla Allahu alaihi wasallam ki khidmat mein Aap ke marz ke zamana mein hazir hua Nabi Karim salla Allahu alaihi wasallam is waqt bare teiz bukhar mein thay. Main ne arz kiya: (ya Rasool Allah!) Aap ko bara teiz bukhar hai. Main ne yeh bhi kaha ke yeh bukhar Aap ko is liye itna teiz hai ke Aap ka sawab bhi dugna hai Aap salla Allahu alaihi wasallam ne farmaya ke haan jo Musalman kisi bhi takleef mein giraftar hota hai to Allah Ta'ala is ki wajah se is ke gunah is tarah jhaarr deta hai jaise darakht ke patte jhaarr jaate hain.

Hum se Abdan ne bayan kiya, in se Abu Hamza ne bayan kiya, in se Aamash ne, in se Ibrahim Taymi ne, in se Haris bin Suwayd ne aur in se Abdullah bin Masood razi Allahu anhu ne bayan kiya ke main Rasool Allah salla Allahu alaihi wasallam ki khidmat mein hazir hua Aap ko shadeed bukhar tha main ne arz kiya: ya Rasool Allah! Aap ko bahut teiz bukhar hai. Nabi Karim salla Allahu alaihi wasallam ne farmaya ke haan mujhe tanha aisa bukhar hota hai jitna tum mein ke do aadmiyon ko hota hai main ne arz kiya yeh is liye ke Aap ka sawab bhi dugna hai? Farmaya ke haan yahi baat hai, Musalman ko jo bhi takleef pahunchti hai kanta ho ya is se zyada takleef dene wali koi cheez to jaise darakht apne patton ko girata hai isi tarah Allah Paak is takleef ko is ke gunahon ka kaffara bana deta hai.

Hum se Qutaybah ne bayan kiya, unhon ne kaha hum se Jareer ne bayan kiya, in se Aamash ne bayan kiya, in se Ibrahim Taymi ne bayan kiya, in se Haris bin Suwayd ne bayan kiya ke Abdullah bin Masood razi Allahu anhu ne kaha, main Rasool Allah salla Allahu alaihi wasallam ki khidmat mein hazir hua to Aap ko bukhar aaya hua thu main ne apne hath se Nabi Karim salla Allahu alaihi wasallam ka jism chhooa aur arz kiya: ya Rasool اللہ! Aap ko to bara teiz bukhar hai. Nabi Karim salla Allahu alaihi wasallam ne farmaya ke haan mujhe tum mein ke do aadmiyon ke barabar bukhar charhta hai. Main ne arz kiya yeh is liye ho ga ke Aap ko dugna ajar milta hai. Aap salla Allahu alaihi wasallam ne farmaya ke haan is ke baad Nabi Karim salla Allahu alaihi wasallam ne farmaya ke kisi bhi Musalman ko marz ki takleef ya koi aur koi takleef hoti hai to Allah Ta-ala is ke gunahon ko is tarah girata hai jaise darakht apne patton ko gira deta hai.

Hum se Qubaysah ne bayan kiya, unhon ne kaha hum se Sufyan Sawri ne bayan kiya, in se Aamash ne bayan kiya, in se Ibrahim Taymi ne, in se Haris bin Suwayd ne aur in se Abdullah bin Masood razi Allahu anhu ne bayan kiya ke main Rasool Allah salla Allahu alaihi wasallam ki khidmat mein jab Aap beemar thay hazir hua. Main ne Aap ka jism chhooa, Aap ko teiz bukhar tha. Main ne arz kiya Aap ko to bara teiz bukhar hai yeh is liye ho ga ke Aap ko dugna sawab mile ga. Nabi Karim salla Allahu alaihi wasallam ne farmaya ke haan aur kisi Musalman ko bhi jab koi takleef pahunchti hai to is ke gunah is tarah jhaarr jaate hain jaise darakht ke patte jhaarr jaate hain.