Aur Allah Ta'ala ne Surah Nisa mein farmaya «man ya-mal soo-an yujza bihi» ”jo koi bura kare ga is ko badla mile ga.“

Hum se Abu al-Yaman Hakam bin Nafi ne bayan kiya, unhon ne kaha hamain ko Shuayb ne khabar di, in se Zuhri ne bayan kiya, unhon ne kaha mujhko Urwah bin Zubayr ne khabar di aur in se Nabi Karim salla Allahu alaihi wasallam ki zauja mutahhara Aisha Siddiqah razi Allahu anha ne bayan kiya ke Rasool Allah salla Allahu alaihi wasallam ne farmaya ke jo musibat bhi kisi Musalman ko pahunchti hai Allah Ta'ala usay is ke gunah ka kaffara kar deta hai (kisi Musalman ke) ek kanta bhi agar jism ke kisi hissa mein chubh jaye.

Hum se Abdullah bin Muhammad ne bayan kiya, unhon ne kaha hum se Abd-ul-Malik bin Amr ne bayan kiya, unhon ne kaha hum se Zuhayr bin Muhammad ne bayan kiya, in se Muhammad bin Amr bin Halhala ne, in se Ata bin Yasar ne aur in se Abu Saeed Khudri aur Abu Hurairah razi Allahu anhuma ne bayan kiya ke Nabi Karim salla Allahu alaihi wasallam ne farmaya ke Musalman jab bhi kisi pareshani, beemari, ranj o malal, takleef aur gham mein mubtala ho jata hai yahan tak ke agar usay koi kanta bhi chubh jaye to Allah Ta'ala usay is ke gunahon ka kaffara bana deta hai.

Hum se Abdullah bin Muhammad ne bayan kiya, unhon ne kaha hum se Abd-ul-Malik bin Amr ne bayan kiya, unhon ne kaha hum se Zuhayr bin Muhammad ne bayan kiya, in se Muhammad bin Amr bin Halhala ne, in se Ata bin Yasar ne aur in se Abu Saeed Khudri aur Abu Hurairah razi Allahu anhuma ne bayan kiya ke Nabi Karim salla Allahu alaihi wasallam ne farmaya ke Musalman jab bhi kisi pareshani, beemari, ranj o malal, takleef aur gham mein mubtala ho jata hai yahan tak ke agar usay koi kanta bhi chubh jaye to Allah Ta'ala usay is ke gunahon ka kaffara bana deta hai.

Hum se Musaddad ne bayan kiya, kaha hum se Yahya ne bayan kiya, in se Sufyan ne, in se Saad ne, in se Abdullah bin Kabb ne aur in se un ke walid ne ke Nabi Karim salla Allahu alaihi wasallam ne farmaya ke momin ki misal paude ki sab se pehli nikli hui hari shakh jaisi hai ke hawa usay kabhi jhuka deti hai aur kabhi barabar kar deti hai aur munafiq ki misal sanobar ke darakht jaisi hai ke woh seedha hi khara rehta hai aur aakhir ek jhoukay mein kabhi ukharr hi jata hai. Aur Zakariya ne bayan kiya ke hum se Saad ne bayan kiya, in se Ibn Kabb ne bayan kiya, in se un ke walid majid muhtaram al-maqam Kabb razi Allahu anhu ne Nabi Karim salla Allahu alaihi wasallam se yahi bayan kiya.

Hum se Ibrahim bin al-Munzhir ne bayan kiya, kaha ke mujh se Muhammad bin Falih ne bayan kiya, kaha ke mujh se mere walid ne, in se Bani Aamir bin Luway ke ek mard Hilal bin Ali ne, in se Ata bin Yasar ne aur in se Abu Hurairah razi Allahu anhu ne bayan kiya ke Rasool Allah salla Allahu alaihi wasallam ne farmaya ke momin ki misal paude ki pehli nikli hui hari shakh jaisi hai ke jab bhi hawa chalti hai usay jhuka deti hai phir woh seedha ho kar musibat bardasht karne mein kamyab ho jata hai aur bad-kaar ki misal sanobar ke darakht jaisi hai ke sakht hota hai aur seedha khara rehta hai yahan tak ke Allah Ta'ala jab chahta hai usay ukharr kar phenk deta hai.

Hum se Abdullah bin Yusuf ne bayan kiya, kaha hum ko Imam Malik ne khabar di, unhein Muhammad bin Abdullah bin Abdur Rahman bin Abi Sasa'a ne, unhon ne bayan kiya ke main ne Saeed bin Yasar Abu al-Hubab se suna, unhon ne bayan kiya ke main ne Abu Hurairah razi Allahu anhu se suna ke Rasool Allah salla Allahu alaihi wasallam ne farmaya ke Allah Ta'ala jis ke saath khair o bhalayi karna chahta hai usay beemari ki takaleef aur digar musibaton mein mubtala kar deta hai.