Hum se Sulayman bin Harb ne bayan kiya, kaha hum se Shubah ne bayan kiya, in se Abdullah bin Abi al-Safar ne, in se Shabi ne kaha ke main ne Adi bin Hatim razi Allahu anhu se suna, unhon ne bayan kiya ke main ne Rasool Allah salla Allahu alaihi wasallam se be-par ke teer ya lakri gazz se shikar ke baare mein poochha to Aap salla Allahu alaihi wasallam ne farmaya ke jab tum is ki noak se shikar ko maar lo to usay khao lekin agar is ki arz ki taraf se shikar ko lage aur is se woh mar jaye to woh «mouqoozha» (murdar) hai usay na khao. Main ne sawal kiya ke main apna kutta bhi (shikar ke liye) dorata hoon? Aap salla Allahu alaihi wasallam ne farmaya ke jab tum apne kutte par Bismillah parh kar shikar ke peeche dorao to woh shikar kha sakte ho. Main ne poochha aur agar woh kutta shikar mein se kha le? Aap salla Allahu alaihi wasallam ne farmaya ke phir na khao kyunke woh shikar is ne tumhare liye nahi pakra tha, sirf apne liye pakra tha. Main ne poochha main baaz waqt apna kutta chhorrta hoon aur baad mein is ke saath doosra kutta bhi paata hoon? Aap salla Allahu alaihi wasallam ne farmaya ke phir (is ka shikar) na khao kyunke tum ne Bismillah sirf apne kutte par parhi hai, doosre par nahi parhi hai.

Hum se Hafs bin Umar ne bayan kiya, kaha ke hum se Sho’bah ne Ibn-e-Abi-s-Safar ke waaste se bayan kiya, woh Sha’bi se naql farmaate hain, woh ’Adi bin Hatim se riwayat karte hain ke main ne Rasoolullah Sallallahu Alaihi Wasallam se (kutte ke shikaar ke mutalliq) daryaaft kiya. To Aap Sallallahu Alaihi Wasallam ne farmaaya ke jab tu apne sudhaaye huwe kutte ko chhode aur woh shikaar kar le to, to us (shikaar) ko khaa aur agar woh kutta us shikaar mein se khud (kuch) khaa le to, tu (us ko) na khaaiyo. Kiunki ab us ne shikaar apne liye pakda hai. Main ne kaha ke ba’z dafa main (shikaar ke liye) apne kutte chhodta hun, phir us ke saath doosre kutte ko bhi paaya hun. Aap Sallallahu Alaihi Wasallam ne farmaaya. Phir mat khaa. Kiunki tum ne «Bismillah» apne kutte par padhi thi. Doosre kutte par nahi padhi.

Hum se Abu-al-Walid ne bayan kiya, kaha ke hum se Shuba ne bayan kiya, kaha ke mujhe Abdullah Bin Abi Safar ne khabar di, unhein Shabi ne, un se Adi Bin Hatim (Radi Allahu Anhu) ne bayan kiya ke mein ne Rasul Allah (Sallallahu Alaihi Wasallam) se «mearaz» (teer ke shikar) ke mutaliq poocha to Aap (Sallallahu Alaihi Wasallam) ne farmaya ke agar is ke dhaar ki taraf se lage to kha. Agar chorayi se lage to mat kha. Kyunke wo murdar hai, mein ne arz kiya ya Rasul Allah! mein apna kutta (shikar ke liye) chorta hoon aur Bismillah parh leta hoon, phir is ke sath mujhe ek aisa kutta aur milta hai jis par mein ne Bismillah nahi parhi hai. Mein ye faisla nahi kar pata ke donon mein kaun se kutte ne shikar pakra. Aap (Sallallahu Alaihi Wasallam) ne farmaya, aise shikar ka gosht na kha. Kyunke tu ne Bismillah to apne kutte ke liye parhi hai. Doosre ke liye to nahi parhi
.

Hum se Abu Nuaym Fadl bin Dukain ne bayan kiya, kaha hum se Zakariya bin Abi Zaidah ne bayan kiya, in se Aamir Shabi ne, in se Adi bin Hatim razi Allahu anhu ne bayan kiya ke main ne Nabi Karim salla Allahu alaihi wasallam se be-par ke teer ya lakri ya gazz se shikar ke baare mein poochha to Aap ne farmaya ke agar is ki noak shikar ko lag jaye to kha lo lekin agar is ki arz ki taraf se shikar ko lage to woh na khao kyunke woh «mouqoozha» hai aur main ne Aap se kutte ke shikar ke baare mein sawal kiya to Aap ne farmaya ke jise woh tumhare liye rakkhe (yani woh khud na khaye) usay kha lo kyunke kutte ka shikar ko pakar lena yeh bhi zibah karna hai aur agar tum apne kutte ya kutton ke saath koi doosra kutta bhi pao aur tumhein andesha ho ke tumhare kutte ne shikar is doosre ke saath pakra ho ga aur kutta shikar ko maar chuka ho to aisa shikar na khao kyunke tum ne Allah ka naam (Bismillah parh kar) apne kutte par liya tha doosre kutte par nahi liya tha.

Hum se Qubaysah bin Utbah ne bayan kiya, kaha hum se Sufyan Sawri ne bayan kiya, in se Mansoor bin Mutamir ne, in se Ibrahim Nakhai ne, in se Humam bin al-Haris ne aur in se Adi bin Hatim razi Allahu anhu ne bayan kiya ke main ne arz kiya: ya Rasool Allah! Hum sikhaye huay kutte (shikar par) chhorrte hain? Aap salla Allahu alaihi wasallam ne farmaya ke jo shikar woh sirf tumhare liye rakkhe usay khao. Main ne arz kiya agarchay kutte shikar ko maar daalein. Nabi Karim salla Allahu alaihi wasallam ne farmaya ke (haan) agarchay maar daalein! Main ne arz kiya ke hum be-par ke teer ya lakri se shikar karte hain? Aap salla Allahu alaihi wasallam ne farmaya ke agar in ki dhaar usay zakhmi kar ke phaar daale to khao lekin agar in ke arz se shikar maara jaye to usay na khao (woh murdar hai).

Hum se Qutaybah bin Saeed ne bayan kiya, kaha hum se Muhammad bin Fudayl ne bayan kiya, in se Bayaan bin Bishr ne, in se Shabi ne aur in se Adi bin Hatim razi Allahu anhu ne bayan kiya ke main ne Rasool Allah salla Allahu alaihi wasallam se poochha ke hum log in kutton se shikar karte hain? Aap salla Allahu alaihi wasallam ne farmaya ke agar tum apne sikhaye huay kutton ko shikar ke liye chhorrte waqt Allah ka naam lete ho to jo shikar woh tumhare liye pakar kar layein usay khao khwah woh shikar ko maar hi daalein. Albatta agar kutta shikar mein se khud bhi kha le to is mein yeh andesha hai ke us ne yeh shikar khud apne liye pakra tha aur agar doosre kutte bhi tumhare kutton ke siwa shikar mein shareek ho jayein to na khao.

Aur Abd-ul-A-la ne bayan kiya, in se Dawood bin Abi Yasir ne, in se Aamir Shabi ne aur in se Adi bin Hatim razi Allahu anhu ne ke unhon ne Nabi Karim salla Allahu alaihi wasallam se arz ki ke woh shikar teer se maarte hain phir do ya teen din par usay talash karte hain, tab woh murda halat mein milta hai aur is ke andar in ka teer ghusa hua hota hai. Nabi Karim salla Allahu alaihi wasallam ne farmaya ke agar tu chahe to kha sakta hai.

Hum se Adam bin Abi Iyas ne bayan kiya, kaha hum se Shubah ne bayan kiya, in se Abdullah bin Abi al-Safar ne, in se Aamir Shabi ne aur in se Adi bin Hatim razi Allahu anhu ne bayan kiya ke main ne arz kiya ya Rasool Allah! Main (shikar ke liye) apna kutta chhorrte waqt Bismillah parh leta hoon. Aap salla Allahu alaihi wasallam ne farmaya ke jab kutta chhorrte waqt Bismillah parh liya ho aur phir woh kutta shikar pakar ke maar dala aur khud bhi kha le to aisa shikar na khao kyunke yeh shikar is ne khud apne liye pakra hai. Main ne kaha ke main kutta shikar par chhorrta hoon lekin is ke saath doosra kutta bhi mujhe milta hai aur mujhe yeh maloom nahi ke kis ne shikar pakra hai? Aap salla Allahu alaihi wasallam ne farmaya ke aisa shikar na khao kyunke tum ne apne kutte par Bismillah parhi hai doosre kutte par nahi parhi aur main ne Aap se be-par ke teer ya lakri se shikar ka hukm poochha to Aap salla Allahu alaihi wasallam ne farmaya ke agar shikar noak ki dhaar se mara ho to kha lekin agar tu ne is ki chorayi se usay maara hai to aisa shikar bojh se mara hai pas usay na kha.

Mujh se Muhammad bin Salam ne bayan kiya, kaha hum ko Muhammad ibn Fadl ne khabar di, in se Bayaan bin Bishr ne, in se Aamir Shabi ne aur in se Adi bin Hatim razi Allahu anhu ne bayan kiya ke main ne Rasool Allah salla Allahu alaihi wasallam se poochha ke hum is qaum mein sukoonat rakhte hain jo in kutton se shikar karti hai. Aap salla Allahu alaihi wasallam ne farmaya ke jab tum apna sikhaya hua kutta chhorro aur is par Allah ka naam le lo to agar woh kutta tumhare liye shikar laya ho to tum usay kha sakte ho lekin agar kutte ne khud bhi kha liya ho to woh shikar na khao kyunke andesha hai ke us ne woh shikar khud apne liye pakra hai aur agar is kutte ke saath koi doosra kutta bhi shikar mein shareek ho jaye to phir shikar na khao.

Hum se Abdullah bin Maslamah ne bayan kiya, kaha hum se Fuzhail ne bayan kiya, in se Mansoor ne, in se Ibrahim ne, in se Humam ne, in se Adi bin Hatim razi Allahu anhu ne ke main ne Nabi Karim salla Allahu alaihi wasallam se poochha ke main apne sudhaye huay kut-te ko shikar ke liye chhorrta hoon. Nabi Karim salla Allahu alaihi wasallam ne farmaya ke jab tum sudhaye huay kut-te chhorro aur in ke saath Allah ka naam bhi le lo, phir woh koi shikar pakrein aur usay khayein nahi to tum usay kha sakte ho aur jab shikar par bin phaal ke teer yani lakri se koi shikar maare lekin woh nauk se lag kar janwar ka gosht cheer de to aisa shikar bhi khao.