Hum se Ibrahim bin Al-Munzir ne bayan kiya , kaha hum se Anas bin Iyaz Laithi ne Hisham bin Urwah ke wastay se bayan kiya , unhon ne apne walid se ke mayi Aisha Siddiqa raziyallahu anha ne farmaya ke Nabi Karim salla Allahu alaihi wa sallam asr ki namaz aise waqt parhte thay ke un ke hijra mein se abhi dhoop bahar nahi niklti thi .

Urwah rahimahullah alaihi ne kaha ke mujh se Aisha raziyallahu anha ne bayan kiya ke Rasool Allah salla Allahu alaihi wa sallam asr ki namaz is waqt parh lete thay jab abhi dhoop un ke hijra mein mojood hoti thi is se bhi pehle ke woh deewar par charhe .

Hum se Qutaiba bin Saeed ne bayan kiya , kaha hum se Layth bin Saad ne Ibn Shihab se bayan kiya , unhon ne Urwah bin Zubair raziyallahu anhu se , unhon ne Aisha Siddiqa raziyallahu anha se ke Rasool Allah salla Allahu alaihi wa sallam ne asr ki namaz parhi to dhoop un ke hijra hi mein thi . Saya wahan nahi phela tha .

Hum se Abu Naeem Fazl bin Dukain ne bayan kiya , kaha hum se Sufyan bin Uyaynah ne Ibn Shihab Zuhri se bayan kiya , unhon ne Urwah se , unhon ne Aisha Siddiqa raziyallahu anha se , aap ne farmaya ke Nabi Karim salla Allahu alaihi wa sallam jab asr ki namaz parhte to sooraj abhi mere hijre mein jhankta rehta tha . Abhi saya na phela hota tha . Abu Abdullah Imam Bukhari rahimahullah kehte hain ke Imam Malik aur Yahya bin Saeed , Shoaib rahimahumullah aur Ibn Abi Hafsa ke riwayaton mein Zuhri se wal-shams qabla an tazhar ke alfaz hain , jin ka matlab yeh hai ke dhoop abhi upar na charhi hoti .

Hum se Muhammad bin Muqatil ne bayan kiya , unhon ne kaha humein Abdullah bin Mubarak ne khabar di , unhon ne kaha humein Awf ne khabar di Siyar bin Salama se , unhon ne bayan kiya ke mein aur mere walid Abu Barza Aslami raziyallahu anhu ki khidmat mein hazir hue . Un se mere walid ne poocha ke Nabi Karim salla Allahu alaihi wa sallam farz namazen kin waqton mein parhte thay . Unhon ne farmaya ke dopahar ki namaz jisay tum pehli namaz kehte ho sooraj dhulne ke baad parhte thay . Aur jab asr parhte is ke baad koi shakhs Madina ke intihai kinare par apne ghar wapas jata to sooraj ab bhi taiz hota tha . Siyar ne kaha ke maghrib ke waqt ke mutalliq aap ne jo kuch kaha tha woh mujhe yaad nahi raha . Aur isha ki namaz jisay tum atma kehte ho is mein der ko pasand farmate thay aur is se pehle sone ko aur is ke baad baat cheet karne ko na-pasand farmate aur subah ki namaz se is waqt farigh ho jate jab aadmi apne qareeb baithe hue doosre shakhs ko pehchan sakta aur subah ki namaz mein aap saath se sau tak ayaten parha karte thay .

Hum se Abul Yaman Hukm bin Nafi ne bayan kiya ke kaha humein Shoaib bin Abi Hamza ne Zuhri se khabar di , unhon ne kaha ke mujh se Anas bin Malik raziyallahu anhu ne bayan kiya , unhon ne farmaya ke Rasool Allah salla Allahu alaihi wa sallam jab asr ki namaz parhte to sooraj buland aur taiz roshan hota tha . Phir ek shakhs Madina ke balai ilaqe ki taraf jata wahan pohanchnay ke baad bhi sooraj buland rehta tha Zuhri ne kaha ke Madina ke balai ilaqe ke baaz maqamat taqreeban char mile par ya kuch aise hi waqay hain .

Hum se Muhammad bin Bashar ne bayan kiya , kaha hum se Muhammad bin Jafar ne , kaha hum se Shoba bin Hajjaj ne Saad bin Ibrahim se , unhon ne Muhammad bin Amr bin Hasan bin Ali se , unhon ne kaha ke Hajjaj ka zamana aaya aur woh namaz der kar ke parhaya karta tha is liye hum ne Jabir bin Abdullah raziyallahu anhuma se is ke baray mein poocha to unhon ne farmaya ke Nabi Karim salla Allahu alaihi wa sallam zuhr ki namaz theek dopahar mein parhaya karte thay . Abhi sooraj saaf aur roshan hota to namaz asr parhate . Namaz maghrib waqt aate hi parhate aur namaz isha ko kabhi jaldi parhate aur kabhi der se . Jab dekhte ke log jama ho gaye hain to jaldi parha dete aur agar log jaldi jama na hote to namaz mein der karte . Aur logon ka intizar karte aur subah ki namaz sahaba raziyallahu anhuma ya yeh kaha ke Nabi Karim salla Allahu alaihi wa sallam andhere mein parhte thay .

Hum se Muslim bin Ibrahim ne bayan kiya , kaha hum se Shoba Hajjaj ne Saad bin Ibrahim se bayan kiya , woh Muhammad bin Amr se jo Hasan bin Ali bin Abi Talib ke bete hain , farmaya ke hum ne Jabir bin Abdullah raziyallahu anhuma se Nabi Karim salla Allahu alaihi wa sallam ki namaz ke baray mein darayaf kiya . To aap ne farmaya ke aap namaz zuhr dopahar mein parhte thay . Aur jab namaz asr parhte to sooraj saaf roshan hota . Maghrib ki namaz wajib hote hi ada farmate , aur isha mein agar log jaldi jama ho jate to jaldi parh lete aur agar aane walon ki tadaad kam hoti to der karte . Aur subah ki namaz munh andhere mein parha karte thay .

Hum se Musaddad bin Musarhad ne bayan kiya , kaha hum se Yahya bin Saeed Qattan ne , kaha hum se Awf Aarabi ne , kaha ke hum se Abul Minhal Siyar bin Salama ne , unhon ne kaha ke mein apne walid Salama ke sath Abu Barza Aslami raziyallahu anhu ki khidmat mein hazir hua . Un se mere walid sahib ne poocha ke Rasool Allah salla Allahu alaihi wa sallam farz namazen kis tarah yani kin kin auqat mein parhte thay . Hum se is ke baray mein bayan farmaye . Unhon ne farmaya ke aap salla Allahu alaihi wa sallam hejeer zuhr jisay tum salat awla kehte ho sooraj dhulte hi parhte thay . Aur aap salla Allahu alaihi wa sallam ke asr parhne ke baad koi bhi shakhs apne ghar wapas hota aur woh bhi Madina ke sab se aakhri kinare par to sooraj abhi saaf aur roshan hota . Maghrib ke baray mein aap ne jo kuch bataya mujhe yaad nahi raha . Aur farmaya ke isha mein aap salla Allahu alaihi wa sallam takheer pasand farmate thay . Is se pehle sone ko aur is ke baad baat karne ko pasand nahi karte thay . Subah ki namaz se jab aap salla Allahu alaihi wa sallam farigh hote to hum apne qareeb baithe hue doosre shakhs ko pehchan lete . Aap salla Allahu alaihi wa sallam fajr mein saath se sau tak ayaten parhte thay .

Aur Umm Salamah razi Allahu anha ne kaha ke main ne logon ke peeche ho kar Kaaba ka tawaf kiya . Us waqt Nabi Karim salla Allahu alaihi wasallam (namaaz mein) Surah Tur parh rahe thay .

Hum se Ibrahim Bin Al-Munzir ne bayan kiya, unhon ne kaha hum se Anas Bin Iyadh ne bayan kiya, un se Hisham ne bayan kiya, un se un ke baap ne bayan kiya, aur un se Aisha (Radi Allahu Anha) ne bayan kiya ke Rasul Allah (Sallallahu Alaihi Wasallam) jab asar ki namaz parhte to dhoop abhi un ke hujre mein baqi rehti thi
.

`Hum se Ayub bin Salman ne bayan kiya, kaha hum se Abu Bakr bin Uwais ne bayan kiya, un se Sulaiman bin Bilal ne, un se Salih bin Kaisan ne, un se Ibn Shihab ne bayan kiya ke mujhe Anas bin Malik Radi Allahu Anhu ne khabar di ke Rasul Allah صلی اللہ علیہ وسلم asr ki namaz parh kar in gaon mein jate jo Madinah ki bulandi par waqia hain wahan pahunch jate aur sooraj buland rehta. Awali Madinah ka bhi yahi hukm hai aur Laith ne bhi is hadees ko Yunus se riwayat kiya, is mein itna zyada hai ke yeh gaon Madinah se teen chaar meel par waqia hain.