Aur Ata bin Abi Rabah ne kaha ke mareez isha aur maghrib dono ko ek sath jama kar le ga .

Hum se Muhammad bin Mehran ne bayan kiya , kaha hum se Waleed bin Muslima ne , unhon ne kaha ke hum se Abdur Rahman bin Amr Awzai ne bayan kiya , kaha mujh se Abul Najashi ne bayan kiya , un ka naam Ata bin Suhaib tha aur yeh Rafi bin Khudaij raziyallahu anhu ke ghulam hain . Unhon ne kaha ke mein ne Rafi bin Khudaij se suna aap salla Allahu alaihi wa sallam ne farmaya ke hum maghrib ki namaz Nabi Karim salla Allahu alaihi wa sallam ke sath parh kar jab wapas hote aur teer andazi karte to itna ujala baqi rehta tha ke ek shakhs apne teer girne ki jagah ko dekhta tha .

Hum se Muhammad bin Bashar ne bayan kiya , kaha hum se Muhammad bin Jafar ne , kaha hum se Shoba bin Hajjaj ne Saad bin Ibrahim se , unhon ne Muhammad bin Amr bin Hasan bin Ali se , unhon ne kaha ke Hajjaj ka zamana aaya aur woh namaz der kar ke parhaya karta tha is liye hum ne Jabir bin Abdullah raziyallahu anhuma se is ke baray mein poocha to unhon ne farmaya ke Nabi Karim salla Allahu alaihi wa sallam zuhr ki namaz theek dopahar mein parhaya karte thay . Abhi sooraj saaf aur roshan hota to namaz asr parhate . Namaz maghrib waqt aate hi parhate aur namaz isha ko kabhi jaldi parhate aur kabhi der se . Jab dekhte ke log jama ho gaye hain to jaldi parha dete aur agar log jaldi jama na hote to namaz mein der karte . Aur logon ka intizar karte aur subah ki namaz sahaba raziyallahu anhuma ya yeh kaha ke Nabi Karim salla Allahu alaihi wa sallam andhere mein parhte thay .

Hum se Maki bin Ibrahim ne bayan kiya , unhon ne kaha hum se Yazid bin Abi Ubaid ne bayan kiya Salama bin Akwa raziyallahu anhu se , farmaya ke hum namaz maghrib Nabi Karim salla Allahu alaihi wa sallam ke sath is waqt parhte thay jab sooraj parde mein chhup jata .

Hum se Adam bin Abi Iyas ne bayan kiya , kaha hum se Shoba ne bayan kiya , kaha hum se Amr bin Dinar ne bayan kiya , kaha mein ne Jabir bin Zaid se suna , woh Ibn Abbas raziyallahu anhuma ke wastay se bayan karte thay . Aap ne farmaya ke Nabi Karim salla Allahu alaihi wa sallam ne saat rakaten maghrib aur isha ki ek sath aath rakaten zuhr aur asr ki namazen ek sath parhin .