Hum se Ismail bin Abi Oways ne byaan kiya, kaha ke mujh se Imam Malik ne byaan kiya, un se Nafi ne, un se Qasim bin Muhammad ne aur unhein Nabi Karim salla Allahu alaihi wasallam ki zauja mutahhara Aisha razi Allahu anha ne khabar di ke unhon ne ek chhota sa gadda khareeda jis mein tasveerein bani hui thien. Jab Nabi Karim salla Allahu alaihi wasallam ne usay dekha to darwaze par kharay ho gaye aur andar nahi aaye. Main ne Nabi Karim salla Allahu alaihi wasallam ke chehre par khafgi ke aasaar dekh liye aur arz kiya: ya Rasool Allah! Main Allah aur us ke Rasool se tauba karti hoon, main ne kya ghalati ki hai? Nabi Karim salla Allahu alaihi wasallam ne farmaya ke yeh gadda yahan kaise aaya? Byaan kiya ke main ne arz kiya main ne hi usay khareeda hai taake Aap is par baithein aur is par taik lagayein Nabi Karim salla Allahu alaihi wasallam ne farmaya ke in tasveeron ke (banane walon ko) Qayamat ke din azab diya jaye ga aur in se kaha jaye ga ke jo tum ne tasveer saazi ki hai usay zinda bhi karo? Aur Nabi Karim salla Allahu alaihi wasallam ne farmaya ke jin gharon mein tasveerein hoti hain un mein (rahmat ke) farishte nahi aate.

Hum se Abdullah Bin Yusuf ne bayan kiya, kaha ke hum ko Imam Malik ne khabar di, unhein Nafay ne, unhein Qasim Bin Muhammad ne aur unhein Umm-ul-Momineen Aisha (Radi Allahu Anha) ne ke unhon ne ek gadda khareeda jis par murtien theen. Rasul Allah (Sallallahu Alaihi Wasallam) ki nazar jonhi is par pari, Aap (Sallallahu Alaihi Wasallam) darwaze par hi kharay ho gaye aur andar dakhil nahi hue. (Aisha Radi Allahu Anha ne bayan kiya ke) mein ne Aap (Sallallahu Alaihi Wasallam) ke chehra-e-mubarak par na-pasandidi-gi ke aasar dekhe to arz kiya, ya Rasul Allah! mein Allah ki bargah mein tauba karti hoon aur is ke Rasul Allah (Sallallahu Alaihi Wasallam) se maafi mangti hoon, farmaiye mujh se kya ghalti hui hai ? Aap (Sallallahu Alaihi Wasallam) ne farmaya, ye gadda kaisa hai ? mein ne kaha ke mein ne ye Aap hi ke liye khareeda hai taake Aap is par baithein aur is se taik lagayein. Aap (Sallallahu Alaihi Wasallam) ne farmaya, lekin is tarah ki murtien banane wale log qayamat ke din azab kiye jayein ge. Aur un se kaha jaye ga ke tum logon ne jis cheez ko banaya usay zinda kar dikhao. Aap (Sallallahu Alaihi Wasallam) ne ye bhi farmaya ke jin gharon mein tasveerien hoti hain (rahmat ke) farishte un mein dakhil nahi hote
.

Hum se Muhammad Bin Salam ne bayan kiya, kaha hum ko Makhlad Bin Yazid ne khabar di, kaha hum ko Ibn Juraij ne khabar di, unhein Ismail Bin Umayya ne, un se Nafi ne bayan kiya, un se Qasim Bin Muhammad ne bayan kiya aur un se Aisha (Radi Allahu Anha) ne ke mein ne Nabi Kareem (Sallallahu Alaihi Wasallam) ke liye ek takiya bhara, jis par tasveerain bani hui theen. Wo aisa ho gaya jaise naqshi takiya hota hai. Phir Nabi Kareem (Sallallahu Alaihi Wasallam) tashreef laye to darwaze par khade ho gaye aur Aap ke chehre ka rang badalne laga. Mein ne arz kiya, Ya Rasul Allah (Sallallahu Alaihi Wasallam)! Hum se kya ghalati hui? Nabi Kareem (Sallallahu Alaihi Wasallam) ne farmaya ke ye takiya kaisa hai? Mein ne arz kiya, ye to mein ne Aap ke liye banaya hai taake Aap is par taik laga sakein. Is par Aap (Sallallahu Alaihi Wasallam) ne farmaya, kya tumhein nahi maloom ke farishte is ghar mein dakhil nahi hote jis mein koi tasveer hoti hai aur ye ke jo shakhs bhi tasveer banaye ga, Qiyamat ke din ise is par azab diya jaye ga. Is se kaha jaye ga ke jis ki moorat tu ne banayi, ab ise zinda bhi kar ke dikha
.

Hum se Muhammad Bin Muqatil ne bayan kiya, kaha hum ko Abdullah Bin Mubarak ne khabar di, unhein Ma'mar ne khabar di, unhein Zuhri ne, unhein Ubaidullah Bin Abdullah ne, aur unhon ne Ibn Abbas (Radi Allahu Anhuma) se suna, wo kehte thay ke mein ne Abu Talha (Radi Allahu Anhu) se suna, wo kehte thay ke mein ne Rasul Allah (Sallallahu Alaihi Wasallam) se suna, Aap (Sallallahu Alaihi Wasallam) ne farmaya "Farishte is ghar mein dakhil nahi hote jis mein kutte hon aur is mein bhi nahi jis mein jandar ki tasveer ho."
.

Hum se Ahmad Bin Salih ne bayan kiya, kaha hum se Abdullah Bin Wahb ne bayan kiya, kaha hum ko Amr Bin Harith ne khabar di, un se Bukair Bin Ashaj ne bayan kiya, un se Busr Bin Said ne bayan kiya aur un se Zaid Bin Khalid Juhani (Radi Allahu Anhu) ne bayan kiya aur (rawi hadees) Busr Bin Said ke sath Ubaidullah Khaulani bhi riwayat hadees mein shareek hain, jo ke Nabi Kareem (Sallallahu Alaihi Wasallam) ki zauja mutahira Maimoona (Radi Allahu Anha) ki parwarish mein thay. In dono se Zaid Bin Khalid Juhani (Radi Allahu Anhu) ne bayan kiya ke in se Abu Talha (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya "Farishte is ghar mein nahi dakhil hote jis mein (jandar ki) tasveer ho." Busr ne bayan kiya ke phir Zaid Bin Khalid (Radi Allahu Anhu) bimar pade aur hum un ki iyadat ke liye un ke ghar gaye. Ghar mein ek parda pada hua tha aur is par tasveerain bani hui theen. Mein ne Ubaidullah Khaulani se kaha, kya unhon ne hum se tasveeron ke mutaliq ek hadees nahi bayan ki thi? Unhon ne bataya ke Zaid (Radi Allahu Anhu) ne ye bhi kaha tha ke kapde par agar naqsh-o-nigar hon (jandar ki tasveer na ho) to wo is hukm se alag hai. Kya aap ne hadees ka ye hissa nahi suna tha? Mein ne kaha ke nahi. Unhon ne bataya ke ji haan! Zaid (Radi Allahu Anhu) ne ye bhi bayan kiya tha
.

Hum se Yahya Bin Sulaiman ne bayan kiya, kaha ke mujh se Abdullah Bin Wahb ne bayan kiya, kaha ke mujh se Amr ne bayan kiya, un se Salim ne aur un se un ke baap Abdullah Bin Umar (Radi Allahu Anhuma) ne bayan kiya ke ek martaba Nabi Kareem (Sallallahu Alaihi Wasallam) se Jibrail Alaihis Salam ne aane ka waada kiya tha (lekin nahi aaye) phir jab aaye to Aap (Sallallahu Alaihi Wasallam) ne un se wajah puchi, unhon ne kaha ke hum kisi bhi aise ghar mein dakhil nahi hote jis mein tasveer ya kutta maujood ho
.

Hum se Ali Bin Abdullah ne bayan kiya, kaha hum se Sufyan ne bayan kiya, kaha ke mein ne Zuhri se is hadees ko is tarah yaad rakha ke mujh ko koi shak hi nahi, jaise is mein shak nahi ke tu is jagah maujood hai. (Unhon ne bayan kiya ke) mujhe Ubaidullah ne khabar di, unhein Ibn Abbas (Radi Allahu Anhuma) ne aur unhein Abu Talha (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "(Rehmat ke) farishte in gharon mein nahi dakhil hote jin mein kutta ya (jandar ki) tasveer ho."
.

Hum se Yahya Bin Sulaiman ne bayan kiya, kaha ke mujh se Abdullah Bin Wahb ne bayan kiya, kaha ke mujhe Amr Bin Harith ne khabar di, un se Bukair ne bayan kiya, un se Ibn Abbas ke maula Kuraib ne aur un se Ibn Abbas (Radi Allahu Anhuma) ne ke Nabi Kareem (Sallallahu Alaihi Wasallam) bait-ullah mein dakhil hue to is mein Ibrahim Alaihis Salam aur Maryam Alaihim-as-Salam ki tasveerain dekhein, Aap (Sallallahu Alaihi Wasallam) ne farmaya ke Quraish ko kya ho gaya? Halanke unhein maloom hai ke farishte kisi aise ghar mein dakhil nahi hote jis mein tasveerain rakkhi hon, ye Ibrahim Alaihis Salam ki tasveer hai aur wo bhi pansa phainkte hue
.

Hum se Ibrahim Bin Musa Raazi ne bayan kiya, kaha hum ko Hisham Bin Yusuf ne khabar di, unhein Ma'mar Bin Rashid ne, unhein Zuhri. (Doosri sanad) aur hum se Ismail Bin Abi Uwais ne bayan kiya, kaha ke mujh se mere bhai Abdul Hamid ne bayan kiya, un se Sulaiman Bin Bilal, un se Muhammad Bin Abi Ateeq, un se Ibn Shihab (Zuhri), un se Ubaidullah Bin Abdullah Bin Utbah Bin Masood aur un se Ibn Abbas Radi Allahu Anhuma ne bayan kiya ke mujhe Rasul Allah Sallallahu Alaihi Wasallam ke Sahabi Abu Talha Radi Allahu Anhu ne khabar di wo Nabi Kareem Sallallahu Alaihi Wasallam ke sath Badr ki larai mein shareek thay ke farishte is ghar mein nahi aate jis mein tasweer ya kutta ho. In ki murad jandar ki tasweer se thi
.

Hum se Adam bin Abi Iyas ne bayan kiya, kaha hum se Ibn Abi Zib ne bayan kiya, in se Zuhri ne, in se Ubaidullah bin Abdullah bin Utbah ne, in se Ibn Abbas razi Allahu anhuma ne aur in se Abu Talha razi Allahu anhu ne bayan kiya ke Nabi Karim salla Allahu alaihi wasallam ne farmaya ke rahmat ke farishte is ghar mein dakhil nahi hote jis mein kutta ya muratein hon. Aur Layth bin Saad ne bayan kiya, in se Yunus bin Yazid ne, in se Ibn Shihab ne kaha ke mujhko Ubaidullah bin Abdullah bin Utbah ne khabar di, unhon ne Ibn Abbas razi Allahu anhuma se suna, woh kehte thay ke main ne Abu Talha razi Allahu anhu se suna, phir unhon ne Nabi Karim salla Allahu alaihi wasallam se yahi hadees naqal ki hai.

Hum se Qutaybah bin Saeed ne bayan kiya, kaha hum se Layth bin Saad ne bayan kiya, in se Bukayr bin Abdullah ne, in se Busr bin Saeed ne aur in se Zayd bin Khalid razi Allahu anhu ne aur in se Rasool Allah salla Allahu alaihi wasallam ke sahabi Abu Talha razi Allahu anhu ne bayan kiya ke Rasool Allah salla Allahu alaihi wasallam ne farmaya ”farishte is ghar mein nahi dakhil hote jis mein tasveerein hon.“ Busr ne bayan kiya ke (is hadees ko riwayat karne ke baad) phir Zayd razi Allahu anhu beemar paray to hum in ki mizaj-pursa ke liye gaye. Hum ne dekha ke in ke darwaza par ek parda para hua hai jis par tasveer hai. Main ne Umm al-Momineen Maymoonah razi Allahu anha ke rabeeb Ubaidullah bin Aswad se kaha ke Zayd bin Khalid razi Allahu anhu ne hamain is se pehle ek martaba tasveeron ke mutalliq hadees sunayi thi. Ubaidullah ne kaha ke kya tum ne suna nahi tha, hadees bayan karte huay unhon ne yeh bhi kaha tha ke jo murat kapre mein ho woh jaiz hai (bashart-e-ke ghair zhil-rooh ki ho). Aur Abdullah bin Wahb ne kaha, unhein Amr ne khabar di woh Ibn Haris hain, in se Bukayr ne bayan kiya, in se Busr ne bayan kiya, in se Zayd ne bayan kiya, in se Abu Talha razi Allahu anhu ne bayan kiya aur in se Nabi Karim salla Allahu alaihi wasallam ne bayan farmaya jaisa ke oopar mazkoor hua.

Hum se Yahya bin Sulayman ne bayan kiya, kaha ke mujh se Abdullah bin Wahb ne, kaha ke mujh se Umar bin Muhammad ne bayan kiya, in se Salim ne aur in se un ke walid (Ibn Umar razi Allahu anhuma) ne bayan kiya ke ek waqt par Jibrail alaihissalam ne Nabi Karim salla Allahu alaihi wasallam ke yahan aane ka wada kiya lekin aane mein der hui. Is waqt par nahi aaye to Nabi Karim salla Allahu alaihi wasallam sakht pareshan huay phir Aap bahar nikle to Jibrail alaihissalam se mulaqat hui. Nabi Karim salla Allahu alaihi wasallam ne in se shikayat ki to unhon ne kaha ke hum (farishte) kisi aise ghar mein nahi jaate jis mein murat ya kutta ho.