Hum se Yahya bin Bukayr ne byaan kiya , kaha hum se Layth bin Saad ne , un se Abdul Aziz bin Abu Salamah ne , un se Saad bin Ibrahim ne , un se Nafi bin Jubayr ne , un se Urwah bin Mugheerah ne aur un se un ke walid Mugheerah bin Shubah razi Allahu anhu ne byaan kiya ke Nabi Karim salla Allahu alaihi wasallam qaza e haajat ke liye tashreef le gaye thay , phir (jab Aap salla Allahu alaihi wasallam farigh ho kar wapas aaye to) Aap salla Allahu alaihi wasallam ke wuzu ke liye main pani le kar hazir hua , jahan tak mujhe yaqeen hai unhon ne yahi byaan kiya ke yeh waqia Ghazwa Tabook ka hai . Phir Nabi Karim salla Allahu alaihi wasallam ne chehra mubarak dhoya aur jab kohniyon tak dhone ka irada kiya to jubba ki aasteen tang nikli . Chunanche Aap ne hath jubbe ke neeche se nikal liye aur unhein dhoya , phir mauzon par masah kiya .

Hum se ’Amr bin ’Ali ne bayan kiya, unhon ne kaha hum se Abdul Wahhab ne bayan kiya, unhon ne kaha main ne Yahya bin Sa’eed se suna, unhon ne kaha mujhe Sa’d bin Ibrahim ne Nafe’ bin Jubair bin Mut’im se batlaaya. Unhon ne Urwah bin Mughira bin Sho’bah se suna, woh Mughira bin Sho’bah Radhiallahu Anhu se naql karte hain ke woh ek safar mein Rasoolullah Sallallahu Alaihi Wasallam ke saath the. (Wahaan) Aap rafa-e-haajat ke liye tashreef le gaye (jab Aap waapas aaye, Aap Sallallahu Alaihi Wasallam ne Wuzu shuru kiya) to Mughira bin Sho’bah Aap ke (aazaa-e-Wuzu) par paani daalne lage. Aap Sallallahu Alaihi Wasallam Wuzu kar rahe the Aap ne apne munh aur haathon ko dhoya, sar ka masah kiya aur mozon par masah kiya.

Hum se Asbagh Ibn-ul-Faraj ne bayan kiya, woh Ibn-e-Wahb se karte hain, kaha mujh se ’Amr ne bayan kiya, kaha mujh se Abun Nazr ne Abu Salamah bin Abdur Rahman ke waaste se naql kiya, woh Abdullah bin Umar se, woh Sa’d bin Abi Waqqas se, woh Rasoolullah Sallallahu Alaihi Wasallam se naql karte hain ke Rasoolullah Sallallahu Alaihi Wasallam ne mozon par masah kiya. Abdullah bin Umar Radhiallahu Anhuma ne apne waalid maajid Umar Radhiallahu Anhu se is ke baare mein poocha to unhon ne kaha (sach hai aur yaad rakho) jab tum se Sa’d Rasoolullah Sallallahu Alaihi Wasallam ki koi Hadees bayan farmaayen. To us ke mutalliq un ke siwa (kisi) doosre aadmi se mat poocho aur Musa bin ’Uqbah kehte hain ke mujhe Abun Nazr ne batlaaya, unhein Abu Salamah ne khabar di ke Sa`d bin Abi Waqqas ne un se (Rasoolullah Sallallahu Alaihi Wasallam ki yeh) Hadees bayan ki. Phir Umar Radhiallahu Anhu ne (apne bete) Abdullah se aisa kaha.

Hum se ’Amr bin Khalid Al-Harrani ne bayan kiya, kaha hum se Laith ne Yahya bin Sa’eed ke waaste se naql kiya, woh Sa’d bin Ibrahim se, woh Nafe’ bin Jubair se woh Urwah Ibn-ul-Mugheerah se woh apne baap Mugheerah bin Sho’bah se riwayat karte hain woh Rasoolullah Sallallahu Alaihi Wasallam se naql karte hain. (Ek dafa) Aap Sallallahu Alaihi Wasallam rafa-e-haajat ke liye bahar gaye to Mugheerah paani ka ek bartan le kar Aap Sallallahu Alaihi Wasallam ke peeche gaye, jab Aap Sallallahu Alaihi Wasallam qazaa-e-haajat se faarigh ho gaye to Mughira ne (Aap Sallallahu Alaihi Wasallam ko Wuzu karaate huwe) Aap Sallallahu Alaihi Wasallam (ke aazaa-e-mubarakah) par paani daala. Aap Sallallahu Alaihi Wasallam ne Wuzu kiya aur mozon par masah farmaaya.

Hum se Abu Nu’aim ne bayan kiya, kaha hum se Shaibaan ne Yahya ke waaste se naql kiya, woh Abu Salamah se, unhon ne Ja’far bin ’Amr bin Umaiyah Az-Zamri se naql kiya, unhein un ke baap ne khabar di ke unhon ne Rasoolullah Sallallahu Alaihi Wasallam ko mozon par masah karte huwe dekha. Is Hadees ki Mutaba’at mein Harb aur Abaan ne Yahya se Hadees naql ki hai.

Hum se Abdan ne bayan kiya, kaha hamein Abdullah ne khabar di, kaha hum ko Awzaa’ee ne Yahya ke waaste se khabar di, woh Abu Salamah se, woh Ja’far bin ’Amr se, woh apne baap se riwayat karte hain ke main ne Rasoolullah Sallallahu Alaihi Wasallam ko apne amaame aur mozon par masah karte dekha. Is ko riwayat kiya Ma’mar ne Yahya se, woh Abu Salamah se, unhon ne ’Amr se Mutaba’at ki aur kaha ke main ne Rasoolullah Sallallahu Alaihi Wasallam ko dekha (Aap waqaee aisa hi kiya karte the).

Hum se Yahya bin Musa ne bayan kiya, kaha hum se Abu Muawiyah ne Aamash ke wasita se, unhon ne Muslim bin Sabeeh se, unhon ne Masrooq bin Ajda se, unhon ne Mughirah bin Shubah se, Aap ne farmaya ke main Nabi Kareem Sallallahu Alaihi Wasallam ke sath ek safar (Ghazwa Tabook) mein tha. Aap ne ek mauqa par farmaya. Mughirah! Pani ki chagal utha le. Main ne ise utha liya. Phir Rasool Allah Sallallahu Alaihi Wasallam chale aur meri nazron se chhup gaye. Aap ne qazaye hajat ki. Is waqt Aap Shami jubba pehne hue thay. Aap hath kholne ke liye aasteen oopar chadhani chahte thay lekin woh tang thi is liye aasteen ke andar se hath bahar nikala. Main ne Aap ke hathon par pani dala. Aap Sallallahu Alaihi Wasallam ne namaz ke wudu ki tarah wudu kiya aur apne khuffain par masah kiya. Phir namaz padhi.

Hum se Adam bin Abi Iyas ne bayan kiya, kaha hum se Shuba ne Aamash ke wasita se, us ne kaha ke main ne Ibrahim Nakhi se suna. Woh Hammam bin Haris se riwayat karte thay, unhon ne kaha ke main ne Jareer bin Abdullah Razi Allah Anhu ko dekha, unhon ne peshab kiya phir wudu kiya aur apne mozon par masah kiya. Phir khade hue aur (mozon samait) namaz padhi. Aap se jab is ke mutaliq poocha gaya, to farmaya ke main ne Nabi Kareem Sallallahu Alaihi Wasallam ko aisa hi karte dekha hai. Ibrahim Nakhi ne kaha ke yeh hadees logon ki nazar mein bahut pasandida thi kyunke Jareer Razi Allah Anhu aakhir mein Islam laye thay.

Hum se Ishaq bin Nasr ne bayan kiya ke kaha hum se Abu Usama ne bayan kiya Aamash ke wasita se, unhon ne Muslim bin Sabeeh se, unhon ne Masrooq bin Ajda se, unhon ne Mughirah bin Shubah se, unhon ne kaha ke main ne Nabi Kareem Sallallahu Alaihi Wasallam ko wudu karaya. Aap Sallallahu Alaihi Wasallam ne apne mozon par masah kiya aur namaz padhi.

Hum se Ishaq bin Mansoor ne bayan kiya , kaha hum se Nadr bin Shumail ne , unhon ne kaha ke humein Abdullah Ibn Awn ne khabar di , unhon ne Muhammad bin Sireen se , unhon ne Abu Hurairah raziyallahu anhu se , unhon ne kaha ke Rasool Allah salla Allahu alaihi wa sallam ne humein dopahar ke baad ki do namazon mein se koi namaz parhayi . Zuhar ya Asr ki Ibn Sireen ne kaha ke Abu Hurairah raziyallahu anhu ne is ka naam to liya tha . Lekin mein bhool gaya . Abu Hurairah raziyallahu anhu ne batlaya ke aap salla Allahu alaihi wa sallam ne humein do rakat namaz parha kar salam pher diya . Is ke baad ek lakri ki lathi se jo masjid mein rakhi hui thi aap salla Allahu alaihi wa sallam tek laga kar khare ho gaye . Aisa maloom hota tha ke jaisay aap bohot hi khafa hain aur aap salla Allahu alaihi wa sallam ne apne dayen hath ko bayen hath par rakha aur un ki ungliyon ko ek doosre mein dakhil kiya aur aap ne apne dayen rukhsaar mubarak ko bayen hath ki hathaili se sahara diya . Jo log namaz parh kar jaldi nikal jaya karte thay woh masjid ke darwazon se paar ho gaye . Phir log kehne lage ke kya namaz kam kar di gayi hai . Hazireen mein Abu Bakr aur Umar raziyallahu anhuma bhi mojood thay . Lekin unhein bhi aap se bolne ki himmat na hui . Unhein mein ek shakhs thay jin ke hath lambe thay aur unhein Dhul Yadain kaha jata tha . Unhon ne poocha ya Rasool Allah! kya aap salla Allahu alaihi wa sallam bhool gaye ya namaz kam kar di gayi hai . Aap salla Allahu alaihi wa sallam ne farmaya ke na mein bhoola hun aur na namaz mein koi kami hui hai . Phir aap salla Allahu alaihi wa sallam ne logon se poocha . Kya Dhul Yadain sahih keh rahe hain . Hazireen bole ke ji haan! yeh sun kar aap salla Allahu alaihi wa sallam aage barhe aur baqi rakaten parhin . Phir salam phera phir takbeer kahi aur sahu ka sajda kiya . Mamool ke mutabiq ya is se bhi lamba sajda . Phir sar uthaya aur takbeer kahi . Phir takbeer kahi aur doosra sajda kiya . Mamool ke mutabiq ya is se bhi taweel phir sar uthaya aur takbeer kahi , logon ne bar bar Ibn Sireen se poocha ke kya phir salam phera to woh jawab dete ke mujhe khabar di gayi hai ke Imran bin Husain kehte thay ke phir salam phera .

Hum se Musa Bin Ismail ne bayan kiya, kaha hum se Abdul Wahid ne bayan kiya, un se Aamash ne bayan kiya, un se Abu Zuha, Muslim ne, jo Sabeih ke sahibzade hain, un se Masruq ne bayan kiya aur un se Mugheera Bin Shuba (Radi Allahu Anhu) ne bayan kiya ke Rasul Allah (Sallallahu Alaihi Wasallam) qaza-e-hajat ke liye tashreef le gaye. Jab aap (Sallallahu Alaihi Wasallam) wapas hue to mein pani le kar khidmat mein hazir hua, aap (Sallallahu Alaihi Wasallam) shami jubba pehne hue thay. Phir aap (Sallallahu Alaihi Wasallam) ne kulli ki aur naak mein pani dala aur apne chehra paak ko dhoya. Is ke baad (hath dhone ke liye) aasteen charhane ki koshish ki lekin aasteen tang thi is liye hathon ko neeche se nikala phir unhein dhoya aur sar ka masah kiya aur donon mauzon har do ka bhi masah kiya
.

Hum se Qays bin Hafs ne bayan kiya , unhon ne kaha hum se Abd-ul-Wahid ne bayan kiya , kaha hum se Aamash ne bayan kiya , unhon ne kaha ke mujh se Abu al-Duha ne bayan kiya , unhon ne kaha ke mujh se Masrooq ne bayan kiya , unhon ne kaha ke mujh se Mugheera bin Shubah razi Allahu anhu ne bayan kiya ke Nabi Karim salla Allahu alaihi wasallam qaza e hajat ke liye bahar tashreef le gaye phir wapas aaye to main pani le kar hazir tha . Aap ne wuzu kiya Aap Shami jubba pehne huay thay , Aap ne kulli ki aur naak mein pani dala aur apna chehra dhoya phir apni aastinein charhane lage lekin woh tang thi is liye Aap ne apne hath jubbe ke neeche se nikale aur unhein dhoya aur sar par aur mozon par masah kiya .