Hum se Makki Bin Ibrahim ne bayan kiya, kaha hum se Ibn Juraij ne, un se Ata ne aur un se Aisha (Radi Allahu Anha) ne bayan kiya ke jab Nabi Kareem (Sallallahu Alaihi Wasallam) abr ka koi aisa tukda dekhte jis se barish ki umeed hoti to aap kabhi aage aate, kabhi peechhe jate, kabhi ghar ke andar tashreef late, kabhi bahar aa jate aur chehra-e-mubarak ka rang badal jata. Lekin jab barish hone lagti to phir ye kaifiyat baqi na rehti. Ek martaba Aisha (Radi Allahu Anha) ne is ke mutaliq Aap se pucha. To Aap (Sallallahu Alaihi Wasallam) ne farmaya. Mein nahi janta mumkin hai ye badal bhi waisa hi ho jis ke bare mein qaum-e-Aad ne kaha tha, jab unhon ne badal ko apni wadiyon ki taraf aate dekha tha. Akheer ayat tak (ke un ke liye rehmat ka badal aaya hai, halanke wo azab ka badal tha)
.

Hum se Abdullah bin Yusuf Tanisi ne bayan kiya, unhon ne kaha humein khabar di Imam Malik ne Salih bin Kaisan se, unhon ne Urwah bin Zubair se, unhon ne Umm-ul-Momineen Aisha Razi Allah Anha se, Aap ne farmaya ke Allah Ta’ala ne pehle namaz mein do do rakat farz ki thi. Safar mein bhi aur iqamat ki halat mein bhi. Phir safar ki namaz to apni asli halat par baqi rakkhi gayi aur halat-e-iqamat ki namazon mein ziyaadati kar di gayi. 104688

Hum se Muhammad bin Muqatil ne byaan kiya , unhon ne kaha ke hamein Abdullah bin Mubarak ne khabar di , kaha ke hamein Ubaidullah Umri ne Nafi se khabar di , unhein Qasim bin Muhammad ne , unhein Aisha razi Allahu anha ke Rasool Allah salla Allahu alaihi wasallam jab barish hoti dekhte to yeh dua karte «Sayyiban naafi'an» ay Allah! nafa bakhshne wali barish barsa . Is riwayat ki mutabi'at Qasim bin Yahya ne Ubaidullah Umri se ki hai aur is ki riwayat Awzai aur Aqeel ne Nafi se ki hai .

Hum se Saeed bin Abi Maryam ne byaan kiya , unhon ne kaha ke hamein Muhammad bin Jafar ne khabar di , unhon ne kaha mujhe Humaid Taweel ne khabar di aur unhon ne Anas bin Malik razi Allahu anhu se suna , unhon ne byaan kiya ke jab taiz hawa chalti to Nabi Karim salla Allahu alaihi wasallam ke chehra mubarak par darr mehsoos hota tha .

Hum se Muhammad Bin Bashar ne bayan kiya, kaha hum se Ghundar ne bayan kiya, kaha hum se Shuba ne bayan kiya, un se Qatada ne (doosri sanad) Imam Bukhari Rahimahullah ne kaha aur mujh se Khalifa Bin Khayyat ne bayan kiya kaha hum se Yazid Bin Zuraie ne bayan kiya, kaha hum se Said Bin Arubah ne, un se Qatada ne, un se Abu-ul-Aaliya ne aur un se tumhare Nabi ke chachazad bhai Abdullah Bin Abbas (Radi Allahu Anhuma) ne ke Nabi Kareem (Sallallahu Alaihi Wasallam) ne farmaya "Shab-e-Meraj mein, mein ne Musa Alaihis Salam ko dekha tha, gandumi rang, qadd lamba aur baal ghoonghriyale thay, aise lagte thay jaise qabile Shanuwa ka koi shakhs ho aur mein ne Isa Alaihis Salam ko bhi dekha tha. Darmiyana qadd, miyana jism, rang surkhi aur safaidi liye hue aur sarr ke baal seedhe thay (yaani ghoonghriyale nahi thay) aur mein ne Jahannum ke darogha ko bhi dekha aur Dajjal ko bhi, manjumba in ayat ke jo Allah Ta'ala ne mujh ko dikhayi theen (Surah Al-Sajda mein isi ka zikr hai ke) pas (Ae Nabi!) in se mulaqat ke bare mein aap kisi qism ka shak-o-shubha na karein, yaani Musa Alaihis Salam se milne mein, Anas aur Abu Bakra (Radi Allahu Anhuma) ne Nabi Kareem (Sallallahu Alaihi Wasallam) se yun bayan kiya ke jab Dajjal nikalega to farishte Dajjal se Madinah ki hifazat kareinge
.

Abdan ne kaha ke humein Abdullah ne khabar di, unhein Yunus ne khabar di aur unhein Zuhri ne, (doosri sanad) aur hum se Ahmad Bin Salih ne bayan kiya, kaha hum se Anbasa ne, un se Yunus ne, un se Ibn Shihab ne bayan kiya aur un se Anas (Radi Allahu Anhu) ne bayan kiya ke Abu Zarr (Radi Allahu Anhu) bayan karte thay ke Nabi Kareem (Sallallahu Alaihi Wasallam) ne farmaya "Mere ghar ki chhat kholi gayi. Mera qayam in dinon Makkah mein tha. Phir Jibrail Alaihis Salam utre aur mera seena chaak kiya aur ise Zamzam ke pani se dhoya. Is ke baad sone ka ek tasht laye jo hikmat aur iman se labreez tha, ise mere seene mein undail diya. Phir mera hath pakad kar aasman ki taraf le kar chale, jab aasman dunya par pahunche to Jibrail Alaihis Salam ne aasman ke darogha se kaha ke darwaza khoolo, pucha ke kaun sahab hain? Unhon ne jawab diya ke mein Jibrail, phir pucha ke Aap ke sath koi aur bhi hai? Jawab diya ke mere sath Muhammad (Sallallahu Alaihi Wasallam) hain, pucha ke unhein lane ke liye Aap ko bheja gaya tha. Jawab diya ke haan, ab darwaza khula, jab hum aasman par pahunche to wahan ek buzurg se mulaqat hui, kuch insani roohein un ke dayein taraf theen aur kuch bayein taraf, jab wo dayein taraf dekhte to hans dete aur jab bayein taraf dekhte to ro padte. Unhon ne kaha khush-aamadeed, naik nabi, naik bete! Mein ne pucha, Jibrail! Ye sahab kaun buzurg hain? To unhon ne bataya ke ye Aadam Alaihis Salam hain aur ye insani roohein un ke dayein aur bayein taraf theen un ki aulad Bani Aadam ki roohein theen un ke jo dayein taraf theen wo jannati theen aur jo bayein taraf theen wo dozakhi theen, isi liye jab wo dayein taraf dekhte to muskurate aur jab bayein taraf dekhte to rote thay, phir Jibrail Alaihis Salam mujhe upar le kar chadhe aur doosre aasman par aaye, is aasman ke darogha se bhi unhon ne kaha ke darwaza khoolo, unhon ne bhi isi tarah ke sawalat kiye jo pehle aasman par ho chuke thay, phir darwaza khoola, Anas (Radi Allahu Anhu) ne bayan kiya ke Abu Zarr (Radi Allahu Anhu) ne tafseel se bataya ke Nabi Kareem (Sallallahu Alaihi Wasallam) ne mukhtalif aasmano par Idrees, Musa, Isa aur Ibrahim Alaihim-us-Salam ko paya, lekin unhon ne in anbiya-e-kiram ke maqamat ki koi takhsees nahi ki, sirf itna kaha ke Nabi Kareem (Sallallahu Alaihi Wasallam) ne Aadam Alaihis Salam ko aasman-e-dunya (pehle aasman par) paya aur Ibrahim Alaihis Salam ko chhete par aur Anas (Radi Allahu Anhu) ne bayan kiya ke phir jab Jibrail Alaihis Salam, Idrees Alaihis Salam ke paas se guzre to unhon ne kaha khush-aamadeed, naik nabi, naik bhai, mein ne pucha ke ye kaun sahab hain? Jibrail Alaihis Salam ne bataya ke ye Idrees Alaihis Salam hain, phir mein Isa Alaihis Salam ke paas se guzra, unhon ne bhi kaha khush-aamadeed naik nabi, naik bhai, mein ne pucha ye kaun sahab hain? To bataya ke Isa Alaihis Salam. Phir Ibrahim Alaihis Salam ke paas se guzra to unhon ne farmaya ke khush-aamadeed naik nabi aur naik bete, mein ne pucha ye kaun sahab hain? Jawab diya ke ye Ibrahim Alaihis Salam hain, Ibn Shihab se Zuhri ne bayan kiya aur mujhe Ayub Bin Hazam ne khabar di ke Ibn Abbas (Radi Allahu Anhuma) aur Abu Hayya Ansari (Radi Allahu Anhum) bayan karte thay ke Nabi Kareem (Sallallahu Alaihi Wasallam) ne farmaya phir mujhe upar le kar chadhe aur mein itne buland maqam par pahunch gaya jahan se qalam ke likhne ki awaz saaf sunne lagi thi, Abu Bakr Bin Hazam ne bayan kiya aur Anas Bin Malik (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne farmaya phir Allah Ta'ala ne pachas waqt ki namazain mujh par farz kiyein. Mein is fareeza ke sath wapas hua aur jab Musa Alaihis Salam ke paas se guzra to unhon ne pucha ke Aap ki ummat par kya cheez farz ki gayi hai? Mein ne jawab diya ke pachas waqt ki namazain un par farz hui hain. Unhon ne kaha ke Aap apne Rabb ke paas wapas jayein, kyunke Aap ki ummat mein itni namazon ki taqat nahi hai, chunanche mein wapas hua aur Rabb-ul-Alameen ke darbar mein muraji'at ki, is ke natije mein is ka ek hissa kam kar diya gaya, phir mein Musa Alaihis Salam ke paas aaya aur is martaba bhi unhon ne kaha ke apne Rabb se phir muraji'at karein phir unhon ne apni tafseelat ka zikar kiya ke Rabb-ul-Alameen ne ek hisse ki phir kami kar di, phir mein Musa Alaihis Salam ke paas aaya aur unhein khabar ki, unhon ne kaha ke Aap apne Rabb se muraji'at karein, kyunke Aap ki ummat mein is ki bhi taqat nahi hai, phir mein wapas hua aur apne Rabb se phir muraji'at ki, Allah Ta'ala ne is martaba farma diya ke namazain paanch waqt ki kar di gayeen aur sawab pachas namazon ka hi baqi rakha gaya, hamara qaul badla nahi karta. Phir mein Musa Alaihis Salam ke paas aaya to unhon ne ab bhi isi par zor diya ke apne Rabb se Aap ko phir muraji'at karni chahiye. Lekin mein ne kaha ke mujhe Allah Paak se bar-bar darkhwast karte hue ab sharm aati hai. Phir Jibrail Alaihis Salam mujhe le kar aage badhe aur Sidrat-ul-Muntaha ke paas laye jahan mukhtalif qism ke rang nazar aaye, jinhon ne is darakht ko chhupa rakha tha mein nahi janta ke wo kya thay. Is ke baad mujhe jannat mein dakhil kiya gaya to mein ne dekha ke moti ke gumbad bane hue hain aur is ki mitti mushk ki tarah khushbudar thi."
.

Hum se Ibrahim Bin Musa ne bayan kiya kaha hum ko Hisham Bin Yusuf ne khabar di kaha hum ko Maamar ne khabar di unhein Zuhri ne unhein Saeed Bin Musayyib ne aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne is raat ki kaifiyat bayan ki jis mein Aap (Sallallahu Alaihi Wasallam) ko Meraj hua ke mein ne Musa (Alaihis Salam) ko dekha ke wo ek duble patle seedhe balon wale aadmi hain. Aisa maloom hota tha ke qabila Shanwah mein se hon aur mein ne Isa (Alaihis Salam) ko bhi dekha wo miyana qad aur nihayat surkh-o-safaid rang wale thay. Aise tar-o-taza aur paak-o-saaf ke maloom hota tha ke abhi ghusal khana se nikle hain aur mein Ibrahim (Alaihis Salam) se un ki aulad mein sab se zyada mushabeh hoon. Phir do bartan mere samne laye gaye. Ek mein doodh tha aur doosre mein sharab thi. Jibrail (Alaihis Salam) ne kaha ke dono cheezon mein se aap ka jo ji chahe pijiye. Mein ne doodh ka pyala apne hath mein le liya aur ise pee gaya. Mujh se kaha gaya ke aap ne fitrat ko ikhtiyar kiya (doodh aadmi ki paidaishi ghiza hai) agar is ke bajaye aap ne sharab pee hoti to aap ki ummat gumrah ho jati

Hum se Hadbah Bin Khalid ne bayan kiya unhon ne kaha hum se Hammam Bin Yahya ne bayan kiya unhon ne kaha hum se Qatada ne bayan kiya un se Anas Bin Malik (Radi Allahu Anhu) ne aur un se Malik Bin Sa'sa'ah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ne Shab-e-Meraj ke mutaliq bayan farmaya ke phir aap upar charhay aur doosre aasman par tashreef le gaye. Phir darwaza kholne ke liye kaha. Poocha gaya: Kaun hain? Kaha ke Jibrail (Alaihis Salam). Poocha gaya: Aap ke sath kaun hain? Kaha ke Muhammad (Sallallahu Alaihi Wasallam). Poocha gaya: Kya unhein lane ke liye bheja kaha ke jee haan. Phir jab mein wahan pahuncha to Isa aur Yahya (Alaihimas Salam) wahan maujood thay. Ye dono Nabi aapas mein khala zaad bhai hain. Jibrail (Alaihis Salam) ne bataya ke ye Yahya aur Isa (Alaihimas Salam) hain unhein salam kijiye. Mein ne salam kiya dono ne jawab diya aur kaha khush amdeed naik bhai aur naik Nabi

Mujh se Ibrahim Bin Musa ne bayan kiya kaha ke hum ko Hisham ne khabar di unhein Maamar ne (doosri sanad) mujh se Mahmood ne bayan kiya kaha hum se Abdur Razzaq ne bayan kiya kaha ke hum ko Maamar ne khabar di un se Zuhri ne bayan kiya kaha mujh ko Saeed Bin Musayyib ne khabar di aur un se Abu Hurairah (Radi Allahu Anhu) ne bayan kiya ke Rasul Allah (Sallallahu Alaihi Wasallam) ne farmaya ke jis raat meri Meraj hui mein ne Musa (Alaihis Salam) se mulaqat ki thi. Rawi ne bayan kiya ke phir Aap (Sallallahu Alaihi Wasallam) ne un ka huliya bayan kiya wo .... Mera khayal hai ke Maamar ne kaha .... daraz qamat aur seedhe balon wale thay jaise qabila Shanwah ke log hote hain. Aap ne bayan kiya ke mein ne Isa (Alaihis Salam) se bhi mulaqat ki. Aap (Sallallahu Alaihi Wasallam) ne un ka bhi huliya bayan farmaya ke darmiyana qad aur surkh-o-safaid thay jaise abhi abhi ghusal khane se bahar aaye hon aur mein ne Ibrahim (Alaihis Salam) se bhi mulaqat ki thi aur mein un ki aulad mein un se sab se zyada mushabeh hoon. Aap (Sallallahu Alaihi Wasallam) ne farmaya ke mere pas do bartan laye gaye ek mein doodh tha aur doosre mein sharab. Mujh se kaha gaya ke jo aap ka ji chahe le lo. Mein ne doodh ka bartan le liya aur pee liya. Is par mujh se kaha gaya ke fitrat ki aap ne raah paa li ya fitrat ko aap ne paa liya. Is ke bajaye agar aap sharab ka bartan lete to aap ki ummat gumrah ho jati

Hum se Muhammad Bin Kaseer ne bayan kiya kaha hum ko Israel ne khabar di kaha hum ko Usman Bin Mugheerah ne khabar di unhein Mujahid ne aur un se Abdullah Bin Umar (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne farmaya "Mein ne Isa, Musa aur Ibrahim (Alaihimus Salam) ko dekha. Isa (Alaihis Salam) nihayat surkh ghangriyalay baal wale aur chouray seene wale thay aur Musa (Alaihis Salam) gandam goon daraz qamat aur seedhe balon wale thay jaise koi qabila Zut ka aadmi ho."

Hum se Ismail bin Abi Uwais ne bayan kiya, kaha ke mujh se mere bhai (Abdul Hameed) ne bayan kiya, un se Sulaiman bin Bilal ne, un se Shareek bin Abdullah bin Abi Namr ne, unhon ne Anas bin Malik Radi Allahu Anhu se suna woh Masjid al-Haram se Nabi Kareem Sallallahu Alaihi Wa Sallam ki Meraj ka waqia bayan kar rahe thay ke (Meraj se pehle) teen farishte aaye. Yeh Aap Sallallahu Alaihi Wa Sallam par wahi nazil hone se bhi pehle ka waqia hai. Is waqt Aap Sallallahu Alaihi Wa Sallam Masjid al-Haram mein (do aadmiyon Hamza aur Ja'far bin Abi Talib ke darmiyan) so rahe thay. Ek farishte ne poocha: Woh kon hain? (jin ko le jane ka hukm hai) Doosre ne kaha ke woh darmiyan wale hain. Wahi sab se behtar hain. Teesre ne kaha ke phir jo sab se behtar hain unhein sath le chalo. Is raat sirf itna hi waqia ho kar reh gaya. Phir Aap ne unhein nahi dekha. Lekin farishte ek aur raat mein aaye. Aap dil ki nigah se dekhte thay aur Aap ki aankhein soti thin par dil nahi sota tha, aur tamam ambiya ki yahi kaifiyat hoti hai ke jab un ki aankhein soti hain to dil is waqt bhi bedar hota hai. Gharaz ke phir Jibrail Alaihis Salam ne Aap ko apne sath liya aur aasman par charha le gaye.

Hum se Hadbah Bin Khalid ne bayan kiya, unhon ne kaha hum se Hammam Bin Yahya ne bayan kiya, un se Qatadah ne bayan kiya, un se Anas Bin Malik Radi Allahu Anhu ne bayan kiya aur un se Malik Bin Sa'sa'ah Radi Allahu Anhu ne bayan kiya, ke Nabi Kareem Sallallahu Alaihi Wasallam ne un se shab-e-Meraj ka waqia bayan kiya. Aap Sallallahu Alaihi Wasallam ne farmaya ke mein Hateem mein leta hua tha. Baaz dafa Qatadah ne Hateem ke bajaye Hijr bayan kiya ke mere paas ek sahib (Jibrail Alaihis Salam) aaye aur mera seena chaak kiya. Qatadah ne bayan kiya ke mein ne Anas Radi Allahu Anhu se suna, wo bayan karte thay ke yahan se yahan tak. Mein ne Jarood se suna jo mere qareeb hi baithe thay. Poocha ke Anas Radi Allahu Anhu ki is lafz se kya murad thi? To unhon ne kaha ke halaq se naaf tak chaak kiya (Qatadah ne bayan kiya ke) mein ne Anas se suna, unhon ne bayan kiya ke Nabi Kareem Sallallahu Alaihi Wasallam ke seene ke upar se naaf tak chaak kiya, phir mera dil nikala aur ek sone ka tasht laya gaya jo iman se bhara hua tha, is se mera dil dhoya gaya aur pehle ki tarah rakh diya gaya. Is ke baad ek janwar laya gaya jo ghore se chota aur gadhe se bara tha aur safaid! Jarood ne Anas Radi Allahu Anhu se poocha: Abu Hamza! Kya wo Buraq tha? Aap ne farmaya ke haan. Is ka har qadam is ke muntahaye nazar par parta tha (Nabi Kareem Sallallahu Alaihi Wasallam ne farmaya ke) mujhe is par sawar kiya gaya aur Jibrail mujhe le kar chale aasman-e-duniya par pahunche to darwaza khulwaya, poocha gaya kaun sahib hain? Unhon ne bataya ke Jibrail (Alaihis Salam) poocha gaya aur aap ke sath kaun hai? Aap ne bataya ke Muhammad (Sallallahu Alaihi Wasallam). Poocha gaya, kya unhein bulane ke liye aap ko bheja gaya tha? Unhon ne jawab diya ke haan. Is par aawaz aayi (unhein) khush amdeed! Kya hi mubarak aane wale hain wo, aur darwaza khol diya. Jab mein andar gaya to mein ne wahan Aadam Alaihis Salam ko dekha, Jibrail Alaihis Salam ne farmaya ye aap ke jadd-e-amjad Aadam Alaihis Salam hain unhein salam kijiye. Mein ne un ko salam kiya aur unhon ne jawab diya aur farmaya: Khush amdeed naik bete aur naik nabi! Jibrail Alaihis Salam upar charhe aur doosre aasman par aaye wahan bhi darwaza khulwaya aawaz aayi kaun sahib aaye hain? Bataya ke Jibrail (Alaihis Salam) poocha gaya aap ke sath aur koi sahib bhi hain? Kaha Muhammad (Sallallahu Alaihi Wasallam). Poocha gaya kya aap ko unhein bulane ke liye bheja gaya tha? Unhon ne jawab diya ke haan. Phir aawaz aayi unhein khush amdeed. Kya hi acche aane wale hain wo. Phir darwaza khula aur mein andar gaya to wahan Yahya aur Eisa Alaihimas Salam mojood thay. Ye dono khala zaad bhai hain. Jibrail Alaihis Salam ne farmaya ye Eisa aur Yahya Alaihimas Salam hain unhein salam kijiye mein ne salam kiya aur in hazrat ne mere salam ka jawab diya aur farmaya khush amdeed naik nabi aur naik bhai! Yahan se Jibrail Alaihis Salam mujhe teesre aasman ki taraf le kar charhe aur darwaza khulwaya. Poocha gaya kaun sahib aaye hain? Jawab diya ke Jibrail. Poocha gaya aur aap ke sath kaun sahib aaye hain? Jawab diya ke Muhammad (Sallallahu Alaihi Wasallam). Poocha gaya kya unhein lane ke liye aap ko bheja gaya tha? Jawab diya ke haan. Is par aawaz aayi unhein khush amdeed. Kya hi acche aane wale hain wo, darwaza khula aur jab mein andar dakhil hua to wahan Yusuf Alaihis Salam mojood thay. Jibrail Alaihis Salam ne farmaya ye Yusuf hain unhein salam kijiye mein ne salam kiya to unhon ne jawab diya aur farmaya: Khush amdeed naik nabi aur naik bhai! Phir Jibrail Alaihis Salam mujhe le kar upar charhe aur chauthe aasman par pahunche darwaza khulwaya to poocha gaya kaun sahib hain? Bataya ke Jibrail! Poocha gaya aur aap ke sath kaun hai? Kaha ke Muhammad (Sallallahu Alaihi Wasallam). Poocha gaya kya unhein bulane ke liye aap ko bheja gaya tha? Jawab diya ke haan kaha ke unhein khush amdeed. Kya hi acche aane wale hain wo! Ab darwaza khula jab mein wahan Idrees Alaihis Salam ki khidmat mein pahuncha to Jibrail Alaihis Salam ne farmaya ye Idrees Alaihis Salam hain unhein salam kijiye mein ne unhein salam kiya aur unhon ne jawab diya aur farmaya khush amdeed paak bhai aur naik nabi. Phir mujhe le kar paanchvein aasman par aaye aur darwaza khulwaya poocha gaya kaun sahib hain? Jawab diya ke Jibrail poocha gaya aap ke sath kaun sahib aaye hain? Jawab diya ke Muhammad (Sallallahu Alaihi Wasallam). Poocha gaya ke unhein bulane ke liye aap ko bheja gaya tha? Jawab diya ke haan ab aawaz aayi khush amdeed kya hi acche aane wale hain wo, yahan jab mein Haroon Alaihis Salam ki khidmat mein hazir hua to Jibrail Alaihis Salam ne bataya ke ye Haroon hain unhein salam kijiye mein ne unhein salam kiya unhon ne jawab ke baad farmaya khush amdeed naik nabi aur naik bhai! Yahan se le kar mujhe aage barhe aur chatte aasman par pahunche aur darwaza khulwaya poocha gaya kaun sahib aaye hain? Bataya ke Jibrail, poocha gaya aap ke sath koi doosre sahib bhi aaye hain? Jawab diya ke Muhammad (Sallallahu Alaihi Wasallam). Poocha gaya kya unhein bulane ke liye aap ko bheja gaya tha? Jawab diya ke haan. Phir kaha unhein khush amdeed kya hi acche aane wale hain wo. Mein jab wahan Musa Alaihis Salam ki khidmat mein hazir hua to Jibrail Alaihis Salam ne farmaya ke ye Musa Alaihis Salam hain unhein salam kijiye, mein ne salam kiya aur unhon ne jawab ke baad farmaya khush amdeed naik nabi aur naik bhai! Jab mein aage barha to wo rone lage kisi ne poocha aap ro kyun rahe hain? To unhon ne farmaya mein is par ro raha hoon ke ye larka mere baad nabi bana kar bheja gaya lekin jannat mein is ki ummat ke log meri ummat se zyada hon ge. Phir Jibrail Alaihis Salam mujhe le kar saatvein aasman ki taraf gaye aur darwaza khulwaya. Poocha gaya kaun sahib aaye hain? Jawab diya ke Jibrail, poocha gaya aur aap ke sath kaun sahib aaye hain? Jawab diya ke Muhammad (Sallallahu Alaihi Wasallam). Poocha gaya kya unhein bulane ke liye aap ko bheja gaya tha? Jawab diya ke haan. Kaha ke unhein khush amdeed. Kya hi acche aane wale hain wo, mein jab andar gaya to Ibrahim Alaihis Salam tashreef rakhte thay. Jibrail Alaihis Salam ne farmaya ke ye aap ke jadd-e-amjad hain, unhein salam kijiye. Nabi Kareem Sallallahu Alaihi Wasallam ne farmaya ke mein ne un ko salam kiya to unhon ne jawab diya aur farmaya khush amdeed naik nabi aur naik bete! Phir Sidrat-ul-Muntaha ko mere samne kar diya gaya mein ne dekha ke is ke phal Maqam-e-Hajar ke mitkon ki tarah (bare bare) thay aur is ke pate hathiyon ke kaan ki tarah thay. Jibrail Alaihis Salam ne farmaya ke ye Sidrat-ul-Muntaha hai. Wahan mein ne char nahrein dekhein do batini aur do zahiri. Mein ne poocha ay Jibrail! Ye kya hain? Unhon ne bataya ke jo do batini nahrein hain wo jannat se talluq rakhti hain aur do zahiri nahrein, Neel aur Furat hain. Phir mere samne Bait-ul-Ma'moor ko laya gaya, wahan mere samne ek glass mein sharab ek mein doodh aur ek mein shehad laya gaya. Mein ne doodh ka glass le liya to Jibrail Alaihis Salam ne farmaya yahi fitrat hai aur aap is par qaim hain aur aap ki ummat bhi! Phir mujh par rozana pacchas namazein farz ki gayein mein wapas hua aur Musa Alaihis Salam ke paas se guzra to unhon ne poocha kis cheez ka aap ko hukm hua? Mein ne kaha ke rozana pacchas waqt ki namazon ka. Musa Alaihis Salam ne farmaya lekin aap ki ummat mein itni taqat nahi hai. Is se pehle mera wasta logon se par chuka hai aur Bani Israeel ka mujhe talkh tajruba hai. Is liye aap apne Rabb ke huzoor mein dobara jaiye aur apni ummat par takhfeef ke liye arz kijiye. Chunanche mein Allah Ta'ala ke darbar mein dobara hazir hua aur takhfeef ke liye arz ki to das waqt ki namazein kam kar di gayein. Phir mein jab wapasi mein Musa Alaihis Salam ke paas se guzra to unhon ne phir wahi sawal kiya mein dobara bargah-e-Rabb Ta'ala mein hazir hua aur is martaba bhi das waqt ki namazein kam huin. Phir mein Musa Alaihis Salam ke paas se guzra aur to unhon ne wahi mutaliba kiya mein ne is martaba bhi bargah-e-Rabb Ta'ala mein hazir ho kar das waqt ki namazein kam karayein. Musa Alaihis Salam ke paas se phir guzra unhon ne apni raye ka izhaar kiya phir bargah-e-Ilahi mein hazir hua to mujhe das waqt ki namazon ka hukm hua mein wapas hone laga to aap ne phir wahi kaha ab bargah-e-Ilahi mein hazir hua to rozana sirf paanch waqt ki namazon ka hukm baqi raha. Musa Alaihis Salam ke paas aaya to aap ne daryaft farmaya ab kya hukm hua? Mein ne Musa Alaihis Salam ko bataya ke rozana paanch waqt ki namazon ka hukm hua hai. Farmaya ke aap ki ummat is ki bhi taqat nahi rakhti mera wasta aap se pehle logon se par chuka hai aur Bani Israeel ka mujhe talkh tajruba hai. Apne Rabb ke darbar mein phir hazir ho kar takhfeef ke liye arz kijiye. Nabi Kareem Sallallahu Alaihi Wasallam ne farmaya Rabb Ta'ala se mein bahut sawal kar chuka aur ab mujhe sharm aati hai. Ab mein bas isi par razi hoon. Nabi Kareem Sallallahu Alaihi Wasallam ne farmaya ke phir jab mein wahan se guzarne laga to nida aayi ”mein ne apna fareeza jari kar diya aur apne bandon par takhfeef kar chuka.“
.

Umm al-Momineen Aisha razi Allahu anha ne Nabi Karim salla Allahu alaihi wasallam se arz kiya ke ya Rasool Allah! Jab log baadal dekhte hain to khush hote hain ke is se barish barse gi lekin is ke bar-khilaf Aap ko main dekhti hoon ke Aap baadal dekhte hain to nagowari ka asar Aap ke chehre par numayan ho jata hai . Aap salla Allahu alaihi wasallam ne farmaya: Ae Aisha! Kya dhamanat hai ke is mein azab na ho . Ek qaum (Aad) par hawa ka azab aaya tha . Unhon ne jab azab dekha to bolay ke yeh to baadal hai jo hum par barse ga .

Hum se Abd-ul-Aziz bin Abdullah Owaysi ne bayan kiya , unhon ne kaha mujh se Sulayman bin Bilal ne bayan kiya , in se Shareek bin Abdullah bin Abi ne bayan kiya , unhon ne bayan kiya ke main ne Anas bin Malik razi Allahu anhu se suna unhon ne woh waqia bayan kiya jis raat Rasool Allah salla Allahu alaihi wasallam ko Masjid e Kaaba se Mearaj ke liye le jaya gaya ke wahi aane se pehle Aap ke paas farishte aaye . Nabi Karim salla Allahu alaihi wasallam Masjid-ul-Haram mein soye huay thay . In mein se ek ne poochha ke woh kaun hain ? Doosre ne jawab diya ke woh in mein sab se behtar hain teesre ne kaha ke in mein jo sab se behtar hain unhein le lo . Is raat ko bas itna hi waqia pesh aaya aur Nabi Karim salla Allahu alaihi wasallam ne is ke baad unhein nahi dekha . Yahan tak ke woh doosri raat aaye jabke Aap ka dil dekh raha thu aur Aap ki aankhen so rahi thien . Lekin dil nahi so raha thu . Ambiya ka yahi haal hota hai . In ki aankhen soti hain lekin in ke dil nahi sote . Chunanche unhon ne Aap se baat nahi ki . Balkay Aap ko utha kar Zamzam ke kunwien ke paas laaye . Yahan Jibrail alaihissalam ne Aap ka kaam sanbhala aur Aap ke galay se dil ke neeche tak seena chaak kiya aur seene aur pait ko paak kar ke Zamzam ke pani se usay apne hath se dhoya yahan tak ke Aap ka pait saaf ho gaya . Phir Aap ke paas sone ka tasht laya gaya jis mein sone ka ek bartan iman o hikmat se bhara hua thu . Is se Aap ke seene aur halaq ki ragon ko siya aur usay barabar kar diya . Phir Aap ko le kar aasman e duniya par charhe aur is ke darwazon mein se ek darwaze par dastak di . Aasman walon ne in se poochha Aap kaun hain ? Unhon ne kaha ke Jibrail unhon ne poochha aur Aap ke saath kaun hai ? Jawab diya ke meere saath Muhammad salla Allahu alaihi wasallam hain . Poochha: kiya unhein bulaya gaya hai ? Jawab diya ke haan . Aasman walon ne kaha khoob achhe aane aur apne hi logon mein aane ho . Aasman wale is se khush huay . In mein se kisi ko maloom nahi hota ke Allah Ta'ala zameen mein kiya karna chahta hai jab tak woh unhein bata na de . Nabi Karim salla Allahu alaihi wasallam ne aasman e duniya par Adam alaihissalam ko paya . Jibrail alaihissalam ne Aap se kaha ke yeh Aap ke buzurg tareen dada Adam hain Aap unhein salam kijiye . Adam alaihissalam ne salam ka jawab diya . Kaha ke khoob achhe aane aur apne hi logon mein aane ho . Mubarak ho apne bete ko , Aap kiya hi achhe bete hain . Aap ne aasman e duniya mein do neharein dekhein jo beh rahi thien . Poochha Ae Jibrail! yeh neharein kaisi hain ? Jibrail alaihissalam ne jawab diya ke yeh Neel aur Furaat ka manba hai . Phir Aap aasman par aur chale to dekha ke ek doosri nehar hai jis ke oopar moti aur zabar-jad ka mahal hai . Is par apna hath mara to woh mushk hai . Poochha: Jibrail! yeh kiya hai ? Jawab diya ke yeh Kausar hai jise Allahne Aap ke liye mahfooz rakkha hai . Phir Aap doosre aasman par charhe . Farishton ne yahan bhi wahi sawal kiya jo pehle aasman par kiya thu . Kaun hain ? Kaha: Jibrail . Poochha Aap ke saath kaun hain ? Kaha Muhammad salla Allahu alaihi wasallam . Poochha kiya unhein bulaya gaya hai ? Unhon ne kaha ke haan . Farishte bole unhein marhaba aur bisharat ho . Phir Aap ko le kar teesre aasman par charhe aur yahan bhi wahi sawal kiya jo pehle aur doosre aasman par kiya thu . Phir chouthe aasman par le kar charhe aur yahan bhi wahi sawal kiya . Phir paanchvein aasman par Aap ko le kar charhe aur yahan bhi wahi sawal kiya phir chhatte aasman par Aap ko le kar charhe aur yahan bhi wahi sawal kiya . Phir Aap ko le kar saatvein aasman par charhe aur yahan bhi wahi sawal kiya . Har aasman par ambiya hain jin ke naam Aap ne liye . Mujhe yeh yaad hai ke Idrees alaihissalam doosre aasman par , Haroon alaihissalam chouthe aasman par , aur doosre Nabi paanchvein aasman par . Jin ke naam mujhe yaad nahi aur Ibrahim alaihissalam chhatte aasman par aur Musa alaihissalam saatvein aasman par . Yeh unhein Allah Ta'ala ne sharaf e ham-kalaami ki wajah se fazeelat mili thi . Musa alaihissalam ne kaha: meere Rabb! mera khayal nahi thu ke kisi ko mujh se barhaya jaye ga . Phir Jibrail alaihissalam unhein le kar is se bhi oopar gaye jis ka ilm Allahke siwa aur kisi ko nahi yahan tak ke Aap ko Sidrat-ul-Muntaha par le kar aane aur Rabb-ul-Izzat Allah Tabarak wa Ta'ala se qareeb huay aur itne qareeb jaise kaman ke donon kinare ya is se bhi qareeb . Phir Allahne aur doosri baaton ke saath Aap ki ummat par din aur raat mein pachaas namazon ki wahi ki . Phir Aap utre aur jab Musa alaihissalam ke paas pahunche to unhon ne Aap ko روک liya aur poochha: Ae Muhammad! Aap ke Rabb ne Aap se kiya ahad liya hai ? Farmaya ke meere Rabb ne mujh se din aur raat mein pachaas namazon ka ahad liya hai . Musa alaihissalam ne farmaya ke Aap ki ummat mein is ki taqat nahi . Wapas jayiye aur apni aur apni ummat ki taraf se kami ki darkhast kijiye . Chunanche Nabi Karim salla Allahu alaihi wasallam Jibrail alaihissalam ki taraf mutawaj-jo huay aur unhon ne bhi isharah kiya ke haan agar chahein to behtar hai . Chunanche Aap phir unhein le kar Allah Ta'ala ki bargah mein hazir huay aur apne maqam par khare ho kar arz kiya: Ae Rabb! hamase kami kar de kyunke meri ummat is ki taqat nahi rakhti . Chunanche Allah Ta'ala ne das namazon ki kami kar di . Phir Aap Musa alaihissalam ke paas aane to unhon ne Aap ko roka . Musa alaihissalam Aap ko isi tarah barabar Allah Rabb-ul-Izzat ke paas wapas karte rahe . Yahan tak ke paanch namazein ho gayiein . Paanch namazon par bhi unhon ne Nabi Karim salla Allahu alaihi wasallam ko roka aur kaha: Ae Muhammad! main ne apni qaum Bani Israeel ka tajurba is se kam par kiya hai woh natawan sabit huay aur unhon ne chhorr diya . Aap ki ummat to jism , dil , badan , nazar aur kaan har aitbar se kamzor hai , Aap wapas jayiye aur Allah Rabb-ul-Izzat is mein bhi kami kar de ga . Har martaba Nabi Karim salla Allahu alaihi wasallam Jibrail alaihissalam ki taraf mutawaj-jo hote thay taake in se mashwara lein aur Jibrail alaihissalam usay napasand nahi karte thay . Jab woh Aap ko paanchvein martaba bhi le gaye to arz kiya: Ae meere Rabb! meri ummat jism , dil , nigah aur band har haisi-yat se kamzor hai , pas hamase aur kami kar de . Allah Ta'ala ne is par farmaya ke woh qaul meere yahan badla nahi jata jaisa ke main netum par Umm-ul-Kitab mein farzh kiya hai . Aur farmaya ke har naiki ka sawab das guna hai pas yeh Umm-ul-Kitab mein pachaas namazein hain lekintum par farzh paanch hi hain . Chunanche Aap Musa alaihissalam ke paas wapas aane aur unhon ne poochha: kiya hua ? Aap ne kaha ke hamase yeh takh-feef ki ke har naiki ke badle das ka sawab mile ga . Musa alaihissalam ne kaha ke main ne Bani Israeel ko is se kam par aazmaya hai aur unhon ne chhorr diya . Pas Aap wapas jayiye aur mazeed kami karaiye . Nabi Karim salla Allahu alaihi wasallam ne is par kaha: Ae Musa , wallah! mujhe apne Rabb se ab sharm aati hai kyunke baar baar aa ja chuka hoon . Unhon ne kaha ke phir Allahka naam le kar utar jao . Phir jab tum bedar huay to Masjid-ul-Haram mein thay . Is ke baad Nabi Karim salla Allahu alaihi wasallam Masjid-ul-Haram hi mein thay ke jaag uthe , jaag uthne se yeh murad hai ke woh halat e Mearaj ki jaati rahi aur Aap apni halat mein aa gaye .