Hum se Habban Bin Musa ne bayan kiya, ke hum ko Abdullah Bin Mubarak ne khabar di, unhein Khalid Bin Said ne, unhein un ke walid ne aur un se Umm-e-Khalid Bint Khalid Bin Said (Radi Allahu Anha) ne bayan kiya ke mein Rasul Allah (Sallallahu Alaihi Wasallam) ki khidmat mein apne walid ke sath hazir hui, mein is waqt ek zard rang ki qameez pehne hue thi. Nabi Kareem (Sallallahu Alaihi Wasallam) ne is par farmaya "Sana Sana" Abdullah ne kaha ye lafz Habshi zaban mein umda ke maane mein bola jata hai. Unhon ne bayan kiya ke phir mein mohr-e-nubuwwat ke sath (jo Aap ke pusht par thi) khelne lagi to mere walid ne mujhe danta, lekin Aap (Sallallahu Alaihi Wasallam) ne farmaya ke ise mat danto, phir Aap (Sallallahu Alaihi Wasallam) ne Umm-e-Khalid ko (darazi-e-umar ki) dua di ke is qameez ko khoob pehen aur purani kar, phir pehen aur purani kar, aur phir pehen aur purani kar, Abdullah ne kaha ke chunanche ye qameez itne dinon tak baqi rahi ke zabanon par is ka charcha aa gaya
.

Hum se Humaidi ne bayan kiya, unhon ne kaha hum se Sufyan Bin Uyainah ne bayan kiya, unhon ne kaha hum se Ishaq Bin Saeed Saidi ne bayan kiya. Un se in ke walid Saeed Bin Amr Bin Saeed Bin Aas ne, un se Umm Khalid Bint Khalid Radi Allahu Anha ne bayan kiya ke mein jab Habshah se aayi to bahut kam umr thi. Mujhe Rasul Allah Sallallahu Alaihi Wasallam ne ek dhari dar chadar inayat farmai aur phir aap ne is ki dhariyon par apna hath pher kar farmaya «Sanah, Sanah.» Humidi ne bayan kiya ke «Sanah, Sanah» Habshi zaban ka lafz hai yani accha accha
.

Mujh se Yahya bin Sulayman ne bayan kiya, kaha mujh se Ibn Wahb ne bayan kiya, kaha ke mujh se Imam Malik ne bayan kiya, in se Nafi ne aur in se Ibn Umar razi Allahu anhuma ne ke Nabi Karim salla Allahu alaihi wasallam ne farmaya ”bukhar jahannum ki bhaap mein se hai pas is ki garmi ko pani se bujhao.“ Nafi ne bayan kiya ke Abdullah bin Umar razi Allahu anhuma (ko jab bukhar aata to) yun dua karte ke ”Allah! Hum se is azab ko door kar de.“

Hum se Abu Nuaym ne bayan kiya, kaha hum se Ishaq bin Saeed ne bayan kiya, in se un ke walid ne, in se Saeed bin falan yani Amr bin Saeed bin Aas ne aur in se Umm Khalid bint Khalid razi Allahu anha ne ke Nabi Karim salla Allahu alaihi wasallam ki khidmat mein kuch kapre laaye gaye jis mein ek chhoti kaali kamli bhi thi. Nabi Karim salla Allahu alaihi wasallam ne farmaya ke tumhara kya khayal hai yeh chadar kisay di jaye? Sahabah ikraam razi Allahu anhum khamosh rahe phir Nabi Karim salla Allahu alaihi wasallam ne farmaya: Umm Khalid ko mere paas bula lao. Unhein goad mein utha kar laya gaya (kyunke bachi thien) aur Nabi Karim salla Allahu alaihi wasallam ne woh chadar apne hath mein li aur unhein pehnaya aur dua di ke jeeti raho. Is chadar mein hare aur zard naqsh o nigaar thay. Nabi Karim salla Allahu alaihi wasallam ne farmaya ke Umm Khalid! Yeh naqsh o nigaar ”sana“ hain. ”sana“ Habshi zaban mein khoob achhe ke maani mein aata hai.

Hum se Sulayman bin Harb ne bayan kiya, kaha hum se Shubah ne bayan kiya (doosri sanad) aur Imam Bukhari rahmahullah ne kaha ke mujh se Muhammad bin Bashar ne bayan kiya, kaha hum se Ghundar ne bayan kiya, kaha hum se Shubah ne bayan kiya, in se Abd-ul-Malik bin Maysarah ne aur in se Zayd bin Wahb ne ke Ali razi Allahu anhu ne bayan kiya ke Nabi Karim salla Allahu alaihi wasallam ne mujhe reshmi dhariyon wala ek jora, hulla inayat farmaya. Main usay pehan kar nikla to main ne Nabi Karim salla Allahu alaihi wasallam ke chehra mubarak par ghussa ke aasaar dekhe. Chunanche main ne is ke tukray kar ke apni azeez auraton mein baant diye.

Hum se Abu al-Waleed ne bayan kiya , kaha hum se Ishaq bin Saeed bin Amr bin Saeed bin Aas ne bayan kiya , kaha ke mujh se mere walid ne bayan kiya , kaha ke mujh se Umm Khalid bint Khalid razi Allahu anha ne bayan kiya , unhon ne bayan kiya ke Rasool Allah salla Allahu alaihi wasallam ke paas kuch kapre aaye jin mein ek kaali chadar bhi thi . Nabi Karim salla Allahu alaihi wasallam ne farmaya ke tumhara kya khayal hai , kisay yeh chadar di jaye ? Sahabah ikraam razi Allahu anhum khamosh rahe phir Aap salla Allahu alaihi wasallam ne farmaya ke Umm Khalid ko bula lao . Chunanche mujhe Nabi Karim salla Allahu alaihi wasallam ki khidmat mein laya gaya aur mujhe woh chadar Nabi Karim salla Allahu alaihi wasallam ne apne hath se inayat farmayi aur farmaya der tak jeeti raho , do martaba Aap salla Allahu alaihi wasallam ne farmaya . Phir Aap is chadar ke naqsh o nigaar ko dekhne lage aur apne hath se meri taraf isharah kar ke farmaya Umm Khalid! «sana. wa-s-sana» yeh Habshi zaban ka lafz hai yani wah kya zeb deti hai . Ishaq bin Saeed ne bayan kiya ke mujh se mere ghar ki ek aurat ne bayan kiya kaha ke unhon ne woh chadar Umm Khalid razi Allahu anha ke paas dekhi thi .

Hum se Habban bin Musa ne bayan kiya, kaha hum ko Abdullah bin Mubarak ne khabar di, unhein Khalid bin Saeed ne, unhein in ke walid ne, in se Umm Khalid bint Saeed razi Allahu anhuma ne bayan kiya ke main Rasool Allah salla Allahu alaihi wasallam ki khidmat mein apne walid ke saath hazir hui. Main ek zard qamees pehne huay thi. Nabi Karim salla Allahu alaihi wasallam ne farmaya, ”sana sana“ Abdullah bin Mubarak ne kaha ke yeh Habshi zaban mein ”achha“ ke maani mein hai. Umm Khalid ne bayan kiya ke phir main Nabi Karim salla Allahu alaihi wasallam ki khatam e nabuwat se khelne lagi to mere walid ne mujhe danta lekin Nabi Karim salla Allahu alaihi wasallam ne farmaya ke usay khelne do phir Aap salla Allahu alaihi wasallam ne farmaya ke tum ek zamana tak zinda raho gi Allah Ta'ala tumhari umr khoob taweel kare, tumhari zindagi daraz ho. Abdullah ne bayan kiya chunanche unhon ne bahut hi taweel umr paayi aur in ki toul e umr ke charche hone lage.