Hum se Sulayman bin Harb ne bayan kiya, kaha hum se Shubah ne bayan kiya (doosri sanad) aur Imam Bukhari rahmahullah ne kaha ke mujh se Muhammad bin Bashar ne bayan kiya, kaha hum se Ghundar ne bayan kiya, kaha hum se Shubah ne bayan kiya, in se Abd-ul-Malik bin Maysarah ne aur in se Zayd bin Wahb ne ke Ali razi Allahu anhu ne bayan kiya ke Nabi Karim salla Allahu alaihi wasallam ne mujhe reshmi dhariyon wala ek jora, hulla inayat farmaya. Main usay pehan kar nikla to main ne Nabi Karim salla Allahu alaihi wasallam ke chehra mubarak par ghussa ke aasaar dekhe. Chunanche main ne is ke tukray kar ke apni azeez auraton mein baant diye.

Hum se Musa bin Ismail ne bayan kiya, kaha ke mujh se Juwayriyah ne bayan kiya, in se Nafi ne, in se Abdullah bin Umar razi Allahu anhuma ne ke Umar razi Allahu anhu ne reshmi dhariyon wala ek jora farokht hote dekha to arz kiya ke ya Rasool Allah! Behtar hai ke Aap usay khareed lein aur wufood se mulaqat ke waqt aur Jumu'ah ke din usay zeb-tan kiya karein. Nabi Karim salla Allahu alaihi wasallam ne farmaya ke usay woh pehnta hai jis ka (aakhirat mein) koi hissa nahi hota. Is ke baad Nabi Karim salla Allahu alaihi wasallam ne khud Umar razi Allahu anhu ke paas resham ki dhariyon wala ek jora hulla bheja, hadiya ke taur par. Umar razi Allahu anhu ne arz kiya Aap ne mujhe yeh jora hulla inayat farmaya hai haalan ke main khud Aap se is ke baare mein woh baat sun chuka hoon jo Aap ne farmayi thi. Aap salla Allahu alaihi wasallam ne farmaya ke main ne tumhein yeh kapra is liye diya hai ke usay bech do ya (auraton waghaira mein se) kisi ko pehna do.

Hum se Abu al-Yaman ne bayan kiya, kaha hum ko Shuayb ne khabar di, in se Zuhri ne bayan kiya, unhein Anas bin Malik razi Allahu anhu ne khabar di ke unhon ne Rasool Allah salla Allahu alaihi wasallam ki sahibzadi Umm Kulsoom razi Allahu anha ko zard dhari-dar reshmi jora pehne dekha.