Hum se Ubaid Bin Ismail ne bayan kiya, unhon ne kaha hum se Abu Usama ne bayan kiya, un se Hisham ne bayan kiya ke mujhe mere walid ne khabar di, neez mujh se Fatima ne bhi bayan kiya, aur un se Asma Bint Abi Bakr (Radi Allahu Anha) ne bayan kiya ke jab Rasul Allah (Sallallahu Alaihi Wasallam) ne Madinah ki hijrat ka irada kiya to mein ne (walid-e-majid Sayyidna) Abu Bakr (Radi Allahu Anhu) ke ghar aap ke liye safar ka nashta tayyar kiya tha. Unhon ne bayan kiya ke jab aap ke nashte aur pani ko bandhne ke liye koi cheez nahi mili, to mein ne Abu Bakr (Radi Allahu Anhu) se kaha ke bajuz mere kamar-band ke aur koi cheez ise bandhne ke liye nahi hai. To unhon ne farmaya ke phir isi ke do tukre kar lo. Ek se nashta bandh dena aur doosre se pani, chunancha us ne aisa hi kiya, aur isi wajah se mera naam ”Zaat-un-Nitaqain“ (do kamar-bandon wali) par gaya
.

Hum se Farwa Bin Abi Maghra ne bayan kiya, kaha ke hum ko Ali Bin Mushir ne khabar di, unhein Hisham ne, unhein un ke baap ne, aur un se Aisha (Radi Allahu Anha) ne bayan kiya ke aise din (makki zindagi mein) bahut hi kam aaye, jin mein Nabi Kareem (Sallallahu Alaihi Wasallam) subah-o-sham mein kisi na kisi waqt Abu Bakr (Radi Allahu Anhu) ke ghar tashreef na laye hon. Phir jab aap (Sallallahu Alaihi Wasallam) ko Madinah ki taraf hijrat ki ijazat di gayi, to hamari ghabrahat ka sabab ye hua ke aap (mamool ke khilaf achanak) zohar ke waqt hamare ghar tashreef laye. Jab Abu Bakr (Radi Allahu Anhu) ko aap (Sallallahu Alaihi Wasallam) ki amad ki ittela di gayi to unhon ne bhi yehi kaha ke Nabi Kareem (Sallallahu Alaihi Wasallam) is waqt hamare yahan koi nayi baat pesh aane hi ki wajah se tashreef laye hain. Jab aap (Sallallahu Alaihi Wasallam) Abu Bakr (Radi Allahu Anhu) ke paas pohanche to aap (Sallallahu Alaihi Wasallam) ne farmaya ke is waqt jo log tumhare paas hon unhein hata do. Abu Bakr (Radi Allahu Anhu) ne arz kiya, ya Rasul Allah! yahan to sirf meri yehi do betiyan hain yaani Aisha aur Asma (Radi Allahu Anhuma). Ab aap (Sallallahu Alaihi Wasallam) ne farmaya ke tumhein maloom bhi hai mujhe to yahan se nikalne ki ijazat mil gayi hai. Abu Bakr (Radi Allahu Anhu) ne arz kiya mere paas do ontniyan hain jinhein mein ne nikalne hi ke liye tayyar kar rakkha tha. Aap un mein se ek le lijiye. Aap (Sallallahu Alaihi Wasallam) ne farmaya ke accha, qeemat ke badle mein, mein ne ek ontni le li
.

Hum se Ibrahim Bin Musa ne bayan kiya, kaha ke hum ko Hisham Bin Urwah ne khabar di, unhein Maamar ne, unhein Zuhri ne, unhein Urwah Bin Zubair ne aur unhein Aisha (Radi Allahu Anha) ne ke Nabi Kareem (Sallallahu Alaihi Wasallam) aur Abu Bakr (Radi Allahu Anhu) ne (hijrat karte waqt) Banu Deel ke ek mard ko naukar rakkha jo Banu Abd Bin Adi ke khandan se tha. Aur ise batur-e-mahir rahbar mazdoori par rakkha tha (hadees ke lafz) «خريت» ke maani rahbari mein mahir ke hain. Us ne apna hath pani waghairah mein dubo kar Aas Bin Wail ke khandan se ahad kiya tha aur wo kuffar-e-Quraish hi ke deen par tha. Lekin Nabi Kareem (Sallallahu Alaihi Wasallam) aur Abu Bakr (Radi Allahu Anhu) ko is par bharosa tha. Isi liye apni sawariyan unhon ne ise day deen aur Ghar-e-Saur par teen raat ke baad is se milne ki takeed ki thi. Wo shakhs teen raaton ke guzarte hi subah ko donon hazrat ki sawariyan lay kar wahan hazir ho gaya. Is ke baad ye hazrat wahan se Aamir Bin Fuhairah aur is Deeli rahbar ko sath lay kar chale. Ye shakhs sahil ke kinare se Aap ko lay kar chala tha
.

Hum se Yahya Bin Bukair ne bayan kiya, kaha ke hum se Laith ne bayan kiya, unhon ne kaha ke hum se Aqeel ne ke Ibn Shihab ne bayan kiya ke mujhe Urwah Bin Zubair ne khabar di aur un se Nabi Kareem (Sallallahu Alaihi Wasallam) ki biwi Aisha (Radi Allahu Anha) ne bayan kiya ke Rasul Allah (Sallallahu Alaihi Wasallam) aur Abu Bakr (Radi Allahu Anhu) ne Banu Deel ke ek mahir rahbar se mazdoori taye kar li thi. Wo shakhs kuffar-e-Quraish ke deen par tha. In donon hazrat ne apni donon oontniyan us ke hawale kar di theen aur keh diya tha ke teen raaton ke baad subah sawere hi sawaron ke sath Ghar-e-Saur par aa jaye
.

Hum se Ishaq Bin Ibrahim ne bayan kiya, kaha ke hum ko Nazr ne khabar di, kaha ke hum ko Israel ne khabar di Abu Ishaq se ke mujhe Bara Bin Azib (Radi Allahu Anhu) ne Abu Bakr (Radi Allahu Anhu) se khabar di (doosri sanad) hum se Abdullah Bin Raja ne bayan kiya, kaha ke hum se Israel ne bayan kiya Abu Ishaq se, aur unhon ne Abu Bakr (Radi Allahu Anhu) se ke (hijrat kar ke Madinah jate waqt) mein ne talash kiya to mujhe ek charwaha mila jo apni bakriyan chara raha tha. Mein ne us se poocha ke tum kis ke charwahe ho ? Us ne kaha ke Quraish ke ek shakhs ka. Us ne Quraishi ka naam bhi bataya, jise mein janta tha. Mein ne us se poocha kya tumhare rewar ki bakriyon mein doodh bhi hai ? Us ne kaha ke han! mein ne us se poocha kya tum mere liye doodh doah lo ge ? Us ne kaha, han zaroor! chunanche mein ne us se doahne ke liye kaha. Wo apne rewar se ek bakri pakar laya. Phir mein ne us se bakri ka than gard-o-ghubar se saaf karne ke liye kaha. Phir mein ne us se apna hath saaf karne ke liye kaha. Us ne waisa hi kiya. Ek hath ko doosre par maar kar saaf kar liya. Aur ek piyala doodh doha. Rasul Allah (Sallallahu Alaihi Wasallam) ke liye mein ne ek bartan sath liya tha. Jis ke munh par kapra bandha hua tha. Mein ne pani doodh par bahaya. Jis se is ka nichla hissa thanda ho gaya phir doodh lay kar Nabi Kareem (Sallallahu Alaihi Wasallam) ki khidmat mein hazir hua. Aur arz kiya ke doodh hazir hai. Ya Rasul Allah! pee lijiye, Aap (Sallallahu Alaihi Wasallam) ne ise piya, yahan tak ke mein khush ho gaya
.

Hum se Muhammad bin Yusuf ne bayan kiya, kaha hum se Ahmad bin Yazid bin Ibrahim Abu al-Hasan Harrani ne, kaha hum se Zuhair bin Muawiya ne, kaha hum se Abu Ishaq ne bayan kiya aur unhon ne Bara bin Azib Radi Allahu Anhu se suna, unhon ne bayan kiya ke Abu Bakr Radi Allahu Anhu mere walid ke pas un ke ghar aaye aur un se ek palan khareeda. Phir unhon ne mere walid se kaha ke apne bete ke zariye ise mere sath bhej do. Bara Radi Allahu Anhu ne bayan kiya chunanche mein is kajaway ko utha kar Aap ke sath chala aur mere walid is ki qeemat ke rupaye parkhwane lage. Mere walid ne un se poocha Ae Abu Bakr! Mujhe woh waqia sunaiye jab Aap ne Rasoolullah Sallallahu Alaihi Wa Sallam ke sath Ghaar-e-Saur se hijrat ki thi to Aap dono ne woh waqt kaise guzara tha? Is par unhon ne bayan kiya ke ji haan, raat bhar to hum chalte rahe aur doosre din subah ko bhi lekin jab dopahar ka waqt hua aur rasta bilkul sunsan par gaya ke koi bhi aadmi guzarta hua dikhayi nahi deta tha to humein ek lambi chattan dikhayi di, is ke saye mein dhoop nahi thi. Hum wahan utar gaye aur mein ne khud Nabi Kareem Sallallahu Alaihi Wa Sallam ke liye ek jagah apne hath se theek kar di aur ek chadar wahan bicha di. Phir mein ne arz kiya Ya Rasul Allah! Aap yahan aaram farmaiye mein nigrani karunga, Aap Sallallahu Alaihi Wa Sallam so gaye aur mein charon taraf halat dekhne ke liye nikla. Ittefaq se mujhe ek charwaha mila. Woh bhi apni bakriyon ke rewar ko isi chattan ke saye mein lana chahta tha jis ke talle mein ne wahan parao dala tha. Wahi is ka bhi irada tha, mein ne us se poocha ke tu kis qabeele se hai? Us ne bataya ke Madinah ya (rawi ne kaha ke) Makkah ke falan shakhs se, mein ne us se poocha ke kya teri bakriyon se doodh mil sakta hai? Us ne kaha ke haan. Mein ne poocha kya hamare liye tu doodh nikal sakta hai? Us ne kaha ke haan. Chunanche woh ek bakri pakar ke laya. Mein ne us se kaha ke pehle than ko mitti, baal aur doosri gandagiyon se saaf kar le. Abu Ishaq rawi ne kaha ke mein ne Bara bin Azib Radi Allahu Anhu ko dekha ke unhon ne apne ek hath ko doosre par maar kar than ko jhaarne ki surat bayan ki. Us ne lakri ke ek piyale mein doodh nikala. Mein ne Aap Sallallahu Alaihi Wa Sallam ke liye ek bartan apne sath rakh liya tha. Aap is se pani piya karte thay aur wudhu bhi kar lete thay. Phir mein Aap Sallallahu Alaihi Wa Sallam ke pas aaya (Aap so rahe thay) mein Aap ko jagana pasand nahi karta tha. Lekin baad mein jab mein aaya to Aap bedar ho chuke thay. Mein ne pehle doodh ke bartan par pani bahaya jab is ke neeche ka hissa thanda ho gaya to mein ne arz kiya: Ae Allah ke Rasool! Doodh pee lijiye, unhon ne bayan kiya ke phir Aap Sallallahu Alaihi Wa Sallam ne doodh nosh farmaya jis se mujhe khushi hasil hui. Phir Aap ne farmaya kya abhi kooch karne ka waqt nahi aaya? Mein ne arz kiya ke aa gaya hai. Unhon ne kaha: Jab suraj dhal gaya to hum ne kooch kiya. Baad mein Suraqah bin Malik hamara peecha karta hua yahin pahuncha. Mein ne kaha: Ya Rasul Allah! Ab to yeh hamare qareeb hi pahunch gaya hai. Aap Sallallahu Alaihi Wa Sallam ne farmaya ke gham na karo. Allah hamare sath hai. Aap ne phir us ke liye bad-dua ki aur us ka ghora ise liye hue pait tak zameen mein dhans gaya. Mera khayal hai ke zameen badi sakht thi. Yeh shakk (rawi hadeeth) Zuhair ko tha. Suraqah ne kaha: Mein samajhta hun ke Aap logon ne mere liye bad-dua ki hai. Agar ab Aap log mere liye (is museebat se najat ki) dua kar dein to Allah ki qasam mein Aap logon ki talash mein aane wale tamam logon ko wapas lauta dunga. Chunanche Aap Sallallahu Alaihi Wa Sallam ne phir dua ki to woh najat pa gaya. Phir to jo bhi ise raste mein milta us se woh kehta tha ke mein bahut talash kar chuka hun. Qat-ee tour par woh idhar nahi hain. Is tarah jo bhi milta ise woh wapas apne sath le jata. Abu Bakr Radi Allahu Anhu ne kaha ke us ne hamare sath jo waada kiya tha ise poora kiya.

Hum se Abdullah bin Raja ne bayan kiya, kaha hum se Israil ne bayan kiya, un se Abu Ishaq ne aur un se Bara Radi Allahu Anhu ne bayan kiya ke Abu Bakr Radi Allahu Anhu ne (in ke walid) Azib Radi Allahu Anhu se ek palan terah dirham mein khareeda. Phir Abu Bakr Radi Allahu Anhu ne Azib Radi Allahu Anhu se kaha ke Bara (apne bete) se kaho ke woh mere ghar yeh palan utha kar pahuncha dein is par Azib Radi Allahu Anhu ne kaha yeh is waqt tak nahi ho sakta jab tak Aap woh waqia bayan na karein ke Aap aur Rasoolullah Sallallahu Alaihi Wa Sallam (Makkah se hijrat karne ke liye) kis tarah nikle thay halankay mushrikeen Aap dono ko talash bhi kar rahe thay. Unhon ne kaha ke Makkah se nikalne ke baad hum raat bhar chalte rahe aur din mein bhi safar jari rakkha. Lekin jab dopahar ho gayi to mein ne charon taraf nazar dourayi ke kahin koi saya nazar aa jaye aur hum is mein kuch aaram kar sakein. Aakhir ek chattan dikhayi di aur mein ne is ke pas pahunch kar dekha ke saya hai. Phir mein ne Nabi Kareem Sallallahu Alaihi Wa Sallam ke liye ek farsh wahan bicha diya aur arz kiya ke Ya Rasul Allah! Aap ab aaram farmaiye. Chunanche Aap lait gaye. Phir mein charon taraf dekhta hua nikla ke kahin log hamari talash mein na aaye hon. Phir mujh ko bakriyon ka ek charwaha dikhayi diya jo apni bakriyan hankta hua isi chattan ki taraf aa raha tha. Woh bhi hamari tarah saya ki talash mein tha. mein ne barh kar us se poocha ke larke tum kis ke ghulam ho. us ne Quraish ke ek shakhs ka naam liya to mein ne ise pehchan liya. Phir mein ne us se poocha: Kya tumhari bakriyon mein doodh hai. us ne kaha ji haan. Mein ne kaha: Kya tum doodh dooh sakte hon? us ne kaha ke haan. Chunanche mein ne us se kaha aur us ne apne rewar ki ek bakri bandh di. Phir mere kehne par us ne is ke than ke ghubar ko jhaara. Ab mein ne kaha ke apna hath bhi jhaar le. Us ne yun apna ek hath doosre par maara aur mere liye thoda sa doodh dooha. Aap Sallallahu Alaihi Wa Sallam ke liye ek bartan mein ne pehle hi se sath le liya tha aur is ke munh ko kapre se band kar diya tha (is mein thanda pani tha) phir mein ne doodh par woh pani (thanda karne ke liye) dala itna ke woh neeche tak thanda ho gaya to ise Aap ki khidmat mein le kar hazir hua. Aap bhi bedar ho chuke thay. Mein ne arz kiya: Doodh pee lijiye. Aap ne itna piya ke mujhe khushi hasil ho gayi, phir mein ne arz kiya ke ab kooch ka waqt ho gaya hai Ya Rasul Allah! Aap Sallallahu Alaihi Wa Sallam ne farmaya haan theek hai, chalo. Chunanche hum aage barhe aur Makkah wale hamari talash mein thay lekin Suraqah bin Malik bin Ju'shum ke siwa hum ko kisi ne nahi paya, woh apne ghore par sawar tha, mein ne ise dekhte hi kaha ke Ya Rasul Allah! Hamara peecha karne wala dushman hamare qareeb aa pahuncha hai. Aap Sallallahu Alaihi Wa Sallam ne farmaya: Fikr na karo. Allah Ta'ala hamare sath hai.

Hum se Muhammad bin Sinan ne bayan kiya, kaha hum se Hammam ne bayan kiya, un se Thabit ne, un se Anas Radi Allahu Anhu ne aur un se Abu Bakr Radi Allahu Anhu ne bayan kiya ke jab hum Ghaar-e-Saur mein chupe thay to mein ne Rasoolullah Sallallahu Alaihi Wa Sallam se arz kiya ke agar mushrikeen ke kisi aadmi ne apne qadmon par nazar dali to woh zaroor hum ko dekh lega. Is par Aap Sallallahu Alaihi Wa Sallam ne farmaya "Ae Abu Bakr! In do ka koi kya bigarh sakta hai jin ke sath teesra Allah Ta'ala hai."

Ibn Shihab ne bayan kiya aur mujhe Abdur Rahman Bin Malik Mudliji ne khabar di, wo Suraqah Bin Malik Bin Jusham ke bhatije hain ke un ke walid ne unhein khabar di aur unhon ne Suraqah Bin Jusham Radi Allahu Anhu ko ye kehte suna ke hamare paas kuffar-e-Quraish ke qasid aaye aur ye pesh kash ki ke Rasul Allah Sallallahu Alaihi Wasallam aur Abu Bakr Radi Allahu Anhu ko agar koi shakhs qatl kar de ya qaid kar laye to ise har ek ke badle mein ek sau oont diye jayein ge. Mein apni qaum Bani Mudlij ki ek majlis mein baitha hua tha ke un ka ek aadmi samne aaya aur hamare qareeb khara ho gaya. Hum abhi baithe hue thay. Us ne kaha Suraqah! Sahil par mein abhi chand saye dekh kar aa raha hoon mera khayal hai ke wo Muhammad aur un ke sathi hi hain (Sallallahu Alaihi Wasallam). Suraqah Radi Allahu Anhu ne kaha mein samajh gaya is ka khayal sahih hai lekin mein ne is se kaha ke wo log nahi hain mein ne falan falan aadmi ko dekha hai hamare samne se isi taraf gaye hain. Is ke baad mein majlis mein thori der aur baitha raha aur phir uthte hi ghar gaya aur laundi se kaha ke mere ghore ko le kar teele ke peeche chali jaye aur wahin mera intezar kare, is ke baad mein ne apna neiza uthaya aur ghar ki pusht ki taraf se bahar nikal aaya mein neize ki nok se zameen par lakeer kheenchna hua chala gaya aur upar ke hisse ko chupaye hue tha. (Suraqah ye sab kuch is liye kar raha tha ke kisi ko khabar na ho warna wo bhi mere inam mein shareek ho jaye ga) mein ghore ke paas aa kar is par sawar hua aur saba raftari ke sath ise le chala, jitni jaldi ke sath bhi mere liye mumkin tha, aakhir mein ne un ko pa hi liya. Isi waqt ghore ne thokar khayi aur mujhe zameen par gira diya. Lekin mein khara ho gaya aur apna hath tarkash ki taraf barhaya is mein se teer nikal kar mein ne faal nikali ke aaya mein unhein nuqsan pahuncha sakta hoon ya nahi. Faal (ab bhi) wo nikli jise mein pasand nahi karta tha. Lekin mein dobara apne ghore par sawar ho gaya aur teeron ke faal ki parwah nahi ki. Phir mera ghora mujhe tezi ke sath douraye liye ja raha tha. Aakhir jab mein ne Rasul Allah Sallallahu Alaihi Wasallam ki qiraat suni, Nabi Kareem Sallallahu Alaihi Wasallam meri taraf koi tawajjo nahi kar rahe thay lekin Abu Bakr Radi Allahu Anhu baar baar murr kar dekhte thay, to mere ghore ke aage ke dono paon zameen mein dhans gaye jab wo takhnon tak dhans gaya to mein is ke upar gir para aur ise uthne ke liye danta mein ne ise uthane ki koshish ki lekin wo apne paon zameen se nahi nikal saka. Bari mushkil se jab is ne poori tarah kharay hone ki koshish ki to is ke aage ke paon se muntashir sa ghubar uth kar dhuwein ki tarah aasman ki taraf charhne laga. Mein ne teeron se faal nikali lekin is martaba bhi wahi faal aayi jise mein pasand nahi karta tha. Is waqt mein ne Nabi Kareem Sallallahu Alaihi Wasallam ko aman ke liye pukara. Meri aawaz par wo log kharay ho gaye aur mein apne ghore par sawar ho kar in ke paas aaya. Un tak bure irade ke sath pahunchne se jis tarah mujhe rok diya gaya tha. Isi se mujhe yaqeen ho gaya tha ke Rasul Allah Sallallahu Alaihi Wasallam ki dawat ghalib aa kar rahe gi. Is liye mein ne Nabi Kareem Sallallahu Alaihi Wasallam se kaha ke aap ki qaum ne aap ke marne ke liye sau oonton ke inam ka ailan kiya hai. Phir mein ne aap ko Quraish ke iradon ki ittila di. Mein ne in hazrat ki khidmat mein kuch tosha aur saman pesh kiya lekin aap Sallallahu Alaihi Wasallam ne ise qabool nahi farmaya mujh se kisi aur cheez ka bhi mutaliba nahi kiya sirf itna kaha ke hamare mutaliq raazdari se kaam lena lekin mein ne arz kiya ke aap mere liye ek aman ki tahreer likh dijiye. Aap Sallallahu Alaihi Wasallam ne Aamir Bin Fuhairah Radi Allahu Anhu ko hukm diya aur unhon ne chamre ke ek ruqqa par tahreer-e-aman likh di. Is ke baad Rasul Allah Sallallahu Alaihi Wasallam aage barhe. Ibn Shihab ne bayan kiya aur unhein Urwah Bin Zubair ne khabar di ke Rasul Allah Sallallahu Alaihi Wasallam ki mulaqat Zubair Radi Allahu Anhu se hui jo musalmanon ke ek tijarati qafila ke sath Sham se wapas aa rahe thay. Zubair Radi Allahu Anhu ne Nabi Kareem Sallallahu Alaihi Wasallam aur Abu Bakr Radi Allahu Anhu ki khidmat mein safaid poshaka pesh ki. Idhar Madinah mein bhi musalmanon ko Nabi Kareem Sallallahu Alaihi Wasallam ki Makkah se hijrat ki ittila ho chuki thi aur ye log rozana subah ko maqam-e-Harrah tak aate aur intezar karte rehte lekin dopahar ki garmi ki wajah se (dopahar ko) unhein wapas jana parta tha. Ek din jab bahut taweel intezar ke baad sab log aa gaye aur apne ghar pahunch gaye to ek Yahudi apne ek mahal par kuch dekhne charha. Us ne Nabi Kareem Sallallahu Alaihi Wasallam aur aap ke sathiyon ko dekha safaid safaid chale aa rahe hain. (Ya tezi se jaldi jaldi aa rahe hain) jitna aap nazdeek ho rahe thay itni hi door se pani ki tarah reeti ka chamakna kam hota jata. Yahudi be-ikhtiyar chilla utha ke ay Arab ke logo! Tumhare ye buzurg sardar aa gaye jin ka tumhein intezar tha. Musalman hathyar le kar dour pare aur Nabi Kareem Sallallahu Alaihi Wasallam ka maqam-e-Harrah par istiqbal kiya. Aap ne un ke sath dahni taraf ka rasta ikhtiyar kiya aur Bani Amr Bin Auf ke muhalla mein qiyam kiya. Ye Rabi-ul-Awwal ka mahina aur Peer ka din tha. Abu Bakr Radi Allahu Anhu logon se milne ke liye kharay ho gaye aur Rasul Allah Sallallahu Alaihi Wasallam khamosh baithe rahe. Ansar ke jin logon ne Rasul Allah Sallallahu Alaihi Wasallam ko is se pehle nahi dekha tha, wo Abu Bakr Radi Allahu Anhu hi ko salam kar rahe thay. Lekin jab Nabi Kareem Sallallahu Alaihi Wasallam par dhoop parne lagi to Abu Bakr Radi Allahu Anhu ne apni chadar se Nabi Kareem Sallallahu Alaihi Wasallam par saya kiya. Is waqt sab logon ne Rasul Allah Sallallahu Alaihi Wasallam ko pehchan liya. Aap Sallallahu Alaihi Wasallam ne Bani Amr Bin Auf mein taqreeban das raaton tak qiyam kiya aur wo masjid (Quba) jis ki buniyad taqwa par qaim hai wo isi dauran mein tameer hui aur aap ne is mein namaz parhi phir (Jumah ke din) Nabi Kareem Sallallahu Alaihi Wasallam apni oontni par sawar hue aur Sahaba bhi aap ke sath paidal rawanah hue. Aakhir aap ki sawari Madinah Munawwarah mein is maqam par aa kar baith gayi jahan ab Masjid-e-Nabwi hai. Is maqam par chand musalman in dinon namaz ada kiya karte thay. Ye jagah Suhail aur Sahl (Radi Allahu Anhuma) do yateem bacchon ki thi aur khajoor ka yahan khaliyan lagta tha. Ye dono bacche Asad Bin Zurarah Radi Allahu Anhu ki parwarish mein thay jab aap ki oontni wahan baith gayi to Rasul Allah Sallallahu Alaihi Wasallam ne farmaya in sha Allah yahi hamare qiyam ki jagah ho gi. Is ke baad aap ne dono yateem bacchon ko bulaya aur un se is jagah ka mamla karna chaha taake wahan masjid tameer ki ja sake. Dono bacchon ne kaha ke nahi ya Rasul Allah! Hum ye jagah aap ko muft de dein ge, lekin Nabi Kareem Sallallahu Alaihi Wasallam ne muft taur par qabool karne se inkar kiya. Zameen ki qeemat ada kar ke le li aur wahin masjid tameer ki. Is ki tameer ke waqt khud Aap Sallallahu Alaihi Wasallam bhi Sahaba Radi Allahu Anhum ke sath eintoon ke dhone mein shareek thay. Eint dhote waqt aap farmate jaate thay ke ”ye bojh Khaibar ke bojh nahi hain balkay is ka ajr o sawab Allah ke yahan baqi rehne wala hai is mein bahut taharat aur paaki hai“ aur Nabi Kareem Sallallahu Alaihi Wasallam dua farmate thay ke ”ay Allah! Ajr to bas Akhirat hi ka hai pas, tu Ansar aur Muhajireen par apni rahmat nazil farma.“ Is tarah aap ne ek musalman shayar ka sher parha jin ka naam mujhe maloom nahi, Ibn Shihab ne bayan kiya ke ahadees se humein ye ab tak maloom nahi hua ke Nabi Kareem Sallallahu Alaihi Wasallam ne is sher ke siwa kisi bhi shayar ke poore sher ko kisi mauqa par parha ho
.

Hum se Abdullah Bin Abi Shaibah ne bayan kiya, kaha hum se Abu Usama ne bayan kiya, kaha hum se Hisham Bin Urwah ne bayan kiya, un se un ke walid aur Fatimah Bint Munzir ne aur un se Asma Radi Allahu Anha ne ke jab Nabi Kareem Sallallahu Alaihi Wasallam aur Abu Bakr Radi Allahu Anhu Madinah hijrat kar ke jaane lage to mein ne aap dono ke liye nashta tayyar kiya. Mein ne apne walid (Abu Bakr Radi Allahu Anhu) se kaha ke mere patke ke siwa aur koi cheez is waqt mere paas aisi nahi jis se mein is nashta ko bandh doon. Is par unhon ne kaha ke phir is ke do tukre kar lo. Chunanche mein ne aisa hi kiya aur is waqt se mera naam Zaat-un-Nitaqain (do patkon wali) ho gaya aur Ibn Abbas Radi Allahu Anhuma ne Asma ko «Zaat-un-Nitaqain» kaha
.

Hum se Muhammad Bin Bashar ne bayan kiya, kaha hum se Ghundar ne bayan kiya, kaha hum se Shuba ne bayan kiya, un se Abu Ishaq ne, kaha mein ne Bara Bin Azib Radi Allahu Anhu se suna, unhon ne bayan kiya jab Nabi Kareem Sallallahu Alaihi Wasallam Madinah ke liye rawanah hue to Suraqah Bin Malik Bin Jusham ne aap ka peecha kiya Nabi Kareem Sallallahu Alaihi Wasallam ne is ke liye baddua ki to is ka ghora zameen mein dhans gaya. Us ne arz kiya ke mere liye Allah se dua kijiye (ke is museebat se najaat de) mein aap ka koi nuqsan nahi karoon ga, aap ne is ke liye dua ki. (Is ka ghora zameen se nikal aaya) Rasul Allah Sallallahu Alaihi Wasallam ko ek martaba raste mein piyas maloom hui itne mein ek charwaha guzra. Abu Bakr Radi Allahu Anhu ne bayan kiya ke phir mein ne ek piyala liya aur is mein (rewar ki ek bakri ka) thora sa doodh doha, wo doodh mein ne aap ki khidmat mein la kar pesh kiya jise aap ne nosh farmaya ke mujhe khushi hasil hui
.

Bara ne bayan kiya ke jab mein Abu Bakr Radi Allahu Anhu ke sath un ke ghar mein dakhil hua tha to aap ki sahibzadi Aisha Radi Allahu Anha leti hui theen unhein bukhar aa raha tha mein ne un ke walid ko dekha ke unhon ne un ke rukhsar par bosa diya aur daryaft kiya beti! Tabiyat kaisi hai?
.

Hum se Musa Bin Ismail ne bayan kiya, kaha hum se Hammam ne bayan kiya, un se Sabit ne, un se Anas Radi Allahu Anhu ne aur un se Abu Bakr Radi Allahu Anhu ne bayan kiya ke mein Nabi Kareem Sallallahu Alaihi Wasallam ke sath ghar mein tha. Mein ne jo sar uthaya to qaum ke chand logon ke qadam (bahar) nazar aaye mein ne kaha, ay Allah ke nabi! Agar in mein se kisi ne bhi neeche jhuk kar dekh liya to wo humein zaroor dekh le ga. Nabi Kareem Sallallahu Alaihi Wasallam ne farmaya ”Abu Bakr! Khamosh raho hum aise do hain jin ka teesra Allah hai.“
.

Hum se Abdullah bin Muhammad bin Jafi ne byaan kiya , kaha hum se Sufyan bin Uyaynah ne byaan kiya , un se Ibn Jurayj ne , un se Ibn Abu Mulaykah ne aur un se Ibn Abbas razi Allahu anhuma ne byaan kiya ke jab mera Abdullah bin Zubayr razi Allahu anhuma se ikhtilaf ho gaya tha to main ne kaha ke un ke walid Zubayr bin Awwam razi Allahu anhu thay , un ki walda Asma bint Abu Bakr razi Allahu anha thien , un ki khala Aisha razi Allahu anha thien . Un ke nana Abu Bakr razi Allahu anhu thay aur un ki dadi (Nabi Karim salla Allahu alaihi wasallam ki phoopi) Safiya razi Allahu anha thien . (Abdullah bin Muhammad ne byaan kiya ke) main ne Sufyan (Ibn Uyaynah) se poocha ke is riwayat ki sanad kya hai ? To unhon ne kehna shuru kiya «haddasana» hum se hadees byaan ki lekin abhi itna hi kehne paye thay ke unhein ek doosre shakhs ne doosri baaton mein laga diya aur (rawi ka naam) Ibn Jurayj woh na byaan kar sake .

Hum se Muhammad bin Salam ne bayan kiya , kaha hum ko Abu Muawiyah ne khabar di , kaha hum se Hisham bin Urwah ne bayan kiya , in se un ke walid ne aur Wahb bin Kaysan ne bayan kiya ke Ahl e Sham (Hajjaj bin Yusuf ke fauji) Sham ke log Abdullah bin Zubayr razi Allahu anhuma ko aar dilane ke liye kehne lage ”ya ibna zhaatin-nitaaqayni“ Ae do kamar-band wali ke bete aur un ki walda , Asmaa razi Allahu anha ne kaha , Ae bete! Yeh tumhein do kamar-band wali ki aar dilate hain , tumhein maloom hai woh kamar-band kiya thay ? Woh mera kamar-band tha jis ke main ne do tukre kar diye thay aur ek tukre se Nabi Karim salla Allahu alaihi wasallam ke bartan ka munh baandha tha aur doosre se dastar-khwan banaya (is mein tosha lapaita) . Wahb ne bayan kiya ke phir jab Abdullah bin Zubayr razi Allahu anhuma ko Ahl e Sham do kamar-band wali ki aar dilate thay , to woh kehte haan . Allah ki qasam! Yeh beshak sach hai aur woh yeh misra parhte «tilka shakaatun zhahira-tun anka aaru-ha» yeh to waisa tana hai jis mein kuch aib nahi hai .

Hum se Ibrahim bin Musa ne bayan kiya, kaha hum ko Hisham bin Urwah ne khabar di, unhein Mamar ne, unhein Zuhri ne, unhein Urwah ne aur in se Aisha razi Allahu anha ne bayan kiya ke bahut se Musalman Habsha Hijrat kar ke chale gaye aur Abu Bakr razi Allahu anhu bhi Hijrat ki tayyariyaan karne lage lekin Nabi Karim salla Allahu alaihi wasallam ne farmaya ke abhi thehar jao kyunke mujhe bhi umeed hai ke mujhe (Hijrat ki) ijazat di jaye gi. Abu Bakr razi Allahu anhu ne arz kiya: kya Aap ko bhi umeed hai? Mera baap Aap par qurban. Nabi Karim salla Allahu alaihi wasallam ne farmaya ke haan. Chunanche Abu Bakr razi Allahu anhu Nabi Karim salla Allahu alaihi wasallam ke saath rehne ke khayal se ruk gaye aur apni do oontniyon ko babool ke patte khila kar char mahine tak unhein khoob tayyar karte rahe. Urwah ne bayan kiya ke Aisha razi Allahu anha ne kaha hum ek din dopehar ke waqt apne ghar mein baithe huay thay ke ek shakhs ne Abu Bakr razi Allahu anhu se kaha Rasool Allah salla Allahu alaihi wasallam sar dhake huay tashreef la rahe hain. Is waqt umooman Nabi Karim salla Allahu alaihi wasallam hamare yahan tashreef nahi laate thay. Abu Bakr razi Allahu anhu ne kaha mere maan baap Nabi Karim salla Allahu alaihi wasallam par qurban hon, Nabi Karim salla Allahu alaihi wasallam aise waqt kisi wajah hi se tashreef la sakte hain. Nabi Karim salla Allahu alaihi wasallam ne makan par pahunch kar ijazat chahi aur Abu Bakr Siddiq razi Allahu anhu ne unhein ijazat di. Nabi Karim salla Allahu alaihi wasallam andar tashreef laaye aur andar dakhil hote hi Abu Bakr razi Allahu anhu se farmaya ke jo log tumhare paas is waqt hain unhein utha do. Abu Bakr Siddiq razi Allahu anhu ne arz ki mera baap Aap par qurban ho ya Rasool Allah! Yeh sab Aap ke ghar hi ke afraad hain. Nabi Karim salla Allahu alaihi wasallam ne farmaya ke mujhe Hijrat ki ijazat mil gayi hai. Abu Bakr Siddiq razi Allahu anhu ne arz ki phir ya Rasool Allah! Mujhe rafaqat ka sharaf haasil rahe ga? Aap ne farmaya ke haan. Arz ki ya Rasool Allah! Mere baap Aap par qurban hon in do oontniyon mein se ek Aap le lein. Nabi Karim salla Allahu alaihi wasallam ne farmaya lekin qeemat se. Aisha razi Allahu anha ne bayan kiya ke phir hum ne bahut jaldi jaldi saman e safar tayyar kiya aur safar ka nashta ek thailay mein rakkha. Asmaa bint Abi Bakr razi Allahu anha ne apne patkay ke ek tukray se thailay ke munh ko baandha. Isi wajah se unhein ”Zhaat-un-Nitaaq“ (patkay wali) kehne lage. Phir Nabi Karim salla Allahu alaihi wasallam aur Abu Bakr razi Allahu anhu Saur naami pahar ki ek ghar mein ja kar chhup gaye aur teen din tak isi mein thehre rahe. Abdullah bin Abi Bakr razi Allahu anhuma raat Aap hazrat ke paas hi guzarte thay. Woh nau-jawan zaheen aur samajhdaar thay. Subah tarke mein wahan se chal dete thay aur subah hote hote Makkah ke Quraish mein pahunch jaate thay. Jaise raat mein Makkah hi mein rahe hon. Makkah Mukarramah mein jo baat bhi in hazrat ke khilaf hoti usay mahfooz rakhte aur joon hi raat ka andhera chha jata Ghar e Saur mein in hazrat ke paas pahunch kar tamam tafseelaat ki ittila dete. Abu Bakr razi Allahu anhu ke mola Aamir bin Fuhairah razi Allahu anhu doodh dene wali bakriyaan churrate thay aur jab raat ka ek hissa guzar jata to in bakriyon ko Ghar e Saur ki taraf haank laate thay. Aap hazrat bakriyon ke doodh par raat guzarte aur subah ki po phat-te hi Aamir bin Fuhairah razi Allahu anhu wahan se rawana ho jaate. In teen raaton mein unhon ne har raat aisa hi kiya.

Hum se Ibrahim bin Musa ne bayan kiya, kaha hum ko Hisham bin Urwah ne khabar di, unhein Mamar ne, in se Zuhri ne (doosri sanad) aur Layth bin Saad ne bayan kiya ke mujhe Aqeel ne bayan kiya, in se Ibn Shihab ne bayan kiya, unhein Urwah bin Zubayr ne khabar di aur in se Nabi Karim salla Allahu alaihi wasallam ki zauja mutahhara Aisha razi Allahu anha ne bayan kiya ke jab main ne hosh sanbhala to apne walidain ko Deen e Islam ka pairo paya aur koi din aisa nahi guzarta tha ke jis mein Rasool Allah salla Allahu alaihi wasallam in ke paas subah o shaam tashreef na laate hon, ek din Abu Bakr razi Allahu anhu (walid majid) ghar mein bhari dopehar mein baithe huay thay ke ek shakhs ne kaha yeh Rasool Allah salla Allahu alaihi wasallam tashreef la rahe hain, yeh aisa waqt tha ke is waqt hamare yahan Nabi Karim salla Allahu alaihi wasallam ke aane ka mamool nahi tha, Abu Bakr razi Allahu anhu bole ke is waqt Nabi Karim salla Allahu alaihi wasallam ka tashreef lana kisi khaas wajah hi se ho sakta hai, phir Nabi Karim salla Allahu alaihi wasallam ne farmaya ke mujhe Makkah chhorrne ki ijazat mil gayi hai.