Hum se Abul Yaman ne bayan kiya, kaha hum ko Shuaib ne khabar di, unhein Zuhri ne, kaha hum se Saeed Bin Musayyib ne bayan kiya aur un se Abu Hurairah (Radi Allahu Anhu) ne ke Rasul Allah (Sallallahu Alaihi Wasallam) ne farmaya ke mujhe hukm diya gaya hai ke mein logon se is waqt tak jung karta rahun yahan tak ke wo is ka iqrar kar lein ke Allah ke siwa aur koi mabood nahi, pas jis ne iqrar kar liya ke Allah ke siwa aur koi mabood nahi to is ki jaan aur maal hum se mahfooz hai siwa is haqq ke jis ki bina par qanoonan is ki jaan o maal zadd mein aaye aur is ka hisab Allah ke zimme hai. Is ki riwayat Umar aur Ibn Umar (Radi Allahu Anhuma) ne bhi Nabi Kareem (Sallallahu Alaihi Wasallam) se ki hai
.

Is Hadees ko hum se Abdullah bin Muhammed Musnadi ne bayan kiya, un se Abu Rauh Harami bin Umaarah ne, un se Sho’bah ne, woh Waaqid bin Muhammed se riwayat karte hain, woh kehte hain main ne yeh Hadees apne baap se suni, woh Ibn-e-Umar Radhiallahu Anhuma se riwayat karte hain ke Rasoolulllah Sallallahu Alaihi Wasallam ne farmaaya, mujhe (Allah ki taraf se) hukm diya gaya hai ke logon se jung karun us waqt tak ke woh is baat ka iqraar kar len ke Allah ke siwa koi ma’bood nahi hai aur yeh ke Muhammed Sallallahu Alaihi Wasallam Allah ke sachche Rasool hain aur namaz ada karne lagen aur zakaat den, jis waqt woh yeh karne lagenge to mujh se apne jaan-o-maal ko mehfooz kar lenge, siwaaye Islam ke haq ke. (raha un ke dil ka haal to) un ka hisaab Allah ke zimme hai.

Ibn Abi Maryam ne kaha, humein Yahya bin Ayyub ne khabar di, unhon ne kaha hum se Humaid ne hadees bayan kiya, unhon ne kaha hum se Anas bin Malik Razi Allah Anhu ne Nabi Kareem Sallallahu Alaihi Wasallam se naqal kar ke hadees bayan ki. Ali bin Abdullah bin Madini ne farmaya ke hum se Khalid bin Haris ne bayan kiya, unhon ne kaha hum se Humaid Taweel ne bayan kiya, unhon ne kaha ke Maimun bin Siyah ne Anas bin Malik Razi Allah Anhu se poocha ke Ae Abu Hamzah! Aadmi ki jaan aur maal par ziyaadati ko kya cheezin haram karti hain? To unhon ne farmaya ke jis ne gawahi di ke Allah ke siwa koi mabood nahi aur hamare qibla ki taraf munh kiya aur hamari namaz ki tarah namaz padhi aur hamare zabiha ko khaya to woh musalman hai. Phir us ke wahi huqooq hain jo aam musalmanon ke hain aur us ki wahi zimmedariyan hain jo aam musalmanon par hain.

Is par Abu Bakr Siddiq razi Allahu anhu ne jawab diya ke qasam Allah ki main har us shakhs se jang karoon ga jo zakat aur namaaz mein tafreeq kare ga . (Yani namaaz to parhe magar zakat ke liye inkar kar de) kyunke zakat maal ka haq hai . Allah ki qasam! Agar unhon ne zakat mein chaar mahine ki (bakri ke) bacche ko dene se bhi inkar kiya jisay woh Rasool Allah salla Allahu alaihi wasallam ko dete thay to main un se laroon ga . Umar razi Allahu anhu ne farmaya ke bakhuda yeh baat is ka natija thi ke Allah Ta'ala ne Abu Bakr razi Allahu anhu ka seena Islam ke liye khool diya tha aur baad mein , main bhi is natija par puhancha ke Abu Bakr razi Allahu anhu hi haq par thay .

Hum se Yahya bin Bukayr ne bayan kiya, kaha hum se Layth bin Saad ne, unhon ne Aqeel se, unhon ne Ibn Shihab ne, unhon ne kaha mujhko Ubaidullah bin Abdullah bin Utbah ne khabar di ke Abu Hurairah razi Allahu anhu ne kaha jab Nabi Karim salla Allahu alaihi wasallam ki wafat ho gayi aur Abu Bakr Siddiq razi Allahu anhu khaleefa bane aur Arab ke kuch log kafir ban gaye to Umar razi Allahu anhu ne in se kaha tum in logon se kaise laro ge Nabi Karim salla Allahu alaihi wasallam ne to yeh farmaya hai mujhko logon se larnay ka is waqt tak hukm hua jab tak woh Laa ilaaha illallaah na kahein phir jis ne Laa ilaaha illallaah keh liya us ne apne maal aur apni jaan ko mujh se bacha liya albatta kisi haq ke badle is ki jaan ya maal ko nuqsan pahunchaya jaye to yeh aur baat hai. Ab is ke دل mein kiya hai is ka hisab lene wala Allah hai.

Hum se Qutaybah bin Saeed ne bayan kiya, kaha hum se Layth bin Saad ne bayan kiya, in se Aqeel ne, in se Zuhri ne, unhein Ubaidullah bin Abdullah bin Utbah ne khabar di, in se Abu Hurairah razi Allahu anhu ne bayan kiya ke jab Nabi Karim salla Allahu alaihi wasallam ki wafat hui aur Aap ke baad Abu Bakr razi Allahu anhu ko khaleefa banaya gaya aur Arab ke kai qabail phir gaye. Abu Bakr razi Allahu anhu ne in se larna chaha to Umar razi Allahu anhu ne Abu Bakr razi Allahu anhu se kaha ke Aap logon se kis buniyaad par jang karein ge jabke Nabi Karim salla Allahu alaihi wasallam ne yeh farmaya tha ke mujhe hukm diya gaya hai ke logon se is waqt tak jang karoon jab tak woh kalma Laa ilaaha illallaah ka iqrar na kar lein pas jo shakhs iqrar kar le ke Laa ilaaha illallaah to meri taraf se is ka maal aur is ki jaan mahfooz hai. Albatta kisi haq ke badal ho to woh aur baat hai (maslan kisi ka maal maar le ya kisi ka khoon kare) ab is ke baaqi aamal ka hisab Allah ke hawale hai lekin Abu Bakr razi Allahu anhu ne kaha ke wallah! main to is shakhs se jang karoon ga jis ne namaz aur zakat mein farq kiya hai kyunke zakat maal ka haq hai, wallah! agar woh mujhe ek rasi bhi dene se rukein ge jo woh Rasool Allah salla Allahu alaihi wasallam ko dete thay to main in se in ke inkar par bhi jang karoon ga. Umar razi Allahu anhu ne kaha phir jo main ne ghaur kiya to mujhe yaqeen ho gaya ke Allah Ta'ala ne Abu Bakr razi Allahu anhu ke dil mein larayi ki tajveez daali hai to main ne jaan liya ke woh haq par hain. Abu Bukayr aur Abdullah bin Salih ne Layth se «anaaqan» (ki bajaye «uqalan») kaha yani bakri ka bacha aur yahi zyada sahih hai.