Hum se Ismail ne yeh Hadees bayan ki, woh kehte hain un se Maalik ne, woh Amr bin Yahya Al-Maazini se naql karte hain, woh apne baap se riwayat karte hain aur woh Abu Sa’eed Khudri Radhiallahu Anhu aur woh Nabi Akram Sallallahu Alaihi Wasallam se naql karte hain ke Aap Sallallahu Alaihi Wasallam ne farmaaya jab jannati jannat mein aur dozakhi dozakh mein daakhil ho jaayenge. Allah paak farmaayega, jis ke dil mein raayi ke daane ke barabar (bhi) imaan ho, us ko bhi dozakh se nikaal lo. Tab (aise log) dozakh se nikaal liye jaayenge aur woh jal kar koile ki tarah siyaah ho chuke honge. Phir zindagi ki nehar mein ya baarish ke paani mein daale jaayenge. (Yahan rawi ko shak ho gaya hai ke upar ke rawi ne kaun sa lafz istemaal kiya) us waqt woh daane ki tarah ug aayenge jis tarah nadi ke kinaare daane ug aate hain. Kya tum ne nahi dekha ke daana zardi maail pech-dar-pech nikalta hai. Wuhaib ne kaha ke hum se Amr ne ( «‏‏‏‏حياء» ki bajaaye) «حياة» , aur ( «خَرْدَلٍ مِنْ إِيمَانٍ») ki bajaaye ( «خَرْدَلٍ مِنْ خَيْرٍ») ka lafz bayan kiya.

Hum se Muslim bin Ibrahim ne bayan kiya, un se Hishaam ne, un se Qatadah ne Anas ke waaste se naql kiya, woh Rasoolullah Sallallahu Alaihi Wasallam se riwayat karte hain ke Aap Sallallahu Alaihi Wasallam ne farmaaya jis shakhs ne «لاَ إِلَهَ إِلاَّ اللَّهُ» keh liya aur us ke dil mein jaw barabar bhi (imaan) hai to woh (ek na ek din) dozakh se zaroor niklega aur dozakh se woh shakhs (bhi) zaroor niklega jis ne Kalimah padha aur us ke dil mein gehun ke daane barabar khair hai aur dozakh se woh (bhi) niklega jis ne Kalimah padha aur us ke dil mein ek zarrah barabar bhi khair hai. Abu Abdullah (Imam Bukhari Rahimahullah) farmaate hain ke Abaan ne bariwayat-e-Qatadah bawaasta-e-Anas Radhiallahu Anhu Rasool Sallallahu Alaihi Wasallam se «خَيْر» ki jagah «إِيمَان» ka lafz naql kiya hai.

Mujh se Ishaq Bin Nasr ne bayan kiya, hum se Muhammad Bin Ubaid ne bayan kiya, hum se Abu Hayyan Yahya Bin Said ne bayan kiya, un se Abu Zur'a ne aur un se Abu Hurairah (Radi Allahu Anhu) ne bayan kiya ke hum Nabi Kareem (Sallallahu Alaihi Wasallam) ke sath ek dawat mein shareek thay. Aap (Sallallahu Alaihi Wasallam) ki khidmat mein dasti ka gosht pesh kiya gaya jo Aap (Sallallahu Alaihi Wasallam) ko bahut marghoob tha. Aap (Sallallahu Alaihi Wasallam) ne is dasti ki haddi ka gosht danto se nikal kar khaya. Phir farmaya ke mein qiyamat ke din logon ka sardar hoon ga. Tumhein maloom hai ke kis tarah Allah Ta'ala (qiyamat ke din) tamam makhluq ko ek chateel maidan mein jama karega? Is tarah ke dekhne wala sab ko ek sath dekh sakega. Awaz dene wale ki awaz har jagah suni ja sakegi aur sooraj bilkul qareeb ho jaye ga. Ek shakhs apne qareeb ke doosre shakhs se kahega, dekhte nahi ke sab log kaisi pareshani mein mubtala hain? Aur musibat kis hadd tak pahunch chuki hai? Kyun na kisi aise shakhs ki talash ki jaye jo Allah Paak ki bargah mein hum sab ki shafa'at ke liye jaye. Kuch logon ka mashwara ho ga ke dada Aadam Alaihis Salam is ke liye munasib hain. Chunanche log un ki khidmat mein hazir honge aur arz kareinge, Ae bawa Aadam! Aap insano ke dada hain. Allah Paak ne aap ko apne hath se paida kiya tha, apni rooh aap ke andar phoonki thi, malaika ko hukm diya era tha aur unhon ne aap ko sajda kiya tha aur jannat mein aap ko (paida karne ke baad) thehraya tha. Aap apne Rabb ke huzoor mein hamari shafa'at kar dein. Aap khud mulahiza farma sakte hain ke hum kis darja uljhan aur pareshani mein mubtala hain. Wo farmayeinge ke (gunah-garon par) Allah Ta'ala aaj is darja ghazabnak hai ke kabhi itna ghazabnak nahi hua tha aur na aainda kabhi ho ga aur mujhe pehle hi darakht (jannat) ke khane se mana kar chuka tha lekin mein is farman ko baja lane mein kotahi kar gaya. Aaj to mujhe apni hi padi hai (nafsi nafsi) tum log kisi aur ke paas jao. Haan, Nooh Alaihis Salam ke paas jao. Chunanche sab log Nooh Alaihis Salam ki khidmat mein hazir honge aur arz kareinge, Ae Nooh Alaihis Salam! Aap (Aadam Alaihis Salam ke baad) roye zameen par sab se pehle nabi hain aur Allah Ta'ala ne aap ko 'abdan shakooran' keh kar pukara hai. Aap mulahiza farma sakte hain ke aaj hum kaisi musibat-o-pareshani mein mubtala hain? Aap apne Rabb ke huzoor mein hamari shafa'at kar dijiye. Wo bhi yahi jawab dein ge ke mera Rabb aaj is darja ghazabnak hai ke is se pehle kabhi aisa ghazabnak nahi hua tha aur na kabhi is ke baad itna ghazabnak ho ga. Aaj to mujhe khud apni hi fikr hai. (nafsi nafsi) tum Nabi Kareem (Sallallahu Alaihi Wasallam) ki khidmat mein jao chunanche wo log mere paas aayeinge. Mein (un ki shafa'at ke liye) arsh ke neeche sajde mein gir padoon ga. Phir awaz aaye gi, Ae Muhammad! Sarr uthao aur shafa'at karo, tumhari shafa'at qabool ki jaye gi. Maango tumhein diya jaye ga. Muhammad Bin Ubaidullah ne bayan kiya ke saari hadees mein yaad na rakh saka
.

Hum se Ishaq Bin Ibrahim Bin Nasr ne bayan kiya, kaha hum se Abu Usama ne bayan kiya, un se Abu Hayyan ne, un se Abu Zur'a ne bayan kiya aur un se Abu Hurairah (Radi Allahu Anhu) ne bayan kiya ke Nabi Kareem (Sallallahu Alaihi Wasallam) ki khidmat mein ek martaba gosht pesh kiya gaya to Aap (Sallallahu Alaihi Wasallam) ne farmaya ke Allah Ta'ala qiyamat ke din awwaleen-o-aakhireen ko ek hamwar aur wasee maidan mein jama karega, is tarah ke pukarane wala sab ko apni baat suna sakega aur dekhne wala sab ko ek sath dekh sakega (kyunke ye maidan hamwar ho ga, zameen ki tarah goul na ho ga) aur logon se sooraj bilkul qareeb ho jaye ga. Phir Aap (Sallallahu Alaihi Wasallam) ne shafa'at ka zikar kiya ke log Ibrahim Alaihis Salam ki khidmat mein hazir honge aur arz kareinge ke Aap roye zameen par Allah ke nabi aur khaleel hain. Hamare liye apne Rabb ke huzoor mein shafa'at kijiye, phir unhein apne jhoot (tawriya) yaad aa jayeinge aur kaheinge ke aaj to mujhe apni hi fikr hai. Tum log Musa Alaihis Salam ke paas jao. Abu Hurairah (Radi Allahu Anhu) ke sath Anas (Radi Allahu Anhu) ne bhi Nabi Kareem (Sallallahu Alaihi Wasallam) se is hadees ko riwayat kiya hai
.

Hum se Muslim bin Ibrahim ne byaan kiya , kaha hum se Hisham Dastwayi ne byaan kiya , kaha hum se Qatadah ne byaan kiya , un se Anas bin Malik razi Allahu anhu ne Nabi Karim salla Allahu alaihi wasallam se (doosri sanad) aur mujh se Khaleefa bin Khayyat ne byaan kiya , kaha hum se Yazid bin Zuray ne byaan kiya , kaha hum se Saeed ne byaan kiya , in se Qatadah ne aur un se Anas razi Allahu anhu ne ke Nabi Karim salla Allahu alaihi wasallam ne farmaya ”Momineen Qayamat ke din pareshan ho kar jama hon ge aur (aapas mein) kahein ge , behtar yeh tha ke apne Rabb ke huzoor mein aaj kisi ko hum apna sifarshi banate . Chunanche sab log Adam alaihissalam ki khidmat mein hazir hon ge aur arz karein ge ke Aap insanon ke baap hain . Allah Ta'ala ne Aap ko apne hath se banaya . Aap ke liye farishton ko sajda ka hukm diya aur Aap ko har cheez ke naam sikhaye . Aap hamare liye apne Rabb ke huzoor mein sifarish kar dein taake aaj ki museebat se hamain najat mile . Adam alaihissalam kahein ge , main is ke laiyq nahi hoon , woh apni laghzish ko yaad karein ge aur un ko Parvardigar ke huzoor mein jaane se sharam aaye gi . Kahein ge ke tum log Nuh alaihissalam ke paas jao . Woh sab se pehle Nabi hain jinhein Allah Ta'ala ne (mere baad) zameen walon ki taraf maboos kiya tha . Sab log Nuh alaihissalam ki khidmat mein hazir hon ge . Woh bhi kahein ge ke main is qabil nahi aur woh apne Rabb se apne sawal ko yaad karein ge jis ke mutalliq unhein koi ilm nahi tha . Un ko bhi sharam aaye gi aur kahein ge ke Allah ke Khaleel alaihissalam ke paas jao . Log un ki khidmat mein hazir hon ge lekin woh bhi yahi kahein ge ke main is qabil nahi , Musa alaihissalam ke paas jao , un se Allah Ta'ala ne kalam farmaya tha aur Taurat di thi . Log un ke paas aayein ge lekin woh bhi uzr kar dein ge ke mujh mein is ki jurat nahi . Un ko baghair kisi haq ke ek shakhs ko qatl karna yaad aa jaye ga aur apne Rabb ke huzoor mein jate huay sharam daman-geer ho gi . Kahein ge tum Esa alaihissalam ke paas jao , woh Allah ke bande aur us ke Rasool , is ka kalma aur is ki rooh hain lekin Esa alaihissalam bhi yahi kahein ge ke mujh mein is ki himmat nahi , tum Muhammad salla Allahu alaihi wasallam ke paas jao , woh Allah ke maqbool bande hain aur Allah ne un ke tamam agle aur pichhle gunah maaf kar diye hain . Chunanche log mere paas aayein ge , main un ke saath jaon ga aur apne Rabb se ijazat chahoon ga . Mujhe ijazat mil jaye gi , phir main apne Rabb ko dekhte hi sajda mein gir parroon ga aur jab tak Allah chahe ga main sajda mein rahoon ga , phir mujh se kaha jaye ga ke apna sar uthao aur jo chaho maango , tumhein diya jaye ga , jo chaho kaho tumhari baat suni jaye gi . Shafaat karo , tumhari shafaat qabool ki jaye gi . Main apna sar uthaoon ga aur Allah ki woh hamd byaan karoon ga jo mujhe is ki taraf se sikhayi gayi ho gi . Is ke baad shafaat karoon ga aur mere liye ek had muqarrar kar di jaye gi . Main unhein jannat mein dakhil karaoon ga chauthi martaba jab main wapas aaoon ga to arz karoon ga ke jahannum mein in logon ke siwa aur koi ab baqi nahi raha jinhein Quran ne hamesha ke liye jahannum mein rehna zaroori qarar de diya hai . Abu Abdullah Imam Bukhari rahmahullah ne kaha ke Quran ki roo se dozakh mein qaid rehne se murad woh log hain jin ke liye «khalideena feeha» kaha gaya hai . Ke woh hamesha dozakh mein rahein ge .

Mujh se Muhammad bin Abdul Aziz ne byaan kiya , kaha hum se Abu Amr Hafs bin Maysarah ne byaan kiya , un se Zayd bin Aslam ne , un se Ata bin Yasar aur un se Abu Saeed Khudri razi Allahu anhu ne byaan kiya ke kuch sahabah razi Allahu anhum ne Rasool Allah salla Allahu alaihi wasallam ke zamana mein Aap salla Allahu alaihi wasallam se poocha: ya Rasool Allah! Kya Qayamat ke din hum apne Rabb ko dekh sakein ge ? Aap salla Allahu alaihi wasallam ne farmaya ke haan , kya sooraj ko dopahar ke waqt dekhne mein tumhein koi dushwari hoti hai , jabke is par baadal bhi na ho ? Sahabah razi Allahu anhum ne arz kiya ke nahi . Phir Aap salla Allahu alaihi wasallam ne farmaya aur kya chaudhween raat ke chaand ko dekhne mein tumhein kuch dushwari pesh aati hai , jabke is par baadal na ho ? Sahabah razi Allahu anhum ne arz kiya ke nahi . Phir Aap salla Allahu alaihi wasallam ne farmaya ke bas isi tarah tum bila kisi diqqat aur rukawat ke Allah Ta'ala ko dekho ge . Qayamat ke din ek munadi nida kare ga ke har ummat apne jhoote maboodon ke saath hazir ho jaye . Is waqt Allah ke siwa jitne bhi buton aur pattharon ki pooja hoti thi , sab ko jahannum mein jhonk diya jaye ga . Phir jab wahi log baqi reh jayein ge jo sirf Allah ki pooja kiya karte thay , khwah naik hon ya gunahgar aur Ahl e Kitab ke kuch log , to pehle Yahud ko bulaya jaye ga aur poocha jaye ga ke tum (Allah ke siwa) kis ki pooja karte thay ? Woh arz karein ge ke Uzair Ibn Allah ki , Allah Ta'ala un se farmaye ga lekin tum jhoote thay , Allah ne na kisi ko apni biwi banaya aur na beta , ab tum kya chahte ho ? Woh kahein ge , hamare Rabb! Hum pyaase hain , hamain pani pila de . Unhein isharah kiya jaye ga ke kya idhar nahi chalte . Chunanche sab ko jahannum ki taraf le jaya jaye ga . Wahan chamakti rait pani ki tarah nazar aaye gi , baaz baaz ke tukre kiye de rahi ho gi . Phir sab ko aag mein daal diya jaye ga . Phir Nasara ko bulaya jaye ga aur un se poocha jaye ga ke tum kis ki ibadat kiya karte thay ? Woh kahein ge ke hum Maseeh Ibn Allah ki ibadat karte thay . Un se bhi kaha jaye ga ke tum jhoote thay . Allah ne kisi ko biwi aur beta nahi banaya , phir un se poocha jaye ga ke kya chahte ho ? Aur un ke saath Yahudiyon ki tarah bartao kiya jaye ga . Yahan tak ke jab in logon ke siwa aur koi baqi na rahe ga jo sirf Allah ki ibadat karte thay , khwah woh naik hon ya gunahgar , to un ke paas un ka Rabb ek surat mein jalwa-gar ho ga , jo pehli surat se jis ko woh dekh chuke hon ge , milti julti ho gi (yeh woh surat na ho gi) ab un se kaha jaye ga . Ab tumhein kis ka intizar hai ? Har ummat apne maboodon ko saath le kar ja chuki , woh jawab dein ge ke hum duniya mein jab logon se (jinon ne kufr kiya tha) juda huay to hum in mein sab se zyada muhtaj thay , phir bhi hum ne un ka saath nahi diya aur ab hamain apne sache Rabb ka intizar hai jis ki hum duniya mein ibadat karte rahe . Allah Ta'ala farmaye ga ke tumhara Rabb main hi hoon . Is par tamam Musalman bol uthein ge ke hum apne Rabb ke saath kisi ko shareek nahi thehrate , do ya teen martaba yun kahein ge hum Allah ke saath kisi ko shareek karne wale nahi hain .

Hum se Muhammad bin Muqatil ne byaan kiya , kaha hum ko Abdullah bin Mubarak ne khabar di , kaha hum ko Abu Hayyan (Yahya bin Saeed) Taymi ne khabar di . Unhein Abu Zurah (Haram) bin Amr bin Jareer ne aur un se Abu Hurairah razi Allahu anhu ne byaan kiya ke Rasool Allah salla Allahu alaihi wasallam ki khidmat mein gosht laya gaya aur dast ka hissa Aap ko pesh kiya gaya . To Aap ne apne daanton se usay ek baar nocha aur Nabi Karim salla Allahu alaihi wasallam ko dast ka gosht bahut pasand tha . Phir Aap salla Allahu alaihi wasallam ne farmaya ke Qayamat ke din main sab logon ka sardar hoon ga tumhein maloom bhi hai yeh kaun sa din ho ga ? Is din duniya ke shuru se Qayamat ke din tak ki saari khalqat ek chateel maidan mein jama ho gi ke ek pukarne wale ki aawaz sab ke kaanon tak pahunch sake gi aur ek nazar sab ko dekh sake gi . Sooraj bilkul qareeb ho jaye ga aur logon ki pareshani aur be-qarari ki koi had na rahe gi jo bardasht se bahar ho jaye gi . Log aapas mein kahein ge , dekhte nahi ke hamari kya halat ho gayi hai . Kya aisa koi maqbool banda nahi hai jo Allah Paak ki bargah mein tumhari shafaat kare ? Baaz log baaz se kahein ge ke Adam alaihissalam ke paas chalna chahiye . Chunanche sab log Adam alaihissalam ki khidmat mein hazir hon ge aur arz karein ge Aap insanon ke par-dada hain , Allah Ta'ala ne Aap ko apne hath se paida kiya aur apni taraf se khusoosiyat ke saath Aap mein rooh phoonki . Farishton ko hukm diya aur unhon ne Aap ko sajda kiya is liye Aap Rabb ke huzoor mein hamari shafaat kar dein , Aap dekh rahe hain ke hum kis haal ko pahunch chuke hain . Adam alaihissalam kahein ge ke mera Rabb aaj intihaayi ghazabnak hai . Is se pehle itna ghazabnak woh kabhi nahi hua tha aur na aaj ke baad kabhi itna ghazabnak ho ga aur Rabb al-Izzat ne mujhe bhi darakht se roka tha lekin main ne is ki nafarmani ki , pas nafsi , nafsi , nafsi mujh ko apni fikr hai tum kisi aur ke paas jao . Haan Nuh alaihissalam ke paas jao . Chunanche sab log Nuh alaihissalam ki khidmat mein hazir hon ge aur arz karein ge , Ae Nuh! Aap sab se pehle paighambar hain jo ahl e zameen ki taraf bheje gaye thay aur Aap ko Allah ne ”shukr-guzar banda“ (abdun shakoorun) ka khitab diya . Aap hi hamare liye apne Rabb ke huzoor mein shafaat kar dein , Aap dekh rahe hain ke hum kis halat ko pahunch gaye hain . Nuh alaihissalam bhi kahein ge ke mera Rabb aaj itna ghazabnak hai ke is se pehle kabhi itna ghazabnak nahi tha aur na aaj ke baad kabhi itna ghazabnak ho ga aur mujhe ek dua ki qabooliyat ka yaqeen dilaya gaya tha jo main ne apni qaum ke khilaf kar li thi . Nafsi , nafsi , nafsi aaj mujh ko apne hi nafs ki fikr hai tum mere siwa kisi aur ke paas jao , Ibrahim alaihissalam ke paas jao . Sab log Ibrahim alaihissalam ki khidmat mein hazir hon ge aur arz karein ge , Ae Ibrahim! Aap Allah ke Nabi aur Allah ke Khaleel hain roo e zameen mein muntakhab , Aap hamari shafaat kijiye , Aap mulahiza farma rahe hain ke hum kis halat ko pahunch chuke hain . Ibrahim alaihissalam bhi kahein ge ke aaj mera Rabb bahut ghazabnak hai ? Itna ghazabnak na woh pehle hua tha aur na aaj ke baad ho ga aur main ne teen jhoot bolay thay (rawi) Abu Hayyan ne apni riwayat mein teenon ka zikr kiya hai . Nafsi , nafsi , nafsi mujh ko apne nafs ki fikr hai . Mere siwa kisi aur ke paas jao . Haan Musa alaihissalam paas ke jao . Sab log Musa alaihissalam ki khidmat mein hazir hon ge aur arz karein ge Ae Musa! Aap Allah ke Rasool hain , Allah Ta'ala ne Aap ko apni taraf se risalat aur apne kalam ke zariye fazeelat di . Aap hamari shafaat apne Rabb ke huzoor mein karein , Aap mulahiza farma sakte hain ke hum kis halat ko pahunch chuke hain . Musa alaihissalam kahein ge ke aaj Allah Ta'ala bahut ghazabnak hai , itna ghazabnak ke woh na pehle kabhi hua tha aur na aaj ke baad kabhi ho ga aur main ne ek shakhs ko qatl kar diya tha , haalan ke Allah ki taraf se mujhe is ka koi hukm nahi mila tha . Nafsi , nafsi , nafsi bas mujh ko aaj apni fikr hai , mere siwa kisi aur ke paas jao . Haan Esa alaihissalam ke paas jao . Sab log Esa alaihissalam ki khidmat mein hazir hon ge aur arz karein ge . Ae Esa! Aap Allah ke Rasool aur is ka kalma hain jise Allah ne Maryam alaihassalam par dala tha aur Allah ki taraf se rooh hain , Aap ne bachpan mein maan ki god hi mein logon se baat ki thi , hamari shafaat kijiye , Aap mulahiza farma sakte hain ke hamari kya halat ho chuki hai . Esa bhi kahein ge ke mera Rabb aaj is darja ghazabnak hai ke na is se pehle kabhi itna ghazabnak hua tha aur na kabhi ho ga aur Aap kisi laghzish ka zikr nahi karein ge (sirf) itna kahein ge , nafsi , nafsi , nafsi mere siwa kisi aur ke paas jao . Haan , Muhammad (salla Allahu alaihi wasallam) ke paas jao . Sab log Nabi Karim salla Allahu alaihi wasallam ki khidmat mein hazir hon ge aur arz karein ge , Ae Muhammad (salla Allahu alaihi wasallam)! Aap Allah ke Rasool aur sab se aakhri paighambar hain aur Allah Ta'ala ne Aap ke tamam agle pichhle gunah maaf kar diye hain , apne Rabb ke darbar mein hamari shafaat kijiye . Aap khud mulahiza farma sakte hain ke hum kis halat ko pahunch chuke hain . Nabi Karim salla Allahu alaihi wasallam ne farmaya ke aakhir main aage barhoon ga aur Arsh tallay pahunch kar apne Rabb azzawajal ke liye sajda mein gir parroon ga , phir Allah Ta'ala mujh par apni hamd aur husn e sana ke darwaze khol de ga ke mujh se pehle kisi ko woh tariqe aur woh mahamid nahi bataye thay . Phir kaha jaye ga , Ae Muhammad! Apna sar uthaiye , maangiye Aap ko diya jaye ga . Shafaat kijiye , Aap ki shafaat qabool ho jaye gi . Ab main apna sar uthaoon ga aur arz karoon ga . Ae mere Rabb! Meri ummat , Ae mere Rabb! Meri ummat par karam kar , kaha jaye ga Ae Muhammad! Apni ummat ke in logon ko jin par koi hisab nahi hai , jannat ke dahne darwaze se dakhil kijiye waise unhein ikhtiyar hai , jis darwaze se chahein doosre logon ke saath dakhil ho sakte hain . Phir Nabi Karim salla Allahu alaihi wasallam ne farmaya ke is zaat ki qasam! Jis ke hath mein meri jaan hai . Jannat ke darwaze ke donon kinaron mein itna fasla hai jitna Makkah aur Himyar mein hai ya jitna Makkah aur Busra mein hai .

Mujh se Ismail bin Aban ne byaan kiya , kaha hum se Abu al-Ahwas (Salam bin Saleem) ne byaan kiya , un se Adam bin Ali ne byaan kiya aur unhon ne Ibn Umar razi Allahu anhuma se suna , unhon ne byaan kiya ke Qayamat ke din ummatein giroh dar giroh chalein gi . Har ummat apne Nabi ke peeche ho gi aur (anbiya se) kahe gi ke Ae falan! Hamari shafaat karo (magar woh sab hi inkar kar dein ge) aakhir shafaat ke liye Nabi Karim salla Allahu alaihi wasallam ki khidmat mein hazir hon ge to yahi woh din hai jab Allah Ta'ala Nabi Karim salla Allahu alaihi wasallam ko Maqam e Mahmood ata farmaye ga .

Hum se Adam ne byaan kiya, kaha hum se Layth ne byaan kiya, in se Khalid bin Yazid ne, un se Saeed bin Abi Hilal ne, un se Zayd bin Aslam ne, un se Ata bin Yasar aur un se Abu Saeed Khudri razi Allahu anhu ne byaan kiya ke main ne Rasool Allah salla Allahu alaihi wasallam se suna, Aap salla Allahu alaihi wasallam farma rahe thay ke hamara Rabb Qayamat ke din apni pindli khole ga is waqt har momin mard aur har momina aurat is ke liye sajda mein gir parrein ge. Sirf woh baqi reh jayein ge jo duniya mein dikhawe aur namwari ke liye sajda karte thay. Jab woh sajda karna chahein ge to un ki peeth takhta ho jaye gi aur woh sajda ke liye na murr sakein ge.

Hum se Musa bin Ismail ne bayan kiya , kaha hum se Wuhaib ne bayan kiya , kaha hamase Amr bin Yahya ne bayan kiya , in se in ke walid ne aur in se Abu Saeed Khudri razi Allahu anhu ne bayan kiya ke Nabi Karim salla Allahu alaihi wasallam ne farmaya ke jab ahal e jannat jannat mein aur ahal e jahannum jahannum mein dakhil ho chukein ge to Allah Ta'ala farmaye ga ke jis ke dil mein raayi ke dane ke barabar bhi iman ho to usay dozakh se nikaal lo . Is waqt aise log nikaale jayein ge aur woh is waqt jal kar kowilay ki tarah ho gaye hon ge . Is ke baad unhein ”Nehar e Hayaat“ (zindagi bakhsh darya) mein dala jaye ga . Is waqt woh is tarah taro-taza aur shagufta ho jayein ge jis tarah saylab ki jagah par koray-karkat ka dana (isi raat ya din mein) ug aata hai ya rawi ne kaha ( «hameel-us-saili» ke bajaye) «hamiy-yat-us-saili» kaha hai . Yani jahan saylab ka zor ho aur Nabi Karim salla Allahu alaihi wasallam ne farmaya ke kya tum ne dekha nahi ke is dane se zard rang ka lipta hua ba-raunaq pauda ugta hai .

Hum se Musaddad bin Musarhad ne bayan kiya , kaha hum se Abu Awanah ne , in se Qatadah ne aur in se Anas razi Allahu anhu ne ke Rasool Allah salla Allahu alaihi wasallam ne farmaya ke Allah Ta'ala Qayamat ke din logon ko jama kare ga . Is waqt log kahein ge ke agar hum apne Rabb ke huzoor mein kisi ki shafa'at le jayein to nafa-bakhsh sabit ho sakti hai . Mumkin hai hum apni is halat se najat pa jayein . Chunanche log Adam alaihissalam ke paas aayein ge aur arz karein ge Aap hi woh buzurg Nabi hain jinhein Allah Ta'ala ne apne hath se banaya aur Aap ke andar apni chhupayi hui rooh phoonki aur farishton ko hukm diya to unhon ne Aap ko sajda kiya , Aap hamare Rabb ke huzoor mein hamari shafa'at karein . Woh kahein ge ke main to is laiq nahi hoon , phir woh apni laghzish yaad karein ge aur kahein ge ke Nooh ke paas jao , woh sab se pehle Rasool hain jinhein Allah Ta'ala ne bheja . Log Nooh alaihissalam ke paas aayein ge lekin woh bhi yahi jawab dein ge ke main is laiq nahi hoon . Woh apni laghzish ka zikr karein ge aur kahein ke tum Ibrahim ke paas jao jinhein Allah Ta'ala ne apna khaleel banaya thu . Log in ke paas aayein ge lekin yeh bhi yahi kahein ge ke main is laiq nahi hoon , apni khata ka zikr karein ge aur kahein ge ke tum log Musa ke paas jao jin se Allah Ta'ala ne kalam kiya thu . Log Musa alaihissalam ke paas jayein ge lekin woh bhi yahi jawab dein ge ke main is laiq nahi hoon , apni khata ka zikr karein ge aur kahein ge ke Esa alaihissalam ke paas jao . Log Esa alaihissalam ke paas jayein ge , lekin yeh bhi kahein ge ke main is laiq nahi hoon , Muhammad salla Allahu alaihi wasallam ke paas jao kyunke in ke tamam agle pichhle gunah maaf kar diye gaye hain . Chunanche log mere paas aayein ge . Is waqt main apne Rabb se (shafa'at ki) ijazat chahoon ga aur sajda mein gir jaoon ga . Allah Ta'ala jitni der tak chahe ga mujhe sajda mein rehne de ga . Phir kaha jaye ga ke apna sar utha lo , maango diya jaye ga , kaho suna jaye ga , shafa'at karo , shafa'at qabool ki jaye gi . Main apne Rabb ki is waqt aaisi hamd bayan karoon ga ke jo Allah Ta'ala mujhe sikhaye ga . Phir shafa'at karoon ga aur mere liye hadd muqarrar kar di jaye gi aur main logon ko jahannum se nikaal kar jannat mein dakhil kar doon ga aur isi tarah sajda mein gir jaoon ga , teesri ya chauthi martaba jahannum mein sirf wahi log baqi reh jayein ge jinhein Quran ne roka hai (yani jin ke jahannum mein hamesha rehne ka zikr Quran mein sarahat ke saath hai) Qatadah rahmahullah is mauqa par kaha karte thay ke is se woh log murad hain jin par jahannum mein hamesha rehna wajib ho gaya hai .

Ata ne bayan kiya ke Abu Saeed Khudri razi Allahu anhu bhi is waqt Abu Hurairah razi Allahu anhu saath baithe huay thay aur unhon ne in ki kisi baat par aitraz nahi kiya lekin jab Abu Hurairah razi Allahu anhu hadees ke is tukre tak pahunche ke tumhari yeh saari khwahishat poori ki jaati hain aur itni hi aur zyada neimatein di jaati hain to Abu Saeed Khudri razi Allahu anhu ne kaha ke main ne Rasool Allah salla Allahu alaihi wasallam se suna thu ke Nabi Karim salla Allahu alaihi wasallam ne farmaye thu ke tumhari yeh saari khwahishat poori ki jaati hain aur is se das guna aur zyada neimatein di jaati hain . Aur Abu Hurairah razi Allahu anhu ne kaha ke nahi main ne yun hi suna hai , yeh sab cheezin aur itni hi aur .

Mujh se Maaz bin Fazhala ne bayan kiya, kaha hum se Hisham Dastawai ne, unhon ne Qatadah bin Da-aama se, unhon ne Anas razi Allahu anhu se ke Nabi Karim salla Allahu alaihi wasallam ne farmaya ”Allah Ta'ala Qayamat ke din isi tarah jaise hum duniya mein jama hote hain, momino ko ikat-tha kare ga (woh garmi waghaira se pareshan ho kar) kahein ge kaash hum kisi ki sifarish apne maalik ke paas le jaate taake hamain apni is halat se aaram milta. Chunanche sab mil kar Adam alaihissalam ke paas aayein ge. In se kahein ge Adam! Aap logon ka haal nahi dekhte kis bala mein giriftar hain. Aap ko Allah Ta'ala ne (khaas) apne hath se banaya aur farishton se Aap ko sajda karaya aur har cheez ke naam Aap ko batlaye (har lughat mein bolna baat karna sikh-laya) kuch sifarish kijiye taake hum logon ko is jagah se najat ho kar aaram mile. Kahein ge main is laiq nahi, un ko woh gunah yaad aa jaye ga jo unhon ne kiya thu (mamnoo darakht mein se khana). (Woh kahein ge) magar tum log aisa karo Nooh alaihissalam Paighambar ke paas jao woh pehle Paighambar hain jin ko Allah Ta'ala ne zameen walon ki taraf bheija thu. Aakhir woh log sab Nooh alaihissalam ke paas aayein ge, woh bhi yahi jawab dein ge, main is laiq nahi apni khata jo unhon ne (duniya mein) ki thi yaad karein ge. Kahein ge tum log aisa karo Paighambar Ibrahim alaihissalam ke paas jao jo Allah ke khaleel hain (log in ke paas jayein ge) woh bhi apni khatayein yaad kar ke kahein ge main is laiq nahi tum Musa alaihissalam Paighambar ke paas jao Allahne un ko Tauraat inayat farmayi, in se bol kar baatein kien. Yeh log Musa alaihissalam ke paas aayein ge woh bhi yahi kahein ge main is laiq nahi apni khata jo unhon ne duniya mein ki ku yaad karein ge magar tum aisa karo Esa alaihissalam Paighambar ke paas jao woh Allah ke bande, us ke Rasool, us ke khaas kalma aur khaas rooh hain. Yeh log Esa alaihissalam ke paas aayein ge woh kahein ge main is laiq nahi tum aisa karo Muhammad salla Allahu alaihi wasallam ke paas jao woh Allah ke aise bande hain jin ki agli pichhli khatayein sab bakhsh di gayi hain. Aakhir yeh sab log jama ho kar meere paas aayein ge. Main chaloon ga aur apne Parvardigar ki bargah mein hazir hone ki ijazat maangoon ga, mujhko ijazat mile gi. Main apne Parvardigar ko dekhte hi sajde mein gir paroon ga aur jab tak us ko manzhur hai woh mujhko sajde hi mein para rehne de ga. Is ke baad hukm ho ga ”Muhammad salla Allahu alaihi wasallam apna sar uthao aur arz karo tumhari arz suni jaye gi tumhari darkhast manzhur ho gi, tumhari sifarish maqbool ho gi is waqt main apne maalik ki aaisi aaisi tareefein karoon ga jo woh mujhko sikha chuka hai. (ya sikh-laye ga) phir logon ki sifarish shuru kar doon ga. Sifarish ki ek hadd muqarrar kar di jaye gi. Main un ko bahisht mein le jaoon ga, phir laut kar apne Parvardigar ke paas hazir hoon ga aur usay dekhte hi sajde mein gir paroon ga jab tak Parvardigar chahe ga mujhko sajde hi mein para rehne de ga. Is ke baad irshad ho ga ”Muhammad apna sar uthao jo tum kaho ge suna jaye ga aur sifarish karo ge to qabool ho gi phir main apne Parvardigar ki aaisi tareefein karoon ga jo Allahne mujhko sikh-layien (ya sikh-laye ga) is ke baad sifarish kar doon ga lekin sifarish ki ek hadd muqarrar kar di jaye gi. Main un ko bahisht mein le jaoon ga phir laut kar apne Parvardigar ke paas hazir hoon ga usay dekhte hi sajde mein gir paroon ga jab tak Parvardigar chahe ga mujhko sajde hi mein para rehne de-ga. Is ke baad irshad ho ga Muhammad apna sar uthao jo tum kaho ge suna jaye ga aur sifarish karo ge to qabool ho gi phir main apne Parvardigar ki aaisi tareefein karoon ga jo Allahne mujhko sikh-layien (ya sikh-laye ga) is ke baad sifarish shuru kar doon ga lekin sifarish ki ek hadd muqarrar kar di jaye gi. Main un ko bahisht mein le jaoon ga phir laut kar apne Parvardigar ke paas hazir hoon ga. Arz karoon ga: ya paak Parvardigar! ab to dozakh mein aise hi log reh gaye hain jo Quran ke bamujib dozakh hi mein hamesha rehne ke laiq hain (yani kafir aur mushrik). Anas razi Allahu anhu ne kaha Nabi Karim salla Allahu alaihi wasallam ne farmaya ke dozakh se woh log nikaal liye jayein ge jinon ne (duniya mein) Laa ilaaha illallaah kaha ho ga aur in ke dil mein ek jau barabar iman ho ga phir woh log bhi nikaal liye jayein ge jinon ne Laa ilaaha illallaah kaha ho ga aur in ke dil mein gehoon barabar iman ho ga. (Gehoon jau se chhota hota hai) phir woh bhi nikaal liye jayein ge jinon ne Laa ilaaha illallaah kaha ho ga aur in ke dil mein cheenty barabar (ya bhangey barabar) iman ho ga.

Ata bin Yazid ne bayan kiya ke Abu Saeed Khudri razi Allahu anhu is waqt Abu Hurairah razi Allahu anhu ke saath maujood thay. In ki hadees ka koi hissa rad nahi karte thay. Albatta jab Abu Hurairah razi Allahu anhu ne kaha ke Allah Ta'ala kahe ga ke ”Yeh aur unhein jaisi tumhein aur milein gi“ to Abu Saeed Khudri razi Allahu anhu ne kaha ke is ke das guna milein gi Ae Abu Hurairah. Abu Hurairah razi Allahu anhu ne kaha ke mujhe Nabi Karim salla Allahu alaihi wasallam ka yahi irshad yaad hai ke ”Yeh aur unhein jaisi aur“ is par Abu Saeed Khudri razi Allahu anhu ne kaha ke main gawahi deta hoon ke Nabi Karim salla Allahu alaihi wasallam se main ne Aap ka yeh irshad yaad kiya hai ke ”Tumhein yeh sab cheezin milein gi aur is se das guna“ aur Abu Hurairah razi Allahu anhu ne farmaya ke yeh shakhs jannat mein sab se aakhri dakhil hone wala ho ga.

Hum se Yahya bin Bukayr ne bayan kiya, kaha hum se Layth bin Saad ne, in se Khalid bin Yazid ne, in se Saeed bin Abi Hilal ne, in se Zayd bin Aslam ne, in se Ata bin Yasar ne aur in se Abu Saeed Khudri razi Allahu anhu ne bayan kiya ke hum ne kaha: ya Rasool Allah! kya hum Qayamat ke din apne Rabb ko dekhein ge? Nabi Karim salla Allahu alaihi wasallam ne daryaft farmaya ke kiya tum ko sooraj aur chaand dekhne mein kuch takleef hoti hai jabke aasman bhi saaf ho? Hum ne kaha ke nahi. Nabi Karim salla Allahu alaihi wasallam ne is par farmaya ke phir apne Rabb ke deedar mein tumhein koi takleef nahi pesh aaye gi jis tarah sooraj aur chaand ko dekhne mein nahi pesh aati. Phir Aap salla Allahu alaihi wasallam ne farmaya ke ek aawaz dene wala aawaz de ga ke har qaum is ke saath jaye jis ki woh pooja kiya karti thi. Chunanche saleeb ke pujari apni saleeb ke saath, buton ke pujari apne buton ke saath, tamam jhoote maboodon ke pujari apne jhoote maboodon ke saath chale jayein ge aur sirf woh log baqi reh jayein ge jo khalis Allah ki ibadat karne wale thay. In mein naik-o-bad donon qism ke Musalman hon ge aur Ahl e Kitab ke kuch baqi-manda log bhi hon ge. Phir dozakh in ke samne pesh ki jaye gi woh aaisi chamak-dar ho gi jaise maidan ka reit hota hai. (jo door se pani maloom hota hai) Phir Yahood se poochha jaye ga ke tum kis ke pooja karte thay. Woh kahein ge ke hum Uzair Ibn Allah ki pooja kiya karte thay. Unhein jawab mile ga ke tum jhoote ho Allah ke na koi biwi hai aur na koi larka. tum kiya chahte ho? Woh kahein ge ke hum pani peena chahte hain ke hamain is se serab kiya jaye. In se kaha jaye ga ke piyo woh is chamakti reit ki taraf pani jaan kar chalein ge aur phir woh jahannum mein daal diye jayein ge. Phir Nasara se kaha jaye ga ke tum kis ki pooja karte thay? Woh jawab dein ge ke hum Maseeh Ibn Allah ki pooja karte thay. In se kaha jaye ga ke tum jhoote ho. Allah ke na biwi thi aur na koi bacha, abtum kiya chahte ho? Woh kahein ge ke hum chahte hain ke pani se serab kiye jayein. In se kaha jaye ga ke piyo (un ko bhi is chamakti reit ki taraf chalaya jaye ga) aur unhein bhi jahannum mein daal diya jaye ga. Yahan tak ke wahi baqi reh jayein ge jo khalis Allah ki ibadat karte thay, naik-o-bad donon qism ke Musalman, in se kaha jaye ga ke tum log kyun ruke huay ho jabke sab log ja chuke hain? Woh kahein ge hum duniya mein in se aise waqt juda huay ke hamain in ki dunyawi faidon ke liye bahut zyada zaroorat thi aur hum ne ek aawaz dene wale ko suna hai ke har qaum is ke saath ho jaye jis ki woh ibadat karti thi aur hum apne Rabb ke muntazhir hain. Bayan kiya ke phir Allah Jabbar in ke samne is surat ke alawa doosri surat mein aaye ga jis mein unhon ne usay pehli martaba dekha ho ga aur kahe ga ke main tumhara Rabb hoon! Log kahein ge ke tu hi hamara Rabb hai aur is din ambiya ke siwa aur koi baat nahi kare ga. Phir poochhe ga: kiya tumhein is ki koi nishani maloom hai? Woh kahein ge ke «saaqun» pindli, phir Allah Ta'ala apni pindli khole ga aur har momin is ke liye sajda mein gir jaye ga. Sirf woh log baqi reh jayein ge jo dikhawe aur shuhrat ke liye usay sajda karte thay, woh bhi sajda karna chahein ge lekin in ki peeth takhta ki tarah ho kar reh jaye gi. Phir unhein pul par laya jaye ga. Hum ne poochha: ya Rasool Allah! pul kiya cheez hai? Aap salla Allahu alaihi wasallam ne farmaya, woh ek phisalwan girne ka maqam hai is par sansniyan hain, aankre hain, choure choure kaante hain, in ke sar kham-dar Saadan ke kaanton ki tarah hain jo Najd ke mulk mein hote hain. Momin is par palak maarne ki tarah, bijli ki tarah, hawa ki tarah, teiz-raftar ghore aur sawari ki tarah guzar jayein ge. In mein baaz to sahih-salamat najat paane wale hon ge aur baaz jahannum ki aag se jhulsa kar bach nikalne wale hon ge yahan tak ke aakhri shakhs is par se ghisat-te huay guzre gatum log aaj ke din apna haq lene ke liye jitna taqaza aur mutalba mujh se karte ho is se zyada Musalman log Allahسے taqaza aur mutalba karein ge aur jab woh dekhein ge ke apne bhaiyon mein se unhein najat mili hai to woh kahein ge ke Ae hamare Rabb! hamare bhai bhi hamare saath namaz parhte thay aur hamare saath roze rakhte thay aur hamare saath doosre (naik) aamal karte thay (un ko bhi dozakh se najat farma) chunanche Allah Ta'ala farmaye ga ke jao aur jis ke dil mein ek ashrafi ke barabar bhi iman pao usay dozakh se nikaal lo aur Allah in ke chehron ko dozakh par haram kar de ga. Chunanche woh aayein ge aur dekhein ge ke baaz ka to jahannum mein qadam aur aadhi pindli jali hui hai. Chunanche jinhein woh pehchanein ge unhein dozakh se nikaalein ge, phir wapas aayein ge aur Allah Ta'ala in se farmaye ga ke jao aur jis ke dil mein aadhi ashrafi ke barabar bhi iman ho usay bhi nikaal lao. Chunanche jin ko woh pehchante hon ge un ko nikaalein ge. Phir woh wapas aayein ge aur Allah Ta'ala farmaye ga ke jao aur jis ke dil mein zharra barabar iman ho usay bhi nikaal lao. Chunanche pehchane jaane walon ko nikaalein ge. Abu Saeed razi Allahu anhu ne is par kaha ke agartum meri tasdeeq nahi karte to yeh aayat parho «in-nal-laaha laa yazh-limu mis-qaala zharratin wa in taku hasanatan yudhaa-if-haa» ”Allah Ta'ala zharra barabar bhi kisi par zhulm nahi karta.“ Agar naiki hai to usay barhata hai. Phir ambiya aur momineen aur farishte shafa'at karein ge aur Parvardigar ka irshad ho ga ke ab khaas meri shafa'at baqi reh gayi hai. Chunanche Allah Ta'ala dozakh se ek mut-thi bhar le ga aur aise logon ko nikaale ga jo koyla ho gaye hon ge. Phir woh jannat ke sire par ek nehar mein daal diye jayein ge jise Nehar e Aab e Hayat kaha jata hai aur yeh log is ke kinare se is tarah ubhrein ge jis tarah sailab ke koore karkat se sabza ubhar aata hai. tum ne yeh manzhir kisi chattan ke ya kisi darakht ke kinare dekha ho ga to jis par dhoop parti rehti hai woh sabza bharta hai aur jis par saya hota hai woh sufaid ubharta hai. Phir woh is tarah nikaalein ge jaise moti chamakta hai. Is ke baad in ki gardanon par mohar kar di jaye gi (ke yeh Allah ke aazad karda ghulam hain) aur unhein jannat mein dakhil kiya jaye ga. Ahl e jannat unhein «utuqaaa-ur-rahman» kahein ge. Unhein Allahne bila amal ke jo unhon ne kiya ho aur bila khair ke jo in se sadir hui ho jannat mein dakhil kiya hai. Aur in se kaha jaye ga ke tumhein woh sab kuch mile ga jo tum dekhte ho aur itna hi aur bhi mile ga.

`Hum se Yusuf bin Rashid ne bayan kiya, kaha hum se Ahmad bin Abdullah Yarbu'i ne bayan kiya, kaha hum se Abu Bakr bin Ayash ne, un se Humaid ne bayan kiya ke mein ne Anas Radi Allahu Anhu se suna, kaha ke mein ne Nabi Kareem صلی اللہ علیہ وسلم se suna, Aap صلی اللہ علیہ وسلم ne farmaya ke qayamat ke din meri shafa'at qabool ki jaye gi. Mein kahoon ga: ay Rabb! jis ke dil mein rai ke daane ke barabar bhi iman ho is ko bhi jannat mein dakhil farma de. Aise log jannat mein dakhil kar diye jayein ge. Mein phir arz karoon ga: ay Rabb! jannat mein ise bhi dakhil kar de jis ke dil mein mamooli sa bhi iman ho. Anas Radi Allahu Anhu ne kaha ke goya mein is waqt bhi Nabi Kareem صلی اللہ علیہ وسلم ki ungliyon ki taraf dekh raha hoon.

`Hum se Sulaiman bin Harb ne bayan kiya, unhon ne kaha hum se Hammad bin Zaid ne bayan kiya, un se Said bin Hilal al-Anzi ne bayan kiya, unhon ne kaha ke Basra ke kuch log hamare paas jama ho gaye. Phir hum Anas bin Malik Radi Allahu Anhu ke paas gaye aur apne saath Sabit Radi Allahu Anhu ko bhi le gaye taake wo hamare liye shafa'at ki hadees poochein. Anas Radi Allahu Anhu apne mahal mein thay aur jab hum pahunche to wo chasht ki namaz parh rahe thay. Hum ne mulaqat ki ijazat chahi aur humein ijazat mil gayi. Is waqt wo apne bister par baithe thay. Hum ne Sabit se kaha tha ke hadees-e-shafa'at se pehle un se aur kuch na poochna. Chunancha unhon ne kaha: ay Abu Hamza! yeh aap ke bhai Basra se aaye hain aur aap se shafa'at ki hadees poochna chahte hain. Unhon ne kaha ke hum se Muhammad صلی اللہ علیہ وسلم ne bayan kiya, Aap صلی اللہ علیہ وسلم ne farmaya ke qayamat ka din jab aaye ga to log thaathein maarte hue samandar ki tarah zahir hon ge. Phir wo Adam Alaihis Salam ke paas aayein ge aur un se kahein ge ke hamari apne Rabb ke paas shafa'at kijiye. Wo kahein ge ke mein is qabil nahi hoon tum Ibrahim Alaihis Salam ke paas jao, wo Allah ke khaleel hain. Log Ibrahim Alaihis Salam ke paas aayein ge wo bhi kahein ge ke mein is qabil nahi hoon, haan tum Musa Alaihis Salam ke paas jao ke wo Allah se sharaf-e-hum-kalami pane wale hain. Log Musa Alaihis Salam ke paas aayein ge aur wo bhi kahein ge ke mein is qabil nahi hoon, albatta tum Isa Alaihis Salam ke paas jao ke wo Allah ki rooh aur is ka kalma hain. Chunancha log Isa Alaihis Salam ke paas aayein ge wo bhi kahein ge ke mein is qabil nahi hoon, haan tum Muhammad صلی اللہ علیہ وسلم ke paas jao. Log mere paas aayein ge aur mein kahoon ga ke mein shafa'at ke liye hoon aur phir mein apne Rabb se ijazat chahoon ga aur mujhe ijazat di jaye gi aur Allah Ta'ala tareefon ke alfaz mujhe ilham kare ga jin ke zariya mein Allah ki hamd bayan karoon ga jo is waqt mujhe yaad nahi hain. Chunancha jab mein yeh tareefein bayan karoon ga Allah ke huzoor mein sajda karne wala ho jaoon ga to mujh se kaha jaye ga: ay Muhammad! apna sar uthao, jo kaho wo suna jaye ga, jo mango ge wo diya jaye ga, jo shafa'at karo ge qabool ki jaye gi. Phir mein kahoon ga: ay Rabb! meri ummat, meri ummat, kaha jaye ga ke jao aur in logon ko dozakh se nikal lo jin ke dil mein zarra ya rai barabar bhi iman ho. Chunancha mein jaoon ga aur aisa hi karoon ga. Phir mein lautoon ga aur yahi tareefein phir karoon ga aur Allah ke liye sajda mein chala jaoon ga mujh se kaha jaye ga. Apna sar uthao kaho, Aap ki suni jaye gi, mein kahoon ga: ay Rabb! meri ummat, meri ummat. Allah Ta'ala farmaye ga: jao aur jis ke dil mein ek rai ke daane ke kam se kam-tar hissa ke barabar bhi iman ho ise bhi jahannum se nikal lo. Phir mein jaoon ga aur nikaloong ga. Phir jab hum Anas Radi Allahu Anhu ke paas se nikle to mein ne apne baaz sathiyon se kaha ke humein Imam Hasan Basri ke paas bhi chalna chahiye, wo is waqt Abu Khalifa ke makan mein thay aur un se wo hadees bayan karni chahiye jo Anas Radi Allahu Anhu ne hum se bayan ki hai. Chunancha hum un ke paas aaye aur unhein salam kiya. Phir unhon ne humein ijazat di aur hum ne un se kaha: ay Abu Said! hum aap ke paas aap ke bhai Anas bin Malik Radi Allahu Anhu ke yahan se aaye hain aur unhon ne hum se jo shafa'at ke mutalliq hadees bayan ki, is jaisi hadees hum ne nahi suni, unhon ne kaha ke bayan karo. Hum ne un se hadees bayan ki jab is maqaam tak pahunche to unhon ne kaha ke aur bayan karo, hum ne kaha ke is se zyada unhon ne nahi bayan ki. Unhon ne kaha ke Anas Radi Allahu Anhu jab sehat mand thay, bees saal ab se pehle to unhon ne mujh se yeh hadees bayan ki thi. Mujhe maloom nahi ke wo baqi bhool gaye ya is liye bayan karna napasand kiya ke kahin log bharosa na kar baithein. Hum ne kaha Abu Said! phir hum se wo hadees bayan kijiye. Aap is par hanse aur farmaya: insan bada jald-baaz paida kiya gaya hai. Mein ne is ka zikr hi is liye kiya hai ke tum se bayan karna chahta hoon. Anas Radi Allahu Anhu ne mujh se isi tarah hadees bayan ki jis tarah tum se bayan ki (aur is mein yeh lafz aur barhaye) Nabi Kareem صلی اللہ علیہ وسلم ne farmaya ke phir mein chauthi martaba lautoon ga aur wahi tareefein karoon ga aur Allah ke liye sajda mein chala jaoon ga. Allah farmaye ga: ay Muhammad! apna sar uthao, jo kaho ge suna jaye ga, jo mango ge diya jaye ga, jo shafa'at karo ge qabool ki jaye gi. Mein kahoon ga: ay Rabb! mujhe un ke bare mein bhi ijazat dijiye jinhon ne La ilaha illallahu kaha hai. Allah Ta'ala farmaye ga meri izzat, Mere jalal, Meri kibriyai, Meri badayi ki qasam! is mein se (Mein) unhein bhi nikaloong ga jinhon ne kalma La ilaha illallahu kaha hai.

`Hum se Muslim bin Ibrahim ne bayan kiya, unhon ne kaha hum se Hisham ne bayan kiya, unhon ne kaha hum se Qatada ne bayan kiya, un se Anas Radi Allahu Anhu ne bayan kiya ke Rasul Allah صلی اللہ علیہ وسلم ne farmaya ”Iman wale qayamat ke din jama kiye jayein ge aur wo kahein ge ke kash koi hamari shafa'at karta taake hum apni is halat se najat pate, chunancha wo Adam Alaihis Salam ke paas aayein ge aur kahein ge ke aap Adam hain insaanon ke pardada. Allah ne aap ko apne haath se paida kiya, aap ko sajda karne ka farishton ko hukm diya aur har cheez ke naam aap ko sikhaye pas aap apne Rabb ke huzoor mein hamari shafa'at karein, aap jawab dein ge ke mein is qabil nahi hoon aur aap apni galti unhein yaad dilayein ge jo aap se sarzad hui thi.“