Mujh se Muhammad Bin Salam ne bayan kiya. Unhon ne kaha humein Abda Bin Suleiman ne khabar di, unhein Hisham Bin Urwah ne, unhein un ke walid (Urwah Bin Zubair) ne aur unhein Umm-ul-Momineen Aisha Siddiqa (Radi Allahu Anha) ne ke Nabi Kareem (Sallallahu Alaihi Wasallam) Ramzan ke aakhri asharay mein aitikaf karte aur farmate ke Ramzan ke aakhri asharay mein Shab-e-Qadr ko talash karo
.

Hum se Qutaibah bin Sa’eed ne bayan kiya, kaha hum se Ismail bin Ja’far ne bayan kiya, unhon ne Hameed se, unhon ne Anas Radhiallahu Anhu se, kaha mujh ko Ubadah bin Saamit ne khabar di ke Nabi Kareem Sallallahu Alaihi Wasallam apne hujre se nikle, logon ko shab-e-Qadr bataana chaahte the (woh kaun si raat hai) itne mein do musalmaan aapas mein lad pade, Aap Sallallahu Alaihi Wasallam ne farmaaya, main to is liye bahar nikla tha ke tum ko shab-e-Qadr batlaaun aur falaan falaan aadmi lad pade to woh mere dil se utha li gayi aur shayad isi mein kuch tumhaari behtari ho. (To ab aisa karo ke) shab-e-Qadr ko Ramadhan ki sattayeeswien, unteeswien aur pachcheeswien raat mein dhoonda karo.

Hum se Musa bin Ismail ne byaan kiya , unhon ne kaha ke hum se Humam bin Yahya ne Yahya bin Abi Kathir se byaan kiya , unhon ne Abu Salamah bin Abdur Rahman se , unhon ne byaan kiya ke main Abu Saeed Khudri razi Allahu anhu ki khidmat mein haazir hua . Main ne arz ki ke falan nakhlastaan mein kyun na chalen seer bhi karenge aur kuch baatein bhi karenge . Chunanchay Aap tashreef le chale . Abu Salamah ne byaan kiya ke main ne raah mein kaha ke shab qadr se mutalliq Aap ne agar kuch Nabi Karim salla Allahu alaihi wasallam se suna hai to usay byaan kijiye . Unhon ne kaha ke Nabi Karim salla Allahu alaihi wasallam ne Ramzan ke pehle ashre mein itikaf kiya aur hum bhi Aap ke saath itikaf mein baith gaye , lekin Jibreel alayhis salam ne aa kar bataya ke Aap jis ki talash mein hain (shab qadr) woh aage hai . Chunanchay Aap ne doosre ashre mein bhi itikaf kiya aur Aap ke saath hum ne bhi . Jibreel alayhis salam dobara aye aur farmaya ke Aap jis ki talash mein hain woh (raat) aage hai . Phir Aap ne beesween Ramzan ki subah ko khutba diya . Aap ne farmaya ke jis ne mere saath itikaf kiya ho woh dobara kare . Kyunke shab qadr mujhe maloom ho gayi lekin main bhool gaya aur woh aakhri ashra ki taaq raaton mein hai aur main ne khud ko keechad mein sajda karte dekha . Masjid ki chhat khajoor ki daaliyon ki thi . Mutla bilkul saaf tha ke itne mein ek patla sa baadal ka tukra aaya aur barsne laga . Phir Nabi Karim salla Allahu alaihi wasallam ne hum ko namaaz parhayi aur main ne Rasool Allah salla Allahu alaihi wasallam ki peshani aur naak par keechad ka asar dekha . Aap ka khwab sachcha ho gaya .

Bohat se sahaba rizwanullahi alaihim ajmaeen ne Nabi Karim salla Allahu alaihi wasallam se apne khwab byaan kiye ke Shab-e-Qadr (Ramazan ki) sattaisveen raat hai . Is par Nabi Karim salla Allahu alaihi wasallam ne farmaya ke main dekh raha hoon ke tum sab ke khwab Ramazan ke aakhri ashray mein (Shab-e-Qadr ke hone par) muttafiq ho gaye hain . Is liye jise Shab-e-Qadr ki talash ho woh Ramazan ke aakhri ashray mein dhoonday .

Hum se Abdullah Bin Yusuf ne bayan kiya, kaha ke hum ko Imam Malik (Rahimahullah) ne khabar di, unhein Nafi ne, aur unhein Abdullah Bin Umar (Radi Allahu Anhuma) ne ke Nabi Kareem (Sallallahu Alaihi Wasallam) ke chand as'hab ko Shab-e-Qadr khwab mein (Ramzan ki) saat aakhri tareekhon mein dikhayi gayi thi. Phir Rasul Allah (Sallallahu Alaihi Wasallam) ne farmaya mein dekh raha hoon ke tumhare sab ke khwab saat aakhri tareekhon par muttafiq ho gaye hain. Is liye jisay is ki talash ho wo isi hafta ki aakhri (taaq) raaton mein talash kare
.

Hum se Maaz Bin Fazala ne bayan kiya kaha ke hum se Hisham ne bayan kiya, un se Yahya Bin Abi Kathir ne, un se Abu Salma ne bayan kiya ke mein ne Abu Saeed Khudri (Radi Allahu Anhu) se poocha, wo mere dost thay, unhon ne jawab diya ke hum Nabi Kareem (Sallallahu Alaihi Wasallam) ke sath Ramzan ke doosre asharay mein aitikaf mein baithe. Phir bees tareekh ki subah ko Nabi Kareem (Sallallahu Alaihi Wasallam) aitikaf se nikle aur humein khutba diya Aap (Sallallahu Alaihi Wasallam) ne farmaya ke mujhe Lailat-ul-Qadr dikhayi gayi, lekin bhula dili gayi ya (Aap ne ye farmaya ke) mein khud bhool gaya. Is liye tum usay aakhri asharay ki taaq raaton mein talash karo. Mein ne ye bhi dekha hai (khwab mein) ke goya mein keechar mein sajda kar raha hoon. Is liye jis ne mere sath aitikaf kiya ho wo phir laut aaye aur aitikaf mein baithe. Khair hum ne phir aitikaf kiya. Is waqt aasman par badalon ka ek tukra bhi nahi tha. Lekin dekhte hi dekhte badal aaya aur barish itni hui ke masjid ki chhat se pani tapak-ne laga jo khajoor ki shakhon se bani hui thi. Phir namaz ki takbeer hui to mein ne dekha ke Rasul Allah (Sallallahu Alaihi Wasallam) keechar mein sajda kar rahe thay. Yahan tak ke keechar ka nishan mein ne Aap (Sallallahu Alaihi Wasallam) ki peshani par dekha
.

Hum se Qutaiba Bin Saeed ne bayan kiya, kaha hum se Ismail Bin Jafar ne bayan kiya, kaha ke hum se Abu Suhail ne bayan kiya, un se un ke baap Malik Bin Aamir ne aur un se Aisha (Radi Allahu Anha) ne ke Rasul Allah (Sallallahu Alaihi Wasallam) ne farmaya, Shab-e-Qadr ko Ramzan ke aakhri asharay ki taaq raaton mein dhoondo
.

Hum se Ibrahim Bin Hamza ne bayan kiya, kaha ke mujh se Abdul Aziz Bin Abi Hazim aur Abdul Aziz Darawardi ne bayan kiya, un se Yazid Bin Had ne, un se Muhammad Bin Ibrahim ne, un se Abu Salma ne aur un se Abu Saeed Khudri (Radi Allahu Anhu) ne ke Nabi Kareem (Sallallahu Alaihi Wasallam) Ramzan ke is asharay mein aitikaf kiya karte jo mahine ke beech mein parta hai. Bees raaton ke guzar jane ke baad jab ikkees-veen tareekh ki raat aati to sham ko aap ghar wapas aa jate. Jo log aap ke sath aitikaf mein hote wo bhi apne gharon mein wapas aa jate. Ek Ramzan mein aap jab aitikaf kiye hue thay to is raat mein bhi (masjid hi mein) muqeem rahe jis mein aap ki aadat ghar aa jane ki thi, phir aap ne logon ko khutba diya aur jo kuch Allah Paak ne chaha, aap ne logon ko is ka hukm diya, phir farmaya ke mein is (doosre) asharay mein aitikaf kiya karta tha, lekin ab mujh par ye zahiran hua ke ab is aakhri asharay mein mujhe aitikaf karna chahiye. Is liye jis ne mere sath aitikaf kiya hai wo apne m'utakaf hi mein thehra rahe aur mujhe ye raat (Shab-e-Qadr) dikhayi gayi lekin phir bhulwa di gayi. Is liye tum log usay aakhri asharay (ki taaq raaton) mein talash karo. Mein ne (khwab mein) apne ko dekha ke is raat keechar mein sajda kar raha hoon. Phir is raat aasman par abr hua aur barish barsi, Nabi Kareem (Sallallahu Alaihi Wasallam) ke namaz parhne ki jagah (chhat se) pani tapak-ne laga. Ye ikkees-veen ki raat ka zikr hai. Mein ne khud apni aankhon se dekha ke Aap (Sallallahu Alaihi Wasallam) subah ki namaz ke baad wapas ho rahe thay. Aur aap ke chehra-e-mubarak par keechar lagi hui thi
.

Hum se Musa Bin Ismail ne bayan kiya, kaha ke hum se Wuhaib Bin Khalid ne bayan kiya, kaha ke hum se Ayyub Sakhtiyani ne bayan kiya, un se Ikrima ne aur un se Ibn Abbas (Radi Allahu Anhuma) ne ke Nabi Kareem (Sallallahu Alaihi Wasallam) ne farmaya, Shab-e-Qadr ko Ramzan ke aakhri asharay mein talash karo, jab nau raatein baqi reh jayein ya panch raatein baqi reh jayein. (Yaani ikkees-veen ya tayeis-veen ya pachees-veen raaton mein Shab-e-Qadr ko talash karo)
.

Hum se Abdullah Bin Abi-al-Aswad ne bayan kiya, kaha ke hum se Abdul Wahid Bin Ziyad ne bayan kiya, un se Asim Bin Suleiman ne bayan kiya, un se Abu Mijlaz aur Ikrima ne, un se Ibn Abbas (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne farmaya Shab-e-Qadr Ramzan ke (aakhri) asharay mein parti hai. Jab nau raatein guzar jayein ya saat baqi reh jayein. Aap (Sallallahu Alaihi Wasallam) ki murad Shab-e-Qadr se thi. Abdul Wahhab ne Ayyub aur Khalid se bayan kiya, un se Ikrima ne aur un se Ibn Abbas (Radi Allahu Anhuma) ne ke Shab-e-Qadr ko chaubees tareekh (ki raat) mein talash karo
.

Hum se Muhammad Bin Muthanna ne bayan kiya, un se Khalid Bin Harith ne bayan kiya, un se Humaid Taweel ne bayan kiya, un se Anas (Radi Allahu Anhu) ne bayan kiya aur un se Ubada Bin Samit (Radi Allahu Anhu) ne bayan kiya ke Rasul Allah (Sallallahu Alaihi Wasallam) humein Shab-e-Qadr ki khabar dene ke liye tashreef la rahe thay ke do musalman aapas mein jhagarrne lage. Is par Aap (Sallallahu Alaihi Wasallam) ne farmaya ke mein aaya tha ke tumhein Shab-e-Qadr bata doon lekin falan falan ne aapas mein jhagarr liya. Pas is ka ilm uttha liya gaya aur umeed yehi hai ke tumhare haqq mein yehi behtar ho ga. Pas ab tum is ki talash (aakhri asharay ki) nau ya saat ya panch (ki raaton) mein kiya karo
.

Hum se Ismail Bin Abi Uwais ne bayan kiya, unhon ne kaha ke mujh se Imam Malik (Rahimahullah) ne bayan kiya, un se Yazid Bin Abdullah Bin Had ne bayan kiya, un se Muhammad Bin Ibrahim Bin Harith Taimi ne bayan kiya, un se Abu Salma Bin Abdur Rahman ne bayan kiya, un se Abu Saeed Khudri (Radi Allahu Anhu) ne bayan kiya ke Nabi Kareem (Sallallahu Alaihi Wasallam) Ramzan ke doosre asharay mein aitikaf kiya karte thay. Ek saal Aap (Sallallahu Alaihi Wasallam) ne inhi dinon mein aitikaf kiya aur jab ikkees-veen tareekh ki raat aayi. Ye wo raat hai jis ki subah Aap (Sallallahu Alaihi Wasallam) aitikaf se bahar aa jate thay, to Aap (Sallallahu Alaihi Wasallam) ne farmaya ke jis ne mere sath aitikaf kiya ho wo ab aakhri asharay mein bhi aitikaf kare. Mujhe ye raat (khwab mein) dikhayi gayi, lekin phir bhula di gayi. Mein ne ye bhi dekha ke isi ki subah ko mein keechar mein sajda kar raha hoon, is liye tum log usay aakhri asharay ki taaq raat mein talash karo, chunanche isi raat barish hui, masjid ki chhat kyunke khajoor ki shakh se bani thi is liye tapakne lagi aur khud mein ne apni aankhon se dekha ke ikkees-veen ki subah ko Rasul Allah (Sallallahu Alaihi Wasallam) ki peshani mubarak par keechar lagi hui thi
.

Mujh se Abdullah Bin Muneer ne bayan kiya, unhon ne Haroon Bin Ismail se suna, unhon ne kaha ke hum se Ali Bin Mubarak ne bayan kiya kaha ke mujh se Yahya Bin Abi Kathir ne bayan kiya, unhon ne kaha ke mein ne Abu Salma Bin Abdur Rahman se suna, unhon ne kaha mein ne Abu Saeed Khudri (Radi Allahu Anhu) se suna, mein ne un se poocha tha ke kya aap ne Rasul Allah (Sallallahu Alaihi Wasallam) se Shab-e-Qadr ka zikr suna hai ? Unhon ne kaha ke han! hum ne Rasul Allah (Sallallahu Alaihi Wasallam) ke sath Ramzan ke doosre asharay mein aitikaf kiya tha, Abu Saeed (Radi Allahu Anhu) ne bayan kiya ke phir bees ki subah ko hum ne aitikaf khatam kar diya. Isi subah ko Rasul Allah (Sallallahu Alaihi Wasallam) ne humein khitab farmaya ke mujhe Shab-e-Qadr dikhayi gayi thi, lekin phir bhula di gayi, is liye ab usay aakhri asharay ki taaq raaton mein talash karo. Mein ne (khwab mein) dekha hai ke mein keechar, pani mein sajda kar raha hoon aur jin logon ne Rasul Allah (Sallallahu Alaihi Wasallam) ke sath (is saal) aitikaf kiya tha wo phir dobara karein. Chunanche wo log masjid mein dobara aa gaye. Aasman mein kahin badal ka ek tukra bhi nahi tha ke achanak badal aaya aur barish shuru ho gayi. Phir namaz ki takbeer hui aur Rasul Allah (Sallallahu Alaihi Wasallam) ne keechar mein sajda kiya. Mein ne khud aap ki naak aur peshani par keechar laga hua dekha
.

Hum se Abdur Rahman Bin Bishr ne bayan kiya, kaha ke hum se Sufyan Bin Uyainah ne bayan kiya, un se Ibn Juraij ne bayan kiya, un se Ibn Abi Najeeh ke mamon Suleiman Ahwal ne, un se Abu Salma ne aur un se Abu Saeed Khudri (Radi Allahu Anhu). Sufyan ne kaha aur hum se Muhammad Bin Amr ne bayan kiya, un se Abu Salma ne aur un se Abu Saeed Khudri (Radi Allahu Anhu), Sufyan ne ye bhi kaha ke mujhe yaqeen ke sath yaad hai ke Ibn Abi Labeed ne hum se ye hadees bayan ki thi, un se Abu Salma ne aur un se Abu Saeed Khudri (Radi Allahu Anhu) ke hum Rasul Allah (Sallallahu Alaihi Wasallam) ke sath Ramzan ke doosre asharay mein aitikaf ke liye baithe. Bees-veen ki subah ko hum ne apna saman (masjid se) uttha liya. Phir Rasul Allah (Sallallahu Alaihi Wasallam) tashreef laye aur farmaya ke jis ne (doosre asharay mein) aitikaf kiya hai wo dobara aitikaf ki jagah chale, kyunke mein ne aaj ki raat (Shab-e-Qadr ko) khwab mein dekha hai mein ne ye bhi dekha ke mein keechar mein sajda kar raha hoon. Phir jab apne aitikaf ki jagah (masjid mein) aap dobara aa gaye to achanak badal mundlaye, aur barish hui. Is zaat ki qasam jis ne Nabi Kareem (Sallallahu Alaihi Wasallam) ko haqq ke sath bheja! aasman par isi din ke aakhri hissa mein badal hua tha. Masjid khajoor ki shakhon se bani hui thi (is liye chhat se pani tapka) jab Aap (Sallallahu Alaihi Wasallam) ne namaz-e-subah ada ki, to mein ne dekha ke aap ki naak aur peshani par keechar ka asar tha
.

Hum se Asbagh bin Faraj ne byaan kiya , kaha ke mujhe Abdullah bin Wahb ne khabar di , kaha ke mujhe Amr bin al-Harith ne khabar di , unhein Amr bin Abi Habib ne , un se Abu al-Khair ne Abdur Rahman bin Ausaylah Sanabihi se , Janab Abu al-Khair ne un se poocha tha ke tum ne kab Hijrat ki thi ? Unhon ne byaan kiya ke hum Hijrat ke irade se Yaman chale , abhi hum Maqam e Juhfa mein pahunche thay ke ek sawar se hamari mulaqat hui . Hum ne un se Madinah ki khabar poochi to unhon ne bataya ke Nabi Karim salla Allahu alaihi wasallam ki wafat ko paanch din ho chuke hain main ne poocha tum ne Lailat al-Qadr ke baare mein koi hadees suni hai ? Unhon ne farmaya ke haan , Nabi Karim salla Allahu alaihi wasallam ke muazzin Bilal razi Allahu anhu ne mujhe khabar di hai ke Lailat al-Qadr Ramzan ke aakhri asharah ke saat dinon mein (ek taaq raat) hoti hai .

Hum se Musaddad ne bayan kiya, kaha hum se Bishr bin Mufaddal ne bayan kiya, in se Humayd ne bayan kiya, in se Anas razi Allahu anhu ne bayan kiya ke mujh se Ubadah bin Samit razi Allahu anhu ne kaha, Nabi Karim salla Allahu alaihi wasallam logon ko Lailat-ul-Qadr ki bisharat dene ke liye hujre se bahar tashreef laaye, lekin Musalmanon ke do aadmi is waqt aapas mein kisi baat par larne lage. Aap salla Allahu alaihi wasallam ne farmaya ke main tumhein (Lailat-ul-Qadr ke mutalliq) batane ke liye nikla thu lekin falan falan aapas mein larne lage aur (mere ilm se) woh utha li gayi. Mumkin hai ke yahi tumhare liye achha ho. Ab tum usay 29 Ramzan aur 27 Ramzan aur 25 Ramzan ki raaton mein talash karo.

`Hum se Yahya bin Bukair ne bayan kiya, unhon ne kaha hum se Laith bin Saad ne bayan kiya, un se Aqeel ne bayan kiya, un se Ibn Shihab ne bayan kiya, un se Salim bin Abdullah ne, un se Ibn Umar Radi Allahu Anhuma ne ke kuch logon ko khwab mein Shab-e-Qadr (Ramzan ki) saat aakhri tareekhon mein dikhayi gayi aur kuch logon ko dikhayi gayi ke wo aakhri das tareekhon mein ho gi to Nabi Kareem صلی اللہ علیہ وسلم ne farmaya ke ise aakhri saat tareekhon mein talash karo.