Hum se Sulayman bin Harb ne bayan kiya, kaha hum se Shubah ne bayan kiya, in se Mansoor ne bayan kiya, kaha main ne Abu Wail se suna aur woh Abdullah bin Masood razi Allahu anhu se bayan karte thay ke unhon ne bayan kiya ke Rasool Allahsalla Allahu alaihi wasallam ne farmaya ”Musalman ko gaali dena gunah hai aur is ko qatl karna kufr hai.“ Ghundar ne Shubah se riwayat karne mein Sulayman ki mutabia-t ki hai.

Hum se Abu Mamar Abdullah bin Amr ne bayan kiya, unhon ne kaha hum se Abd-ul-Waris ne bayan kiya, in se Husain bin Zhakwan muallim ne bayan kiya, in se Abdullah bin Buraydah ne bayan kiya, unhon ne mujh se Yahya bin Yamar ne bayan kiya, in se Abu al-Aswad Dili ne bayan kiya aur in se Abu Zarr Ghifari razi Allahu anhu ne ke unhon ne Nabi Karim salla Allahu alaihi wasallam se suna, Nabi Karim salla Allahu alaihi wasallam ne farmaya ke agar koi shakhs kisi shakhs ko kafir ya fasiq kahe aur woh dar-haqiqat kafir ya fasiq na ho to khud kehne wala fasiq aur kafir ho jaye ga.

Hum se Muhammad bin Sinan ne bayan kiya, kaha hum se Falih bin Sulayman ne bayan kiya kaha hamase Hilal bin Ali ne bayan kiya aur in se Anas razi Allahu anhu ne bayan kiya ke Rasool Allahsalla Allahu alaihi wasallam fuhsh-go nahi thay, na Aap lanat-malamat karne wale thay aur na gaali dete thay, Aap ko bahut ghussa aata to sirf itna keh dete, usay kiya ho gaya hai, is ki peshani pe khak lage.

Hum se Muhammad bin Bashar ne bayan kiya, kaha hum se Usman bin Amr ne, kaha hum se Ali bin Mubarak ne bayan kiya, in se Yahya bin Abi Kaseer ne, in se Abu Qulabah ne ke Sabit bin Dah-haak razi Allahu anhu as-haab e shajar (bai-at e rizwan karne walon) mein se thay, unhon ne in se bayan kiya ke Rasool Allahsalla Allahu alaihi wasallam ne farmaya ke jo Islam ke siwa kisi aur mazhab par qasam khaye (ke agar main ne falan kaam kiya to main nasrani hoon, Yahudi hoon) to woh aisa ho jaye ga jaise ke us ne kaha aur kisi insan par in cheezon ki nazr sahih nahi hoti jo is ke ikhtiyar mein na hon aur jis ne duniya mein kisi cheez se khud-kushi kar li usay isi cheez se aakhirat mein azab ho ga aur jis ne kisi Musalman par lanat bheji to yeh is ke khoon karne ke barabar hai aur jo shakhs kisi Musalman ko kafir kahe to woh aisa hai jaise is ka khoon kiya.

Hum se Umar bin Hafs bin Ghiyas ne bayan kiya, kaha hum se hamare walid ne bayan kiya, kaha hum se Aamash ne bayan kiya, kaha ke mujh se Adi bin Sabit ne bayan kiya ke main ne Sulayman bin Surad se suna woh Nabi Karim salla Allahu alaihi wasallam ke sahabi hain, unhon ne kaha ke Nabi Karim salla Allahu alaihi wasallam ke samne do aadmiyon ne aapas mein gaali-galouch ki ek sahab ko ghussa aa gaya aur bahut zyada aaya, in ka chehra phool gaya aur rang badal diya gaya. Nabi Karim salla Allahu alaihi wasallam ne is waqt farmaya ke mujhe ek kalma maloom hai ke agar (ghussa karne wala shakhs) usay keh le to is ka ghussa door ho jaye ga. Chunanche ek sahab ne ja kar ghussa hone wale ko Nabi Karim salla Allahu alaihi wasallam ka irshad sunaya aur kaha shaytan se Allah ki panah maang woh kehne laga kiya tum mujhko roogi samajhte ho ya deewane? Ja apna rasta le.

Hum se Musaddad ne bayan kiya, kaha hum se Bishr bin Mufaddal ne bayan kiya, in se Humayd ne bayan kiya, in se Anas razi Allahu anhu ne bayan kiya ke mujh se Ubadah bin Samit razi Allahu anhu ne kaha, Nabi Karim salla Allahu alaihi wasallam logon ko Lailat-ul-Qadr ki bisharat dene ke liye hujre se bahar tashreef laaye, lekin Musalmanon ke do aadmi is waqt aapas mein kisi baat par larne lage. Aap salla Allahu alaihi wasallam ne farmaya ke main tumhein (Lailat-ul-Qadr ke mutalliq) batane ke liye nikla thu lekin falan falan aapas mein larne lage aur (mere ilm se) woh utha li gayi. Mumkin hai ke yahi tumhare liye achha ho. Ab tum usay 29 Ramzan aur 27 Ramzan aur 25 Ramzan ki raaton mein talash karo.

Mujh se Umar bin Hafs bin Ghiyas ne bayan kiya , kaha mujh se mere walid ne bayan kiya , kaha hum se Aamash ne bayan kiya , in se Maroor ne aur in se Abu Zarr razi Allahu anhu ne , Maroor ne bayan kiya ke main ne Abu Zarr razi Allahu anhu ke jism par ek chadar dekhi aur in ke ghulam ke jism par bhi ek waisi hi chadar thi , main ne arz kiya: agar apne ghulam ki chadar le lein aur usay bhi pehan lein to ek rang ka jora ho jaye ghulam ko doosra kapra de dein . Abu Zarr razi Allahu anhu ne is par kaha ke mujh mein aur ek sahab (Bilal razi Allahu anhu) mein takrar ho gayi thi to in ki maan Ajmi thien , main ne is baare mein in ko tana de diya unhon ne ja kar yeh baat Nabi Karim salla Allahu alaihi wasallam se keh di . Nabi Karim salla Allahu alaihi wasallam ne mujh se daryaft farmaya kya tum ne is se jhagra kiya hai ? Main ne arz kiya ji haan . Daryaft kiya tum ne usay is ki maan ki wajah se tana diya hai ? Main ne arz kiya ji haan . Nabi Karim salla Allahu alaihi wasallam ne farmaya ke tumhare andar abhi jahiliyat ki boo baqi hai . Main ne arz kiya: ya Rasool Allah! Is burhape mein bhi ? Nabi Karim salla Allahu alaihi wasallam ne farmaya ke haan yaad rakho yeh (ghulam bhi) tumhare bhai hain , Allah Ta'ala ne unhein tumhari matahti mein diya hai , pas Allah Ta'ala jis ki matahti mein bhi is ke bhai ko rakkhe usay chahiye ke jo woh khaye usay bhi khilaye aur jo woh pehne usay bhi pehnaye aur usay aisa kaam karne ke liye na kahe , jo is ke bas mein na ho agar usay koi aisa kaam karne ke liye kehna hi pare to is kaam mein is ki madad kare .