Hum se Musaddad Bin Musarhad ne bayan kiya, kaha hum se Ismail Bin Aliyyah ne bayan kiya un se Ayyub ne, un se Nafi ne aur un se Ibn Umar (Radi Allahu Anhuma) ne bayan kiya ke Rasul Allah (Sallallahu Alaihi Wasallam) ne Yaum-e-Ashura ka roza rakkha tha aur aap (Sallallahu Alaihi Wasallam) ne is ke rakhne ka Sahaba (Radi Allahu Anhum) ko ibtida-e-Islam mein hukm diya tha, jab mah-e-Ramzan ke roze farz ho gaye to Ashura ka roza bator farz chor diya gaya, Abdullah Bin Umar (Radi Allahu Anhuma) Ashura ke din roza na rakhte magar jab un ke roze ka din hi Yaum-e-Ashura aan parta
.

Hum se Yahya bin Bukair ne byaan kiya , unhon ne kaha ke hum se Layth ne byaan kiya , un se Aqeel ne , un se Ibn Shihab ne , un se Urwah ne aur un se Aisha razi Allahu anha ne byaan kiya (doosri sanad Imam Bukhari rahmahu Allah ne kaha) aur mujh se Muhammad bin Muqatil ne byaan kiya , unhon ne kaha ke mujh se Abdullah bin Mubarak ne khabar di , unhon ne kaha ke humein Muhammad bin Abi Hafsah ne khabar di , unhein Zuhri ne , unhein Urwah ne aur un se Umm-ul-Moomineen Aisha razi Allahu anha ne byaan farmaya ke Ramzan (ke roze) farz hone se pehle musalman Ashura ka roza rakhte thay . Ashura hi ke din (jahiliyat mein) Kaaba par ghilaf charhaya jata tha . Phir jab Allah Ta'ala ne Ramzan farz kar diya to Rasool Allah salla Allahu alaihi wasallam ne logon se farmaya ke ”Ab jis ka jee chahe Ashura ka roza rakhe aur jis ka jee chahe chhor de .“

Hum se Qutaiba ne bayan kiya, unhon ne kaha hum se Laith ne bayan kiya, un se Yazid Bin Abi Habib ne aur un se Irak Bin Malik ne bayan kiya, unhein Urwah ne khabar di ke Umm-ul-Momineen Aisha (Radi Allahu Anha) ne farmaya Quraish zamana-e-jahiliyat mein Ashura ka roza rakhte thay, phir Rasul Allah (Sallallahu Alaihi Wasallam) ne bhi is din roze ka hukm diya yahan tak ke Ramzan ke roze farz ho gaye, phir Rasul Allah (Sallallahu Alaihi Wasallam) ne farmaya ke jis ka jee chahe Yaum-e-Ashura ka roza rakhe aur jis ka jee chahe na rakhe
.

Hum se Abu Asim ne bayan kiya, un se Umar Bin Muhammad ne, un se Salim Bin Abdullah Bin Umar (Radi Allahu Anhuma) ne, aur un se un ke walid ne bayan kiya ke Nabi Kareem (Sallallahu Alaihi Wasallam) ne farmaya Ashura ke din agar koi chahe to roza rakh le
.

Hum se Abu-al-Yaman ne bayan kiya, kaha ke hum ko Shuaib ne khabar di, un se Zuhri ne bayan kiya ke mujhe Urwah Bin Zubair (Radi Allahu Anhu) ne khabar di, un se Aisha (Radi Allahu Anha) ne bayan kiya ke (shuru Islam mein) Rasul Allah (Sallallahu Alaihi Wasallam) ne Ashura ke din ka roza rakhne ka hukm diya tha. Phir jab Ramzan ke roze farz ho gaye to jis ka dil chahta is din roza rakhta aur jo na chahta nahi rakkha karta tha
.

Hum se Abdullah Bin Muslimah Qanabi ne bayan kiya, kaha ke hum se Imam Malik (Rahimahullah) ne bayan kiya, un se Hisham Bin Urwah ne aur un se un ke walid ne aur un se Aisha (Radi Allahu Anha) ne bayan kiya ke Ashura ke din zamana-e-jahiliyat mein Quraish roza rakkha karte thay aur Rasul Allah (Sallallahu Alaihi Wasallam) bhi rakhte. Phir jab aap (Sallallahu Alaihi Wasallam) Madinah tashreef laye to aap (Sallallahu Alaihi Wasallam) ne yahan bhi Ashura ke din roza rakkha aur is ka logon ko bhi hukm diya. Lekin Ramzan ki farziyat ke baad aap ne is ko chor diya aur farmaya ke ab jis ka jee chahe is din roza rakhe aur jis ka chahe na rakhe
.

Hum se Abdullah Bin Muslimah ne bayan kiya, unhon ne kaha ke hum se Imam Malik (Rahimahullah) ne bayan kiya, un se Ibn Shihab ne bayan kiya, un se Humaid Bin Abdur Rahman ne bayan kiya ke unhon ne Muawiyah Bin Abi Sufyan (Radi Allahu Anhuma) se Ashura ke din minbar par suna, unhon ne kaha ke ae ahl-e-Madinah! tumhare ulema kidhar gaye, mein ne Rasul Allah (Sallallahu Alaihi Wasallam) ko ye farmate suna ke ye Ashura ka din hai. Is ka roza tum par farz nahi hai lekin mein roza se hoon aur ab jis ka jee chahe roza se rahe (aur meri sunnat par amal kare) aur jis ka ji chahe na rahe
.

Hum se Musaddad Bin Masarhad ne bayan kiya, kaha hum se Yahya Qattan ne bayan kiya ke mujh se mere walid ne bayan kiya aur un se Aisha Radi Allahu Anha ne bayan kiya ke Ashura ka roza Quraish ke log zamana-e-jahiliyat mein rakhte thay aur Nabi Kareem Sallallahu Alaihi Wasallam ne bhi ise baqi rakkha tha. Jab aap Sallallahu Alaihi Wasallam Madinah tashreef laye to aap Sallallahu Alaihi Wasallam ne khud bhi is din roza rakkha aur Sahaba Radi Allahu Anhum ko bhi roza rakhne ka hukm diya lekin jab Ramazan ka roza 2 Hijri mein farz hua to is ke baad aap Sallallahu Alaihi Wasallam ne hukm diya ke jis ka ji chahe Ashura ka roza rakhe aur jo na chahe na rakhe
.

Hum se Musaddad ne bayan kiya , kaha hum se Yahya ne bayan kiya , un se Obaidullah ne bayan kiya , unhein Nafi ne khabar di aur un se Abdullah bin Umar rz ne bayan kiya ke Ashura ke din jahiliyat mein hum roza rakhte thay lekin jab Ramazan ke roze nazil ho gaye to Nabi Kareem صلی اللہ علیہ وسلم ne farmaya ke jis ka ji chahe Ashura ka roza rakhe aur jis ka ji chahe na rakhe .

Mujh se Muhammad bin Musanna ne byaan kiya , kaha hum se Yahya ne byaan kiya , kaha hum se Hisham ne byaan kiya , kaha ke mujhe mere walid ne khabar di aur un se Aisha razi Allahu anha ne byaan kiya ke Ashura ke din Quraysh zamana e jahiliyat mein roze rakhte thay aur Nabi Karim salla Allahu alaihi wasallam bhi is din roza rakhte thay . Jab Aap salla Allahu alaihi wasallam Madinah tashreef laye to yahan bhi Aap salla Allahu alaihi wasallam ne is din roza rakkha aur sahabah razi Allahu anhum ko bhi is ke rakhne ka hukm diya , lekin jab Ramzan ke rozon ka hukm nazil hua to Ramzan ke roze farz ho gaye aur Ashura ke roza (ki farziyat) baqi nahi rahi . Ab jis ka jee chahe is din bhi roza rakhe aur jis ka jee chahe na rakhe .