Hum se Abu Asim ne bayan kiya, un se Umar Bin Muhammad ne, un se Salim Bin Abdullah Bin Umar (Radi Allahu Anhuma) ne, aur un se un ke walid ne bayan kiya ke Nabi Kareem (Sallallahu Alaihi Wasallam) ne farmaya Ashura ke din agar koi chahe to roza rakh le
.

Hum se Abu-al-Yaman ne bayan kiya, kaha ke hum ko Shuaib ne khabar di, un se Zuhri ne bayan kiya ke mujhe Urwah Bin Zubair (Radi Allahu Anhu) ne khabar di, un se Aisha (Radi Allahu Anha) ne bayan kiya ke (shuru Islam mein) Rasul Allah (Sallallahu Alaihi Wasallam) ne Ashura ke din ka roza rakhne ka hukm diya tha. Phir jab Ramzan ke roze farz ho gaye to jis ka dil chahta is din roza rakhta aur jo na chahta nahi rakkha karta tha
.

Hum se Abdullah Bin Muslimah Qanabi ne bayan kiya, kaha ke hum se Imam Malik (Rahimahullah) ne bayan kiya, un se Hisham Bin Urwah ne aur un se un ke walid ne aur un se Aisha (Radi Allahu Anha) ne bayan kiya ke Ashura ke din zamana-e-jahiliyat mein Quraish roza rakkha karte thay aur Rasul Allah (Sallallahu Alaihi Wasallam) bhi rakhte. Phir jab aap (Sallallahu Alaihi Wasallam) Madinah tashreef laye to aap (Sallallahu Alaihi Wasallam) ne yahan bhi Ashura ke din roza rakkha aur is ka logon ko bhi hukm diya. Lekin Ramzan ki farziyat ke baad aap ne is ko chor diya aur farmaya ke ab jis ka jee chahe is din roza rakhe aur jis ka chahe na rakhe
.

Hum se Abdullah Bin Muslimah ne bayan kiya, unhon ne kaha ke hum se Imam Malik (Rahimahullah) ne bayan kiya, un se Ibn Shihab ne bayan kiya, un se Humaid Bin Abdur Rahman ne bayan kiya ke unhon ne Muawiyah Bin Abi Sufyan (Radi Allahu Anhuma) se Ashura ke din minbar par suna, unhon ne kaha ke ae ahl-e-Madinah! tumhare ulema kidhar gaye, mein ne Rasul Allah (Sallallahu Alaihi Wasallam) ko ye farmate suna ke ye Ashura ka din hai. Is ka roza tum par farz nahi hai lekin mein roza se hoon aur ab jis ka jee chahe roza se rahe (aur meri sunnat par amal kare) aur jis ka ji chahe na rahe
.

Hum se Abu Ma'mar ne bayan kiya, kaha ke hum se Abdul Waris ne bayan kiya, kaha ke hum se Ayyub ne bayan kiya, kaha ke hum se Abdullah Bin Saeed Bin Jubair ne bayan kiya, un se un ke baap ne aur un se Ibn Abbas (Radi Allahu Anhuma) ne farmaya ke Nabi Kareem (Sallallahu Alaihi Wasallam) Madinah mein tashreef laye. (doosre saal) Aap (Sallallahu Alaihi Wasallam) ne yahudiyon ko dekha ke wo Ashura ke din roza rakhte hain. Aap (Sallallahu Alaihi Wasallam) ne un se is ka sabab maloom farmaya to unhon ne bataya ke ye ek accha din hai. Isi din Allah Ta'ala ne Bani Israel ko un ke dushman (Firon) se najat dilayi thi. Is liye Musa (Alaihis Salam) ne is din ka roza rakkha tha. Aap ne farmaya phir Musa (Alaihis Salam) ke (shareek-e-masarrat hone mein) hum tum se zyada mustahiq hain. Chunanche Aap (Sallallahu Alaihi Wasallam) ne is din roza rakkha aur sahaba (Radi Allahu Anhum) ko bhi is ka hukm diya
.

Hum se Ali Bin Abdullah ne bayan kiya, kaha ke hum se Abu Usamah ne bayan kiya, un se Abu-al-Umais ne, un se Qais Bin Muslim ne, un se Tariq Bin Shihab ne aur un se Abu Musa (Radi Allahu Anhu) ne bayan kiya ke Ashura ke din ko yahudi eid ka din samajhte thay is liye Rasul Allah (Sallallahu Alaihi Wasallam) ne farmaya ke tum bhi is din roza rakkha karo
.

Hum se Ubaidullah Bin Musa ne bayan kiya, kaha ke hum se Sufyan Bin Uyainah ne, un se Ubaidullah Bin Abi Yazid ne, aur un se Ibn Abbas (Radi Allahu Anhuma) ne bayan kiya ke mein ne Nabi Kareem (Sallallahu Alaihi Wasallam) ko siwa Ashura ke din ke aur is Ramzan ke mahine ke aur kisi din ko doosre dinon se afzal jaan kar khas taur se qasad kar ke roza rakhte nahi dekha
.

Hum se Makki Bin Ibrahim ne bayan kiya, kaha ke hum se Yazid Bin Abi Ubaid ne bayan kiya, un se Salma Bin Akwa (Radi Allahu Anhu) ne ke Nabi Kareem (Sallallahu Alaihi Wasallam) ne Bano Aslam ke ek shakhs ko logon mein is baat ke ailan ka hukm diya tha ke jo kha chuka ho wo din ke baqi hisse mein bhi khane peene se ruka rahe aur jis ne na khaya ho usay roza rakh lena chahiye kyunke ye Ashura ka din hai
.