Hum se Musa bin Ismail ne byaan kiya , kaha ke hum se Wuhaib bin Khalid ne byaan kiya , kaha ke hum se Ayub Sakhtiyani ne byaan kiya un se Abu Qilabah ne aur un se Anas ne ke Rasool Allah salla Allahu alaihi wasallam ne , Madina mein hum bhi Aap salla Allahu alaihi wasallam ke saath thay Zohr ki namaaz chaar rak'at parhi aur Zul Hulaifah mein Asr ki namaaz do rak'at . Aap salla Allahu alaihi wasallam raat ko wahin rahe . Subah hui to maqam-e-Baida se sawari par baithte hue Allah Ta'ala ki hamd , us ki tasbeeh aur takbeer kahi . Phir Hajj aur Umrah ke liye ek saath ahram baandha aur logon ne bhi Aap salla Allahu alaihi wasallam ke saath dono ka ek saath ahram baandha (yani qiran kiya) jab hum Makka aaye to Aap salla Allahu alaihi wasallam ke hukm se (jin logon ne Hajj-e-Tamattu ka ahram baandha tha un) sab ne ahram khool diya . Phir aathvein tareekh mein sab ne Hajj ka ahram baandha . Unhon ne kaha ke Nabi Karim salla Allahu alaihi wasallam ne apne haath se khare ho kar bahut se oont nahar kiye . Nabi Karim salla Allahu alaihi wasallam ne (Eid-ul-Adha ke din) Madina mein bhi do chit-kabre seengon wale meindhe zibah kiye thay . Abu Abdullah (Imam Bukhari rahmatullah alaihi) ne kaha ke baaz log is hadees ko yun riwayat karte hain Ayub se , unhon ne ek shakhs se , unhon ne Anas se .

Hum se Ahmad bin Isa ne byaan kiya , kaha ke humein Abdullah bin Wahab ne khabar di , unhein Yunus ne , unhein Ibn Shihab ne ke Salim bin Abdullah bin Umar razi Allahu anhuma ne unhein khabar di , un se Abdullah bin Umar ne farmaya ke maine Rasool Allah salla Allahu alaihi wasallam ko Zul Hulaifah mein dekha ke apni sawari par charh rahe hain . Phir jab woh seedhi khari hui to Aap salla Allahu alaihi wasallam ne Labbaik kaha .

Aur Aban ne kaha hum se Malik bin Dinar ne byaan kiya , un se Qasim bin Muhammad ne aur un se Aisha razi Allahu anha ne ke Nabi Karim salla Allahu alaihi wasallam ne in ke saath in ke bhai Abdul Rahman ko bheja aur unhon ne Aisha razi Allahu anha ko Tan'eem se Umrah karaya aur palan ki pichli lakri par in ko bitha liya . Umar razi Allahu anhu ne farmaya ke Hajj ke liye palanein baandhon kyunke yeh bhi ek jihad hai .

Hum se Ali bin Abdullah Madini ne byaan kiya , unhon kaha ke hum se Sufyan bin Uyaynah ne byaan kiya , unhon ne kaha ke hum se Musa bin Uqbah ne byaan kiya , unhon ne kaha ke maine Salim bin Abdullah se suna , unhon ne kaha ke maine Ibn Umar razi Allahu anhuma se suna (doosri sanad) Imam Bukhari rahmahu Allah ne kaha aur hum se Abdullah bin Maslamah Qanabi ne byaan kiya , un se Imam Malik ne , un se Musa bin Uqbah ne , un se Salim bin Abdullah ne , unhon ne apne baap se suna , ke woh keh rahe thay ke Rasool Allah salla Allahu alaihi wasallam ne Masjid-e-Zul Hulaifah ke qareeb hi puhanch kar ahram baandha tha .

Hum se Muhammad bin Abi Bakr Muqaddami ne byaan kiya , kaha ke hum se Fadhail bin Sulayman ne byaan kiya , kaha ke hum se Musa bin Uqbah ne byaan kiya , kaha ke mujhe Kuraib ne khabar di aur un se Abdullah bin Abbas razi Allahu anhuma ne byaan kiya ke Hajjat-ul-Wada mein Zohr aur Asr ke darmiyan hafta ke din Nabi Karim salla Allahu alaihi wasallam kangha karne aur tail lagane aur izaar aur rida pehne ke baad apne as'haab ke saath Madina se nikle . Aap salla Allahu alaihi wasallam ne is waqt zafran mein range hue aise kapre ke siwa jis ka rang badan par lagta ho kisi qism ki chadar ya tehband pehne se mana nahi kiya . Din mein Aap salla Allahu alaihi wasallam Zul Hulaifah puhanch gaye (aur raat wahin guzari) phir Aap salla Allahu alaihi wasallam sawar hue aur Baida se Aap salla Allahu alaihi wasallam ne aur Aap salla Allahu alaihi wasallam ke saathiyon ne Labbaik kaha aur ahram baandha aur apne oonton ko haar pehnaya . Di-ul-Qada ke mahine mein ab paanch din reh gaye thay phir jab Aap salla Allahu alaihi wasallam Makka puhanche to Di-ul-Hijja ke chaar din guzar chuke thay . Aap salla Allahu alaihi wasallam ne Baitullah ka tawaf kiya aur Safa aur Marwah ki sayi ki , Aap salla Allahu alaihi wasallam abhi halal nahi hue kyunke qurbani ke jaanwar Aap salla Allahu alaihi wasallam ke saath thay aur Aap salla Allahu alaihi wasallam ne in ki gardan mein haar daal diya tha . Aap salla Allahu alaihi wasallam Hajoon pahaar ke nazdeek Makka ke balayi hissa mein utre . Hajj ka ahram ab bhi baaqi tha . Baitullah ke tawaf ke baad phir Aap salla Allahu alaihi wasallam wahan is waqt tak tashreef nahi le gaye jab tak maidan-e-Arafat se wapas na ho liye . Aap salla Allahu alaihi wasallam ne apne saathiyon ko hukm diya tha ke woh Baitullah ka tawaf karein aur Safa o Marwah ke darmiyan sayi karein , phir apne saron ke baal turshwa kar halal ho jayein . Yeh farmaan in logon ke liye tha jin ke saath qurbani ke jaanwar nahi thay . Agar kisi ke saath is ki biwi thi to woh us se hum-bistar ho sakta tha . Isi tarah khushbu-dar aur (sile hue) kapre ka istemal bhi us ke liye jaiz tha .

Hum se Sulayman bin Harb ne byaan kiya , kaha ke hum se Hammad bin Zaid ne byaan kiya , un se Abu Ayub ne , un se Abu Qilabah ne aur un se Anas bin Malik ne ke Nabi Karim salla Allahu alaihi wasallam ne namaaz-e-Zohr Madina Munawwarah mein chaar rak'at parhi . Lekin namaaz-e-Asr Zul Hulaifah mein do rak'at parhi . Maine khud suna ke log buland awaaz se Hajj aur Umrah dono ke liye Labbaik keh rahe thay .

Aur Abu Mamar ne kaha ke hum se Abdul Waris ne byaan kiya , unhon ne kaha ke hum se Ayub Sakhtiyani ne Nafi se byaan kiya , unhon ne kaha ke Abdullah bin Umar razi Allahu anhuma jab Zul Hulaifah mein subah ki namaaz parh chuke to apni oontni par palan lagane ka hukm farmaya , sawari layi gayi to Aap is par sawar hue aur jab woh Aap ko le kar khari ho gayi to Aap khare ho kar qibla-ru ho gaye aur phir Labbaik kehna shuroo kiya ta-aanke haram mein dakhil ho gaye . Wahan puhanch kar Aap ne Labbaik kehna band kar diya . Phir Di-Tuwa mein tashreef la kar raat wahin guzarte subah hoti to namaaz parhte aur ghusal karte (phir Makka mein dakhil hote) Aap yaqeen ke saath yeh jaante thay ke Rasool Allah salla Allahu alaihi wasallam ne bhi isi tarah kiya tha . Abdul Waris ki tarah is hadees ko Ismail ne bhi Ayub se riwayat kiya . Is mein ghusal ka zikr hai .

Hum se Ahmad Bin Muhammad ne bayan kiya, unhon ne kaha hum ko Abdullah ne khabar di, unhon ne kaha ke hum ko Ma'mar ne khabar di, unhein Zuhri ne, unhein Urwah Bin Zubair ne, aur un se Miswar Bin Makhramah (Radi Allahu Anhuma) aur Marwan ne bayan kiya ke Nabi Kareem (Sallallahu Alaihi Wasallam) Madinah se taqreeban apne ek hazar sathiyon ke sath (Haj ke liye nikle) jab Zi Al-Hulaifah pohanche to Nabi Kareem (Sallallahu Alaihi Wasallam) ne hadyi ko haar pehnaya aur ishaar kiya phir Umrah ka ihram bandha
.

Hum se Sahl Bin Bakkar ne bayan kiya, kaha ke hum se Wuhaib ne bayan kiya, un se Ayub ne, un se Abu Qulaba ne aur un se Anas (Radi Allahu Anhu) ne ke Nabi Kareem (Sallallahu Alaihi Wasallam) ne Zohar ki namaz Madinah mein chaar rakat parhi aur Asr ki Zu Al-Hulaifah mein do rakaat. Raat Aap (Sallallahu Alaihi Wasallam) ne wahin guzari, phir jab subah hui to Aap (Sallallahu Alaihi Wasallam) apni ontni par sawar ho kar tahleel-o-tasbeeh karne lage. Jab Baida pohanche to Aap (Sallallahu Alaihi Wasallam) ne dono (Haj-o-Umrah) ke liye ek sath talbiyah kaha, jab Makkah pohanche (aur Umrah ada kar liya) to Sahaba (Radi Allahu Anhum) ko hukum diya ke halal ho jayein. Nabi Kareem (Sallallahu Alaihi Wasallam) ne khud apne hath se saat ont kharay kar ke nahr kiye aur Madinah mein do chitkabray seengon wale meindhay zabah kiye
.

Hum se Musaddad ne bayan kiya, unhon ne kaha hum se Ismail Bin Aliyyah ne bayan kiya, un se Ayub ne, un se Abu Qulaba ne aur un se Anas Bin Malik (Radi Allahu Anhu) ne ke Nabi Kareem (Sallallahu Alaihi Wasallam) ne Zohar ki namaz Madinah mein chaar rakat aur Asr ki Zu Al-Hulaifah mein do rakaat parhi theen. Ayub ne ek shakhs ke waste se briwayat-e-Anas (Radi Allahu Anhu) kaha phir Aap (Sallallahu Alaihi Wasallam) ne wahin raat guzari. Subah hui to Fajr ki namaz parhi aur apni ontni par sawar ho gaye, phir jab maqam-e-Baida pohanche to Umrah aur Haj dono ka naam le kar labbaik pukara
.

Hum se Ubaid Bin Ismail ne bayan kiya, un se Abu Usama ne bayan kiya, un se Ubaidullah ne bayan kiya, un se Nafi ne bayan kiya aur un se Abdullah Bin Umar (Radi Allahu Anhuma) ne bayan kiya ke Nabi Kareem (Sallallahu Alaihi Wasallam) ne jab apna paye mubarak «grz» (rikab) mein dala aur oontni Aap (Sallallahu Alaihi Wasallam) ko le kar seedhi uth gayi to Aap (Sallallahu Alaihi Wasallam) ne Masjid-e-Zulhulaifa ke paas labbaik kaha (ihram bandha)
.

Hum se Ali Bin Abdullah ne bayan kiya ‘ kaha hum se Sufyan ne bayan kiya ‘ in se Zuhri ne ‘ in se Urwah ne ‘ in se khalifa Marwan aur Miswar Bin Makhramah ne bayan kiya ke Nabi Kareem Sallallahu Alaihi Wasallam Sulh-e-Hudaibiya ke mauqe par taqreeban ek hazar sahaba (Radi Allahu Anhum) ko sath le kar ravana hue. Jab Aap Zu-Hulaifa pahunche to Aap ne qurbani ke janwar ko haar pehnaya aur in par nishan lagaya aur umra ka ihram baandha. Mein nahi shumar kar sakta ke mein ne ye hadees Sufyan Bin Yasar se kitni dafa suni aur ek martaba ye bhi suna ke wo bayan kar rahe thay ke mujhe Zuhri se nishan lagane aur qilada pehnane ke mutaliq yaad nahi raha. Is liye mein nahi jaanta ‘ is se in ki murad sirf nishan lagane aur qilada pehnane se thi ya poori hadees se thi
.

Hum se Abu Naeem ne byaan kiya , unhon ne kaha ke hum se Sufyan ne , Muhammad bin Munkadir aur Ibrahim bin Maysarah se byaan kiya , un se Anas bin Malik razi Allahu anhu ne kaha ke main ne Nabi Karim salla Allahu alaihi wasallam ke saath Madina Munawwarah mein zuhar ki chaar rakat parhi aur Zul-Hulaifah mein asar ki do rakat parhi .