Hum se Muslim bin Ibrahim ne byaan kiya , kaha ke hum se Hisham Dastuwai ne Yahya bin Kathir se byaan kiya , unhon ne Abu Salama bin Abdur Rahman se , unhon ne kaha ke main ne Abu Saeed Khudri razi Allahu anhu se (shab qadr ko) poocha . Aap ne farmaya ke baadal ka ek tukra aaya aur barsa yahan tak ke (masjid ki chhat) tapakne lagi jo khajoor ki shaakhon se banayi gayi thi . Phir namaaz ke liye takbeer hui . Main ne dekha ke Nabi Karim salla Allahu alaihi wasallam keechad aur paani mein sajda kar rahe thay . Keechad ka nishaan Aap ki peshani par bhi main ne dekha .