Hum se Abdullah bin Abdul Wahhab Basri ne byaan kiya , kaha ke hum se Hammad bin Zaid ne byaan kiya , kaha ke hum se Abdul Hameed Sahib uz Ziyadi ne byaan kiya ke kaha main ne Abdullah bin Haarith bin Nawfal se suna , unhon ne kaha ke hamein ek din Ibn Abbas razi Allahu anhuma ne jab ke barish ki wajah se keechad ho rahi thi khutba sunaya . Phir moazzin ko hukm diya aur jab woh «hayya alas salaah» par pohancha to Aap ne farmaya ke aaj yun pukaar do «as-salaatu fir rihaal» ke namaaz apni qayaam gahon par parh lo . Log ek doosre ko (hairat ki wajah se) dekhne lage . Jaise us ko unhon ne najaaiz samjha . Ibn Abbas razi Allahu anhuma ne farmaya ke aisa maloom hota hai ke tum ne shayad us ko bura jaana hai . Aisa to mujh se behtar zaat yani Rasool Allah salla Allahu alayhi wasallam ne bhi kiya tha . Beshak juma wajib hai magar main ne yeh pasand nahi kiya ke «hayya alas salaah» keh kar tumhein bahar nikaaloon (aur takleef mein mubtala karoon) aur Hammad Aasim se , woh Abdullah bin Haarith se , woh Ibn Abbas razi Allahu anhuma se , isi tarah riwayat karte hain . Albatta unhon ne itna aur kaha ke Ibn Abbas razi Allahu anhuma ne farmaya ke mujhe achha maloom nahi hua ke tumhein gunahgaar karoon aur tum us haalat mein aao ke tum mitti mein ghatnon tak aalooda ho gaye ho .