Mujh se Abdullah bin Muhammad Musandi ne bayan kiya , kaha hum se Muawiyah bin Amr ne bayan kiya , kaha hum se Abu Ishaq Ibrahim bin Muhammad ne bayan kiya , in se Humayd Taweel ne bayan kiya , kaha ke main ne Anas razi Allahu anhu se suna , unhon ne bayan kiya ke Harisa bin Saraqa razi Allahu anhu Badr ki larayi mein shaheed ho gaye . Woh is waqt nau-umr thay to in ki walda Nabi Karim salla Allahu alaihi wasallam ki khidmat mein aayien aur arz kiya: ya Rasool Allah! Aap ko maloom hai ke Harisa se mujhe kitni mohabbat thi , (Aap mujhe batayein) agar woh jannat mein hai to main sabr kar loon gi aur sabr par sawab ki umeedar rahoon gi aur agar koi aur baat hai to Aap dekhein ge ke main is ke liye kya karti hoon . Nabi Karim salla Allahu alaihi wasallam ne farmaya ke afsos kiya tum pagal ho gayi ho ? Jannat ek hi nahi hai , bahut si jannatein hain aur woh (Harisa) Jannat-ul-Firdous mein hai .