Hum se Umar bin Hafs bin Ghiyas ne bayan kiya, kaha hum se hamare walid ne bayan kiya, kaha hum se Aamash ne bayan kiya, kaha ke main ne in se suna woh bayan karte thay ke Abdullah bin Masood ne kaha ke Rasool Allah salla Allahu alaihi wasallam ne (Jang e Hunain) mein kuch maal taqseem kiya jaisa ke Aap hamesha taqseem kiya karte thay. Is par qabila Ansar ke ek shakhs ne kaha ke Allah ki qasam! Is taqseem se Allah ki raza-mandi haasil karna maqsud nahi tha. Main ne kaha ke yeh baat main zaroor Rasool Allah salla Allahu alaihi wasallam se kahoon ga. Chunanche main Nabi Karim salla Allahu alaihi wasallam ki khidmat mein hazir hua Nabi Karim salla Allahu alaihi wasallam apne sahabah ke saath tashreef rakhte thay, main ne chupke se yeh baat Aap salla Allahu alaihi wasallam se kahi. Nabi Karim salla Allahu alaihi wasallam ko is ki yeh baat bari nagowar guzri aur Aap ke chehre ka rang badal gaya aur Aap ghussa ho gaye yahan tak ke mere dil mein yeh khwahish paida hui ke kaash main ne Nabi Karim salla Allahu alaihi wasallam ko is baat ki khabar na di hoti phir Nabi Karim salla Allahu alaihi wasallam ne farmaya Musa alaihissalam ko is se bhi zyada takleef pahunchayi gayi thi lekin unhon ne sabr kiya.