Hum se Bishr bin Muhammad ne bayan kiya, kaha hum ko Abdullah bin Mubarak ne khabar di, kaha hum ko Mamar aur Yunus ne khabar di, in se Zuhri ne bayan kiya ke mujhko Ubaidullah bin Abdullah bin Utbah ne khabar di aur in se Nabi Karim salla Allahu alaihi wasallam ki zauja mutahhara Aisha razi Allahu anha ne bayan kiya ke jab (marz-ul-maut mein) Rasool Allah salla Allahu alaihi wasallam ke liye chalna phirna dushwar ho gaya aur Aap ki takleef barh gayi to Aap ne beemari ke din mere ghar mein guzarne ki ijazat apni doosri biwiyon se maangi jab ijazat mil gayi to Nabi Karim salla Allahu alaihi wasallam do ashkhaas Abbas razi Allahu anhu aur ek sahab ke darmiyan in ka sahara le kar bahar tashreef laaye, Aap ke mubarak qadam zameen par ghisat rahe thay. Main ne Ibn Abbas razi Allahu anhuma se is ka zikr kiya to unhon ne kaha tumhein maloom hai woh doosre sahab kaun thay jin ka Aisha razi Allahu anha ne naam nahi bataya, main ne kaha ke nahi kaha ke woh Ali razi Allahu anhu thay. Aisha razi Allahu anha ne kaha ke in ke hujre mein dakhil hone ke baad Nabi Karim salla Allahu alaihi wasallam ne farmaya jabke Aap ka marz barh gaya tha ke mujh par saat mashk daalo jo pani se labrez hon. Shayad main logon ko kuch nasihat kar sakoon. Bayan kiya ke phir Nabi Karim salla Allahu alaihi wasallam ko hum ne ek lagan mein bithaya jo Nabi Karim salla Allahu alaihi wasallam ki zauja mutahhara Hafsa razi Allahu anha ka tha aur Aap par hukm ke mutabiq mashkon se pani daalne lage aakhir Aap ne hamain isharah kiya ke bas ho chuka. Bayan kiya ke phir Nabi Karim salla Allahu alaihi wasallam sahabah ke majma mein gaye, unhein namaz parhayi aur unhein khitab farmaya.