Hum se Abdan ne bayan kiya, kaha ke mujhe mere walid ne khabar di, unhein Shubah ne, unhein Saeed bin Masrooq ne, unhein Abayah bin Rafi ne aur unhein in ke dada (Rafi bin Khadeej razi Allahu anhu) ne ke unhon ne kaha: ya Rasool اللہ! Hamare paas chhurri nahi. Nabi kareem salla Allahu alaihi wasallam ne farmaya ke jo (dhaar dar) cheez khoon baha de aur is par Allah ka naam le liya gaya ho to (is se zibah kiya hua janwar) kha sakte ho lekin nakhun aur daant se zibah na kiya gaya ho kyunke nakhun Habshiyon ki chhurri hai aur daant haddi hai. Aur ek oont bhaag gaya to (teer maar kar) usay rok liya gaya. Aap salla Allahu alaihi wasallam ne is par farmaya yeh oont bhi jangli janwaron ki tarah bharak uthte hain is liye jo tumhare qaboo se bahar ho jaye is ke saath aisa hi kiya karo.