Ibn Abbas razi Allahu anhuma ne kaha «wa kazzhaba bil-husna» se yeh murad hai ke is ko yeh yaqeen nahi ke Allah ki raah mein jo kharch kare ga is ka badla Allah is ko de ga aur Mujahid ne kaha «izha taradda» jab mar jaye . «talaz-zha» woh dozakh ki aag bharakti shola maarti hai . Aur Ubayd bin Umayr ne «tata-laz-zha» do (taa) ke saath parha hai .

Hum se Qubaysah bin Utbah ne byaan kiya , kaha hum se Sufyan Sawri ne byaan kiya , un se Aamash ne , un se Ibrahim Nakhai ne aur un se Alqamah bin Qays ne byaan kiya ke Abdullah bin Masood razi Allahu anhu ke shagirdon ke saath main mulk e Sham pahuncha hamare mutalliq Abu Dardaa razi Allahu anhu ne suna to hum se milne khud tashreef laye aur daryaft farmaya tum mein koi Quran Majeed ka qaari bhi hai ? Hum se kaha ji haan hai . Daryaft farmaya ke sab se achha qaari kaun hai ? Logon ne meri taraf isharah kiya . Aap ne farmaya ke phir koi aayat tilawat karo . Main ne «wal-layli izha yaghsha * wan-nahaari izha tajalla * wazh-zhakari wal unsa» ki tilawat ki . Abu Dardaa razi Allahu anhu ne poocha kya tum ne khud yeh aayat apne ustad Abdullah bin Masood razi Allahu anhu ki zabani isi tarah suni hai ? Main ne kaha ji haan . Unhon ne is par kaha ke main ne bhi Nabi Karim salla Allahu alaihi wasallam ki zabani yeh aayat isi tarah suni hai , lekin yeh Sham wale hamain par inkar karte hain .