Hum se Adam bin Abi Iyas ne byaan kiya , kaha hum se Shayban bin Abdur Rahman ne byaan kiya , un se Mansoor ne , un se Ibrahim Nakhai ne , un se Ubaydah Salmani ne aur un se Abdullah bin Masood razi Allahu anhu ne ke ulema e Yahud mein se ek shakhs Rasool Allah salla Allahu alaihi wasallam ke paas aaya aur kaha: Ae Muhammad! Hum Taurat mein paate hain ke Allah Ta'ala aasmanon ko ek ungli par rakh le ga is tarah zameen ko ek ungli par , darakhton ko ek ungli par , pani aur mitti ko ek ungli par aur tamam makhlooqat ko ek ungli par , phir farmaye ga ke main hi baadshah hoon . Nabi Karim salla Allahu alaihi wasallam is par hans diye aur Aap ke samne ke daant dikhayi dene lage . Aap ka yeh hansna is Yahudi aalim ki tasdeeq mein tha . Phir Aap salla Allahu alaihi wasallam ne is aayat ki tilawat ki «wa ma qadarullaha haqqa qadrihi wal ardu jamee-an qab-datuhu yawmal qiyamati was-samawatu matwiyyaatum bi-yameenihi subhanahu wa taala amma yushrikoona» ”aur in logon ne Allah ki azmat na ki jaisi azmat karna chahiye thi aur haal yeh ke saari zameen isi ki mutthi mein ho gi Qayamat ke din aur aasman is ke dahne hath mein lipeite hon ge , woh in logon ke shirk se bilkul paak aur buland tar hai .“