Mujahid ne kaha «yattaqi bi-wajhihi» se yeh murad hai ke munh ke bal dozakh mein ghaseeta jaye ga jaise is aayat mein farmaya «afaman yulqa fin-naari khayrun amman ya'tee aaminan» al-aayat . «zhee iwajan» ke maani shubha wala . «wa rajulan salaman li-rajulin» yeh ek misal hai mushrikeen ke maboodan e baatila ki aur mabood e bar-haqq ki . «wa yukha-wwifoonaka billazheena min doonihi» mein «min doonihi» se murad but hain (yani mushrikeen apne jhoote maboodon se tujh ko darate hain) . «khawwalnaahu» ke maani hum ne diya . «wallazhi jaa'a bis-sidqi» se Quran murad hai aur «sidqun» se Musalman murad hai jo Qayamat ke din Parvardigar ke samne aa kar arz kare ga yahi Quran hai jo tu ne duniya mein mujh ko inayat farmaya tha , main ne is par amal kiya . «mutashaakisoona» , «shakis-un» se nikla hai «shakis-un» bad-mizaj takrari aadmi ko kehte hain jo insaf ki baat pasand na kare . «saliman» aur «saaliman» achhe poore aadmi ko kehte hain . «ish-ma'azzat» ke maani nafrat karte hain , chirte hain . «bi-mafaazatihim» , «fauzun» se nikla hai murad kamyabi hai . «haaffeena» ke maani girda-gird is ke charon taraf . «mutashabihan» , «ishtibahun» se nahi balkay «tashaabuhun» se nikla hai yani is ki ek aayat doosri aayat ki tayid o tasdeeq karti hai .

Mujh se Ibrahim bin Musa ne byaan kiya , kaha hum ko Hisham bin Yusuf ne khabar di , unhein Ibn Jurayj ne khabar di , un se Yala bin Muslim ne byaan kiya , unhein Saeed bin Jubayr ne khabar di aur unhein Ibn Abbas razi Allahu anhuma ne ke mushrikeen mein baaz ne qatl ka gunah kiya tha aur kasrat se kiya tha . Isi tarah zina-kaari bhi kasrat se karte rahe thay . Phir woh Nabi Karim salla Allahu alaihi wasallam ki khidmat mein aaye aur arz kiya ke Aap jo kuch kehte hain aur jis ki taraf dawat dete hain (yani Islam) yaqeenan achhi cheez hai , lekin hamain yeh bataiye ke ab tak hum ne jo gunah kiye hain woh Islam laane se maaf hon ge ya nahi ? Is par yeh aayat nazil hui «wallazhina la yad-u-na ma'allahi ilahan aakhara wa la yaqtuloonan-nafsallati harramallahu illa bil-haqqi wa la yaznoona» ”aur woh log jo Allah ke siwa aur kisi doosre mabood ko nahi pukaarte aur kisi bhi jaan ko qatl nahi karte jis ka qatl karna Allah ne haram kiya hai , haan magar haq ke saath“ aur yeh aayat nazil hui «qul ya ibadiyallazhina asrafoo ala anfusihim la taqnatoo min rahma-tillaahi» ”Aap keh dein ke Ae mere bando! Jo apne nafson par ziyadatiyaan kar chuke ho , Allah ki rahmat se na-umeed mat ho , beshak Allah saare gunahon ko maaf kar de ga . Beshak Allah woh bara hi bakhshne wala nihayat hi meherban hai .“