Hum se Ali bin Abdullah ne byaan kiya , kaha hum se Yaqoob bin Ibrahim bin Saad ne byaan kiya , kaha hum se mere walid ne byaan kiya , un se Salih ne , un se Ibn Shihab ne , kaha mujhe Ali bin Husain ne khabar di , unhein Husain bin Ali razi Allahu anhuma ne khabar di aur unhein Ali razi Allahu anhu ne ke Rasool Allah salla Allahu alaihi wasallam raat ke waqt un ke aur Fatima razi Allahu anha ke ghar aaye aur farmaya . Tum log tahajjud ki namaz nahi parhte (aakhir hadees tak) . «rajman bil-ghaybi» yani suni sunayi aur un ko khud kuch ilm nahi . «furutan» nadamat , sharmindagi . «suradiquha» yani qanaton ki tarah sab taraf se un ko aag gher le gi jaise kothri ko sab taraf se khaime gher lete hain . «yuhaawiruhu» , «muhaawaratun» se nikla hai yani guftagu karna , takrar karna . «laakinna huwallahu rabbi» asal mein «laakin ana huwallahu rabbi» tha «ana» ka hamza hazf kar ke noon ko noon mein idgham kar diya «laakinna» ho gaya . «khilaala-huma naharan» yani «baynahuma» un ke beech mein . «zalaqan» chakna , saaf jis par paon phisle (jame nahi) . «hunaalika-l-wilayatu» , «wilayatun» , «waliyyun» ka masdar hai . «uquban» , «aaqibatun» isi tarah «uqba» aur «uqubatun» sab ka ek hi maani hai yani aakhirat . «qubulan» aur «qibalun» aur «qubulun» (teenon tarah parha hai) yani samne aana . «liyudhidu» , «dahadun» se nikla hai yani phislana (matlab yeh hai ke haq baat ko nahaq karein) .

Lafz «huquban» ke maani zamana , is ki jama «ahqaabun» aati hai (baazon ne kaha ke ek «huqubun» sattar ya assi saal ka hota hai) .