Hum se Abdullah Bin Muhammad Bin Asma ne bayan kiya ‘ kaha hum se Juwairiya ne bayan kiya ‘ unhein Nafi ne ‘ un ko Ubaidullah Bin Abdullah aur Salim Bin Abdullah ne khabar di ke in dono ne Abdullah Bin Umar Radi Allahu Anhu se guftagu ki (dusri sanad) Imam Bukhari Rahimahullah ne kaha aur hum se Musa Bin Ismail ne bayan kiya ‘ in se Juwairiya ne bayan kiya aur in se Nafi ne ke Abdullah Bin Umar Radi Allahu Anhu ke kisi larke ne in se kaha ‘ agar is saal Aap (umra karne) na jate to behtar tha kyunke mujhe darr hai ke Aap Bait-Allah tak nahi pahunch sakein ge. Is par unhon ne kaha ke hum Rasul Allah Sallallahu Alaihi Wasallam ke sath nikle thay to kuffar-e-Quraish ne Bait-Allah pahunchne se rok diya tha. Chunancha Aap Sallallahu Alaihi Wasallam ne apni qurbani ke janwar wahin (Hudaibiya mein) zibah kar diye aur sar ke baal mundwa diye. Sahaba (Radi Allahu Anhum) ne bhi baal chhote karwa liye. Aap Sallallahu Alaihi Wasallam ne is ke baad farmaya ke mein tumhein gawah banata hoon ke mein ne apne upar ek umra wajib kar liya hai (aur isi tarah tamam sahaba Radi Allahu Anhum par bhi wo wajib ho gaya) agar aaj mujhe Bait-Allah tak jane diya gaya to mein tawaf kar loonga aur agar mujhe rok diya gaya to mein bhi wahi karunga jo Nabi Kareem Sallallahu Alaihi Wasallam ne kiya tha. Phir thori dur chale aur kaha ke mein tumhein gawah banata hoon ke mein ne apne upar umra ke sath hajj ko bhi zaroori qarar de liya hai aur kaha meri nazar mein to hajj aur umra dono ek hi jaise hain ‘ phir unhon ne ek tawaf kiya aur ek sayi ki (jis den Makka pahunche) aur dono hi ko poora kiya
.