Hum se Abdullah Bin Muhammad Bin Asma ne bayan kiya, kaha hum se Juwairiyah ne Nafi se bayan kiya, unhein Ubaidullah Bin Abdullah aur Salim Bin Abdullah ne khabar di ke jin dinon Abdullah Bin Zubair (Radi Allahu Anhuma) par Hajjaj ki lashkar kashi ho rahi thi to Abdullah Bin Umar (Radi Allahu Anhuma) se logon ne kaha (kyunke aap Makkah jana chahte thay) ke agar aap is saal Hajj na karein to koi nuqsan nahi kyunke darr is ka hai ke kahin aap ko Baitullah pohanchne se rok na diya jaye. Aap bole ke hum Rasul Allah (Sallallahu Alaihi Wasallam) ke sath gaye thay aur kuffar-e-Quraish hamare Baitullah tak pohanchne mein hayal ho gaye thay. Phir Nabi Kareem (Sallallahu Alaihi Wasallam) ne apni qurbani nahr ki aur sar munda liya, Abdullah ne kaha ke mein tumhein gawah banata hoon ke mein ne bhi In Sha Allah Umrah apne par wajib qarar de liya hai. Mein zaroor jaoon ga aur agar mujhe Baitullah tak pohanchne ka rasta mil gaya to tawaf karoon ga, lekin agar mujhe rok diya gaya to mein bhi wahi kaam karoon ga jo Nabi Kareem (Sallallahu Alaihi Wasallam) ne kiya tha, mein is waqt bhi Aap (Sallallahu Alaihi Wasallam) ke sath maujood tha chunanche aap ne Zhu-al-Hulaifah se Umrah ka ihram bandha phir thori door chal kar farmaya ke Hajj aur Umrah to ek hi hain, ab mein bhi tumhein gawah banata hoon ke mein ne Umrah ke sath Hajj bhi apne oopar wajib qarar de liya hai, aap ne Hajj aur Umrah donon se ek sath farigh ho kar hi daswein Dhul Hijjah ko ihram khola aur qurbani ki. Aap farmate thay ke jab tak haji Makkah pohanch kar ek tawaf-e-ziyarat na kar le poora ihram na kholna chahiye
.