Aur Allah Ta'ala ne farmaya ”pas tum agar rok diye jao to jo qurbani maysar ho wo Makkah bhejo aur apne sar is waqt tak na mundao (yani ihram na kholo) jab tak qurbani ka janwar apne thikane“ (yani Makkah pohanch kar zabah na ho jaye) aur Ata Bin Abi Rabah (Rahimahullah) ne kaha ke jo cheez bhi roke is ka yehi hukm hai
.

Hum se Abdullah Bin Yusuf ne bayan kiya, kaha ke hum ko Imam Malik ne khabar di, unhein Nafi ne ke Abdullah Bin Umar (Radi Allahu Anhuma) fasad ke zamana mein Umrah karne ke liye jab Makkah jane lage to Aap ne farmaya ke agar mujhe Kaabah Shareef pohanchne se rok diya gaya to mein bhi wahi kaam karoon ga jo Rasul Allah (Sallallahu Alaihi Wasallam) ke sath hum logon ne kiya tha, chunanche Aap ne bhi sirf Umrah ka ihram bandha kyunke Rasul Allah (Sallallahu Alaihi Wasallam) ne bhi Hudaibiyah ke saal sirf Umrah ka ihram bandha tha
.