Aur Allah Ta’ala ne farmaaya hai ke Allah tumhaare imaan ko zaaye’ karne waala nahi. Yani tumhaari woh namazain jo tum ne Bait-ul-Muqaddas ki taraf munh kar ke padhi hain, qabool hain.

Hum se Amr bin Khalid ne bayan kiya, unhon ne kaha hum se Zubair ne bayan kiya, unhon ne kaha hum se Abu Ishaaq ne bayan kiya, un ko Bara bin Aazib Radhiallahu Anhu ne khabar di ke Rasoolullah Sallallahu Alaihi Wasallam jab Madinah tashreef laaye to pehle apni nanihaal mein utre, jo ansaar the. Aur wahaan Aap Sallallahu Alaihi Wasallam ne solah ya sattrah maah Bait-ul-Muqaddas ki taraf munh kar ke namaz padhi aur Aap Sallallahu Alaihi Wasallam ki khwahish thi ke aap ka qibla Baitullah ki taraf ho (jab Baitullah ki taraf namaz padhne ka hukm ho gaya) to sab se pehli namaz jo Aap Sallallahu Alaihi Wasallam ne Baitullah ki taraf padhi Asr ki namaz thi. Wahaan Aap Sallallahu Alaihi Wasallam ke saath logon ne bhi namaz padhi, phir Aap ke saath namaz padhne waalon mein se ek aadmi nikla aur us ka masjid (Bani Haarisa) ki taraf guzar huwa to woh log Ruku’ mein the. Woh bola ke main Allah ki gawaahi deta hun ke main ne Rasoolullah Sallallahu Alaihi Wasallam ke saath Makkah ki taraf munh kar ke namaz padhi hai. (Yeh sun kar) woh log usi haalat mein Baitullah ki taraf ghoom gaye aur jab Rasoolullah Sallallahu Alaihi Wasallam Bait-ul-Muqaddas ki taraf munh kar ke namaz padha karte the, yahood aur Isaayi khush hote the Magar jab Aap Sallallahu Alaihi Wasallam ne Baitullah ki taraf munh phair liya to unhein yeh amr na-gawaar huwa. Zubair (ek rawi) kehte hain ke hum se Abu Ishaaq ne Bara se yeh Hadees bhi naql ki hai ke qibla ki tabdeeli se pehle kuch musalmaan inteqaal kar chuke the. To hamein yeh ma’loom na ho saka ke un ki namaazon ke baare mein kya kahen. Tab Allah ne yeh Aayat naazil ki «وَمَا كَانَ اللَّهُ لِيُضِيعَ إِيمَانَكُمْ» (Al-Baqrah: 143).