Hum se Abdullah Bin Maslama ne bayan kiya, kaha hum se Imam Malik ne, un se Yahya Bin Said ne, un se Ibn Aflah ne, un se Abu Qatada ke ghulam Abu Muhammad ne aur un se Abu Qatada (Radi Allahu Anhu) ne bayan kiya ke Ghazwa Hunain ke saal hum Rasul Allah (Sallallahu Alaihi Wasallam) ke sath rawana hue. Phir jab hamara dushman se samna hua to (ibtida mein) Islami lashkar haarne laga. Itne mein mein ne dekha ke Mushrikeen ke lashkar ka ek shakhs ek Musalman ke upar chadha hua hai. Is liye mein fauran hi ghoom pada aur is ke peechhe se aa kar talwar is ki gardan par mari. Ab wo shakhs mujh par toot pada, aur mujhe itni zor se us ne bhaincha ke meri rooh jaise qabz hone ko thi. Aakhir jab us ko maut ne aa dabocha, tab kahin ja kar us ne mujhe chhoda. Is ke baad mujhe Umar Bin Khattab (Radi Allahu Anhu) mile, to mein ne un se pucha ke Musalman ab kis halat mein hain? Unhon ne kaha ke jo Allah ka hukm tha wahi hua. Lekin Musalman haarne ke baad phir muqabala par sanbhal gaye to Nabi Kareem (Sallallahu Alaihi Wasallam) baith gaye aur farmaya ke jis ne bhi kisi kafir ko qatl kiya ho aur is par wo gawah bhi pesh kar de to maqtool ka sara saaz-o-saman ise hi milega (Abu Qatada Radi Allahu Anhu ne kaha) mein bhi khada hua. Aur mein ne kaha ke meri taraf se kaun gawahi dega? Lekin (jab meri taraf se koi na utha to) mein baith gaya. Phir dobara Nabi Kareem (Sallallahu Alaihi Wasallam) ne farmaya ke (aaj) jis ne kisi kafir ko qatl kiya aur is par is ki taraf se koi gawah bhi ho to maqtool ka sara saman ise milega. Is martaba phir mein ne khade ho kar kaha ke meri taraf se kaun gawahi dega? Aur phir mujhe baithna pada. Teesri martaba phir Nabi Kareem (Sallallahu Alaihi Wasallam) ne wahi irshad doharaya aur is martaba jab mein khada hua to Nabi Kareem (Sallallahu Alaihi Wasallam) ne khud hi daryaft farmaya, kis cheez ke mutaliq keh rahe ho Abu Qatada! Mein ne Nabi Kareem (Sallallahu Alaihi Wasallam) ke samne sara waqiya bayan kar diya, to ek sahab (Aswad Bin Khuzaee Aslami) ne bataya ke Abu Qatada sach kehte hain, Ya Rasul Allah! Aur is maqtool ka saman mere paas mahfooz hai. Aur mere haq mein unhein razi kar dijiye (ke wo maqtool ka saman mujh se na lein) lekin Abu Bakr Siddique (Radi Allahu Anhu) ne kaha ke nahi Allah ki qasam! Allah ke ek sher ke sath, jo Allah aur us ke Rasul ke liye lade, Nabi Kareem (Sallallahu Alaihi Wasallam) aisa nahi kareinge ke un ka saman tumhein de dein, Aap (Sallallahu Alaihi Wasallam) ne farmaya ke Abu Bakr ne sach kaha hai. Phir Aap ne saman Abu Qatada (Radi Allahu Anhu) ko ata farmaya. Abu Qatada ne kaha ke phir is ki zirah bech kar mein ne Bani Salima mein ek bagh khareed liya aur ye pehla mal tha jo Islam lane ke baad mein ne hasil kiya tha
.