Aur Imran Bin Husain (Radi Allahu Anhuma) ne fitna ke zamana mein hathiyar bechna makrooh rakkha
.

Hum se Abdullah Bin Muslimah ne bayan kiya, kaha ke hum se Imam Malik ne kaha, un se Yahya Bin Saeed ne kaha, un se Ibn Aflah ne, un se Abu Qatada (Radi Allahu Anhu) ke ghulam Abu Muhammad ne aur un se Abu Qatada (Radi Allahu Anhu) ne ke hum ghazwa-e-Hunain ke saal Rasul Allah (Sallallahu Alaihi Wasallam) ke sath nikle. Nabi Kareem (Sallallahu Alaihi Wasallam) ne mujhe ek zarah tohfa di aur mein ne usay bech diya. Phir mein ne is ki qeemat se qabeela-e-Bani Salama mein ek bagh khareed liya. Ye pehli jaidad thi jisay mein ne Islam lane ke baad hasil kiya
.