Aur doosre log ye keh dein ke hamein is silsile mein kuch maloom nahi to faisla usi ke qoul ke mutabiq ho ga jis ne isbat mein gawahi di hai
.

Humaidi ne kaha ke ye aisa hai jaise Bilal (Radi Allahu Anhu) ne khabar di thi ke Nabi Kareem (Sallallahu Alaihi Wasallam) ne Kaabah mein namaz parhi hai aur Fazl (Radi Allahu Anhu) ne kaha tha ke Aap (Sallallahu Alaihi Wasallam) ne (Kaabah ke andar) namaz nahi parhi. To tamam logon ne Bilal (Radi Allahu Anhu) ki gawahi ko tasleem kar liya. Isi tarah agar do gawahon ne is ki gawahi di ke falan shaks ke falan par ek hazar dirham hain aur doosre do gawahon ne gawahi di ke derh hazar dirham hain to faisla zyada ki gawahi dene walon ke qoul ke mutabiq ho ga
.

Hum se Habban ne bayan kiya, kaha ke hum ko Abdullah ne khabar di, kaha hum ko Amr Bin Saeed Bin Abi Hussain ne khabar di, kaha ke mujhe Abdullah Bin Abi Mulaika ne khabar di aur unhein Uqbah Bin Haris (Radi Allahu Anhu) ne ke unhon ne Abu Ihab Bin Aziz ki larki se shadi ki thi. Ek khatoon aaein aur kehne lagein ke Uqbah ko bhi mein ne doodh pilaya hai aur ise bhi jis se us ne shadi ki hai. Uqbah (Radi Allahu Anhu) ne kaha ke mujhe to maloom nahi ke aap ne mujhe doodh pilaya hai aur aap ne mujhe pehle is silsile mein kuch bataya bhi nahi tha. Phir unhon ne Aal-e-Abu Ihab ke yahan aadmi bheja ke un se is ke mutalliq pooche. Unhon ne bhi yahi jawab diya ke hamein maloom nahi ke unhon ne doodh pilaya hai. Uqbah (Radi Allahu Anhu) ab Rasul Allah (Sallallahu Alaihi Wasallam) ki khidmat mein Madinah hazir hue aur Aap (Sallallahu Alaihi Wasallam) se masla poocha. Aap (Sallallahu Alaihi Wasallam) ne farmaya, ab kya ho sakta hai jab ke kaha ja chuka. Chunanchay Aap (Sallallahu Alaihi Wasallam) ne donon mein judayi kara di aur is ka nikah doosre shaks se kara diya
.