Aur Anas (Radi Allahu Anhu) ne kaha ke ghalam agar adil hai to is ki gawahi jaiz hai, Shureih aur Zurara Bin Awfa ne bhi ise jaiz qarar diya hai. Ibn Sirin ne kaha ke is ki gawahi jaiz hai, siwa is soorat ke jab ghalam apne malik ke haq mein gawahi de (kyunke is mein malik ki taraf-dari ka ihtimal hai) Hasan aur Ibrahim ne mamooli cheezon mein ghalam ki gawahi ki ijazat di hai. Qazi Shureih ne kaha ke tum mein se har shaks ghalamou aur bandiyou ki aulad hai
.

Hum se Abu Asim ne bayan kiya, kaha hum se Ibn Juraij ne, wo Ibn Abi Mulaika se, un se Uqbah Bin Haris (Radi Allahu Anhu) ne (doosri sanad) Imam Bukhari (Rahimahullah) ne kaha aur hum se Ali Bin Abdullah ne bayan kiya, kaha hum se Yahya Bin Saeed ne bayan kiya, un se Ibn Juraij ne bayan kiya ke mein ne Ibn Abi Mulaika se suna, kaha ke mujh se Uqbah Bin Haris (Radi Allahu Anhu) ne bayan kiya, ya (ye kaha ke) mein ne ye hadees un se suni ke unhon ne Umm-e-Yahya Bint Abi Ihab se shadi ki thi. Unhon ne bayan kiya ke phir ek siyah rang wali bandi aayi aur kehne lagi ke mein ne tum donon ko doodh pilaya hai. Mein ne is ka zikar Rasul Allah (Sallallahu Alaihi Wasallam) se kiya, to Aap (Sallallahu Alaihi Wasallam) ne meri taraf se munh pher liya pas mein juda ho gaya. Mein ne phir Aap (Sallallahu Alaihi Wasallam) ke samne ja kar is ka zikar kiya, to Aap (Sallallahu Alaihi Wasallam) ne farmaya, ab (nikah) kaise (baqi reh sakta hai) jabke tumhein is aurat ne bata diya hai ke is ne tum donon ko doodh pilaya tha. Chunanchay Aap (Sallallahu Alaihi Wasallam) ne unhein Umm-e-Yahya ko apne sath rakhne se mana farma diya
.