Hum se Ubaidullah Bin Saeed ne bayan kiya, kaha hum se Abu Usama ne bayan kiya, kaha hum se Ismail ne bayan kiya, un se Qais ne aur un se Abu Hurairah (Radi Allahu Anhu) ne ke jab mein Nabi Kareem (Sallallahu Alaihi Wasallam) ki khidmat mein hazir hua tha to aate hue raste mein ye sher kaha tha: Hai pyari go kathan hai aur lambi meri raat, par dilayi is ne Dar-ul-Kufr se mujh ko najat. Unhon ne bayan kiya ke raste mein mera ghalam mujh se bichar gaya tha. Phir jab mein Nabi Kareem (Sallallahu Alaihi Wasallam) ki khidmat mein hazir hua to Islam par qaim rehne ke liye mein ne Aap (Sallallahu Alaihi Wasallam) se baiat kar li. Mein abhi Aap (Sallallahu Alaihi Wasallam) ke paas baitha hi hua tha ke wo ghalam dikhayi diya. Rasul Allah (Sallallahu Alaihi Wasallam) ne farmaya, Abu Hurairah! ye dekh tera ghalam bhi aa gaya. Mein ne kaha, Ya Rasul Allah! wo Allah ke liye azad hai. Phir mein ne ise azad kar diya. Imam Bukhari (Rahimahullah) farmate hain ke Abu Kuraib ne (apni Riwayat mein) Abu Usama se ye lafz nahi Riwayat kiya ke wo azad hai
.