Abu Musa Ash’ari Radhiallahu Anhu ne Daar-e-Bareed mein Namaz padhi (halaanke wahan gobar tha) aur ek pehlu mein jangal tha. Phir unhon ne kaha yeh jagah aur woh jagah barabar hain.

Hum se Sulaiman bin Harb ne bayan kiya, unhon ne Hammad bin Zaid se, woh Ayyub se, woh Abu Qilaabah se, woh Anas Radhiallahu Anhu se riwayat karte hain ke kuch log ’Ukl ya ’Uraina (qabeelon) ke Madinah mein aaye aur beemaar ho gaye. Rasoolullah Sallallahu Alaihi Wasallam ne unhein Liqaah mein jaane ka hukm diya aur farmaaya ke wahan oonton ka doodh aur peshaab piyen. Chunanche woh Liqaah chale gaye aur jab achche ho gaye to Rasoolullah Sallallahu Alaihi Wasallam ke charwaahe ko qatl kar ke woh jaanwaron ko haank kar le gaye. Alas-subah Rasoolullah Sallallahu Alaihi Wasallam ke paas (is waqiya ki) khabar aayi. To Aap ne un ke peeche aadmi daudaaye. Din chadhe woh Nabi Kareem Sallallahu Alaihi Wasallam ki khidmat mein pakad kar laaye gaye. Aap ke hukm ke mutabiq un ke haath paaon kaat diye gaye aur aankhon main garam salakhain pher di gayien aur (Madinah ki) pathreeli zameen mein daal diye gaye. (piyaas ki shiddat se) woh paani maangte the magar unhein paani nahi diya jaata tha. Abu Qilaabah ne (un ke jurm ki sangeeni zahir karte huwe) kaha ke un logon ne chori ki aur charwaahon ko qatl kiya aur (aakhir) imaan se phir gaye aur Allah aur us ke Rasool se jung ki.