Aur Allah Ta'ala ka irshad ”aur jab ke bana diya Hum ne Khana-e-Kaaba ko baar baar loutne ki jagah logon ke liye aur kar diya us ko aman ki jagah aur (hukm diya Hum ne) ke Maqam-e-Ibrahim ko namaaz parhne ki jagah banao aur Hum ne Ibrahim aur Ismail se ehad liya ke woh dono paak kar dein Mere makaan ko tawaf karne walon aur i'tikaf karne walon aur ruku sajda karne walon ke liye . Ae Allah! Kar de is shehar ko aman ki jagah aur yahan ke in rehne walon ko phalon se rozi de jo Allah aur yaum-e-aakhirat par imaan layein sirf un ko , is ke jawab mein Allah Ta'ala ne farmaya aur jis ne kufr kiya us ko main duniya mein chand roz maze karne doon ga phir usay dozakh ke azaab mein kheench laon ga aur woh bura thikaana hai . Aur jab Ibrahim wa Ismail alaihimas-salam Khana-e-Kaaba ki buniyaad utha rahe thay (to woh yun dua kar rahe thay) «rabbana taqabbal minna innaka antas-samee'ul-aleem * rabbana waj'alna muslimaini laka wa-min zurriyyatina ummatam-muslimatan laka wa-arina manasikana wa-tub alaina innaka antat-tawwabur-raheem» ae hamare Rabb! Hamari is koshish ko qabool farma . Tu hi hamari (dua'on ko) sunne wala aur (hamari niyat'on ka) jaanne wala hai . Ae hamare Rabb! Humein apna farman-bardar bana aur hamari nasal se ek jamaat banaiyo jo Teri farman-bardar ho . Hum ko ahkaam-e-Hajj sikha aur hamare haal par tawajjo farma ke Tu bahut hi tawajjo farmane wala hai . Aur bara raheem hai .

Hum se Abdullah bin Muhammad Musandi ne byaan kiya , kaha ke hum se Abu Asim Nabeel ne byaan kiya , kaha ke mujhe Ibn Juraij ne khabar di , kaha ke mujhe Amru bin Dinar ne khabar di , kaha ke maine Jabir bin Abdullah razi Allahu anhuma se suna , unhon ne byaan kiya ke (zamana-e-jahiliyat mein) jab Kaaba ki tameer hui to Nabi Karim salla Allahu alaihi wasallam aur Abbas razi Allahu anhu bhi patthar utha kar la rahe thay . Abbas razi Allahu anhu ne Nabi Karim salla Allahu alaihi wasallam se kaha ke apna tehband utaar kar kandhe par daal lo (taake patthar uthane mein takleef na ho) Nabi Karim salla Allahu alaihi wasallam ne aisa kiya to nange hote hi behosh ho kar Aap zameen par gir pare aur Aap ki aankhein aasman ki taraf lag gayin . Aap kehne lage mujhe mera tehband de do . Phir Aap salla Allahu alaihi wasallam ne usay mazboot baandh liya .