Aur Umar razi Allahu anhu ne kaha ke main namaaz parhta rehta hoon aur namaaz hi mein jihad ke liye apni fauj ka saman kiya karta hoon .

Hum se Ishaq bin Mansoor ne byaan kiya , kaha ke hum se Rawh bin Ubadah ne , kaha ke hum se Umar ne jo Saeed ke bete hain , unhon ne kaha ke mujhe Ibn Abi Mulaykah ne khabar di Uqbah bin Harith razi Allahu anhu se , unhon ne kaha ke main ne Nabi Karim salla Allahu alaihi wasallam ke saath Asar ki namaaz parhi . Aap salla Allahu alaihi wasallam salam pherte hi bari teezi se uthe aur apni ek biwi ke hujra mein tashreef le gaye , phir bahar tashreef laaye . Aap salla Allahu alaihi wasallam ne apni jaldi par is taajub o hairat ko mehsoos kiya jo sahaba ke chehron se zahir ho raha tha , is liye Aap salla Allahu alaihi wasallam ne farmaya ke namaaz mein mujhe sone ka ek dalla yaad aa gaya jo hamare paas taqseem se baaqi reh gaya tha . Mujhe bura maloom hua ke hamare paas woh shaam tak ya raat tak reh jaye . Is liye main ne ise taqseem karne ka hukm de diya .