Hum se Muhammad bin Muqatil ne byaan kiya , kaha ke hum ko Abdullah bin Mubarak ne khabar di , kaha ke hum ko Yunus ne khabar di , unhein Zuhri ne , un se Urwah ne byaan kiya ke Aisha razi Allahu anha ne batlaya ke jab sooraj grahan laga to Nabi Karim salla Allahu alaihi wasallam (namaaz ke liye) kharay huay aur ek lambi surat parhi . Phir ruku kiya aur bohat lamba ruku kiya . Phir sar uthaya is ke baad doosri surat shuru kar di , phir ruku kiya aur ruku poora kar ke is rakat ko khatm kiya aur sajde mein gaye . Phir doosri rakat mein bhi Aap salla Allahu alaihi wasallam ne isi tarah kiya , namaaz se farigh ho kar Aap salla Allahu alaihi wasallam ne farmaya ke sooraj aur chaand Allah ki nishaniyon mein se do nishaniyan hain . Is liye jab tum un mein grahan dekho to namaaz shuru kar do jab tak ke yeh saaf ho jaye aur dekho main ne apni isi jagah se in tamam cheezon ko dekh liya hai jin ka mujh se waada hai . Yahan tak ke main ne yeh bhi dekha ke main Jannat ka ek khosha lena chahta hoon . Abhi tum logon ne dekha ho ga ke main aage barhne laga tha aur main ne Dozakh bhi dekhi (is haalat mein ke) baaz aag baaz aag ko khaye ja rahi thi . Tum logon ne dekha ho ga ke Jahannam ke is haulnak manzar ko dekh kar main peeche hat gaya tha . Main ne Jahannam ke andar Amr bin Luhai ko dekha . Yeh woh shakhs hai jis ne saand ki rasm Arab mein jaari ki thi . (note: saand ki rasm se murad ke ountni ko ghair Allah ke naam par chhor dena hatta ke sawari aur doodh bhi na dhona .)