Aur Qatadah ne kaha ke agar kisi ka kapra chor le bhage to is ke peeche daure aur namaaz chhor de .

Hum se Adam bin Abi Iyas ne byaan kiya , kaha ke hum se Shubah ne byaan kiya , un se Arzuq bin Qays ne byaan kiya , kaha ke hum Ahwaz mein (jo kai bastiyan hain Basra aur Iran ke beech mein) Kharijiyon se jang kar rahe thay . Ek baar mein nahar ke kinare baitha tha . Itne mein ek shakhs (Abu Barzah sahabi razi Allahu anhu) aaya aur namaaz parhne laga . Kya dekhta hoon ke un ke ghore ki lagam un ke haath mein hai . Achanak ghora un se chhoot kar bhagne laga . To woh bhi is ka peechha karne lage . Shubah ne kaha yeh Abu Barzah Aslami razi Allahu anhu thay . Yeh dekh kar Khawarij mein se ek shakhs kehne laga ke ae Allah! is sheikh ka naas kar . Jab woh sheikh wapas laute to farmaya ke main ne tumhari baatein sun li hain . Main ne Rasool Allah salla Allahu alaihi wasallam ke saath chhay ya saat ya aath jihadon mein shirkat ki hai aur main ne Aap salla Allahu alaihi wasallam ki aasaniyon ko dekha hai . Is liye mujhe yeh achha maloom hua ke apna ghora saath le kar lautoon na ke is ko chhor doon woh jahan chahe chal de aur main takleef uthaoon .