Hum se Abd-ul-Salam bin Mutahhar ne bayan kiya , unhon ne kaha hum se Umar bin Ali bin Ata ne bayan kiya , in se Maan bin Muhammad Ghifari ne , in se Saeed bin Abi Saeed Muqbiri ne aur in se Abu Hurairah razi Allahu anhu ne bayan kiya ke Nabi Karim salla Allahu alaihi wasallam ne farmaya ”Allah Ta'ala ne is aadmi ke uzhr ke silsile mein hujjat tamam kar di jis ki maut ko muakh-khar kiya yahan tak ke woh saath saal ki umr ko pahunch gaya .“ Is riwayat ki mutabia-t Abu Hazim aur Ibn Ajlan ne Muqbiri se ki .

Hum se Ali bin Abdullah Madini ne bayan kiya , unhon ne kaha hum se Abu Safwan Abdullah bin Saeed ne bayan kiya , unhon ne kaha hum se Yunus ne bayan kiya , in se Ibn Shihab ne bayan kiya ke hum ko Saeed bin al-Musayyab ne khabar di aur in se Abu Hurairah razi Allahu anhu ne bayan kiya ke main ne Rasool Allah salla Allahu alaihi wasallam se suna , Nabi Karim salla Allahu alaihi wasallam ne farmaya ”burhay insan ka dil do cheezon ke baare mein hamesha jawan rehta hai , duniya ki mohabbat aur zindagi ki lambi umeed .“ Layth ne bayan kiya ke mujh se Yunus ne bayan kiya aur Yunus ne Ibn Shihab se bayan kiya ke mujhe Saeed aur Abu Salamah ne khabar di .

Hum se Muslim bin Ibrahim ne bayan kiya , unhon ne kaha hum se Hisham bin Urwah ne bayan kiya , in se Qatadah ne bayan kiya aur in se Anas bin Malik razi Allahu anhu ne bayan kiya ke Rasool Allah salla Allahu alaihi wasallam ne farmaya ”insan ki umr barhti jaati hai aur is ke saath do cheezin is ke andar barhti jaati hain , maal ki mohabbat aur umr ki darazi .“ Is ki riwayat Shubah ne Qatadah se ki hai .

Is baab mein Saad bin Abi Waqqas razi Allahu anhu ki riwayat hai jo unhon ne Nabi Karim salla Allahu alaihi wasallam se naqal kiya hai .

Hum se Maaz bin Asad ne bayan kiya , kaha hum ko Abdullah bin Mubarak ne khabar di , unhein Mamar ne khabar di , in se Zuhri ne bayan kiya ke mujhe Mahmood bin Rabee Ansari ne khabar di aur woh kehte thay ke Rasool Allah salla Allahu alaihi wasallam ki yeh baat khoob mere zaihan mein mahfooz hai . Unhein yaad hai ke Nabi Karim salla Allahu alaihi wasallam ne in ke ek doul mein se pani le kar mujh par kulli kar di thi .

Unhon ne bayan kiya ke Utban bin Malik Ansari razi Allahu anhu se main ne suna , phir Bani Salim ke ek sahab se suna , unhon ne bayan kiya ke Nabi Karim salla Allahu alaihi wasallam mere yahan tashreef laaye aur farmaya ”koi banda jab Qayamat ke din is halat mein pesh ho ga ke us ne kalma «laa ilaaha illallaahu» ka iqrar kiya ho ga aur is se is ka maqsud Allah ki khushnoodi haasil karna ho gi to Allah Ta'ala dozakh ki aag ko is par haram kar de ga .“

Hum se Qutaybah bin Saeed ne bayan kiya , kaha hum se Yaqoob bin Abd-ul-Rahman ne bayan kiya , in se Amr bin Abi Amr ne , in se Saeed Muqbiri ne aur in se Abu Hurairah razi Allahu anhu ne ke Rasool Allah salla Allahu alaihi wasallam ne farmaya ”Allah Ta'ala farmata hai ke mere is momin bande ka jis ki , main koi azeez cheez duniya se utha loon aur woh is par sawab ki niyat se sabr kar le , to is ka badla mere yahan jannat ke siwa aur kuch nahi .“

Hum se Ismail bin Abdullah ne bayan kiya , unhon ne kaha ke mujh se Ismail bin Ibrahim bin Uqbah ne bayan kiya , in se Musa bin Uqbah ne kaha ke Ibn Shihab ne bayan kiya ke mujh se Urwah bin Zubayr ne bayan kiya aur unhein Miswar bin Makhrama razi Allahu anhu ne khabar di ke Amr bin Auf razi Allahu anhu jo Bani Aamir bin Adi ke haleef thay aur Badr ki larayi mein Rasool Allah salla Allahu alaihi wasallam ke saath thay , unhon ne unhein khabar di ke Nabi Karim salla Allahu alaihi wasallam ne Abu Ubaidah bin al-Jarrah razi Allahu anhu ko Bahrain wahan ka jizyah laane ke liye bheja , Nabi Karim salla Allahu alaihi wasallam ne Bahrain walon se sulah kar li thi aur un par Ala bin al-Hazrami ko ameer muqarrar kiya tha . Jab Abu Ubaidah razi Allahu anhu Bahrain se jizyah ka maal le kar aaye to Ansar ne in ke aane ke mutalliq suna aur subah ki namaz Nabi Karim salla Allahu alaihi wasallam ke saath parhi aur jab Nabi Karim salla Allahu alaihi wasallam unhein dekh kar muskuraye aur farmaya mera khayal hai ke Abu Ubaidah ke aane ke mutalliq tum ne sun liya hai aur yeh bhi ke woh kuch le kar aaye hain ? Ansar ne arz kiya: ji haan , ya Rasool Allah! Nabi Karim salla Allahu alaihi wasallam ne farmaya ke phir tumhein khush-khabri ho tum is ki umeed rakkho jo tumhein khush kar de gi , Allah ki qasam! Faqr o muhtaji woh cheez nahi hai jis se main tumhare mutalliq darta hoon balkay main to is se darta hoon ke duniya tum par bhi isi tarah kushada kar di jaye gi , jis tarah in logon par kar di gayi thi jo tum se pehle thay aur tum bhi is ke liye ek doosre se aage barhne ki isi tarah koshish karo ge jis tarah woh karte thay aur tumhein bhi isi tarah ghafil kar de gi jis tarah in ko ghafil kiya tha .

Hum se Qutaybah bin Saeed ne bayan kiya , unhon ne kaha hum se Layth bin Saad ne bayan kiya , in se Yazid bin Abi Habeeb ne bayan kiya , in se Abu al-Khair ne bayan kiya aur in se Uqbah bin Aamir razi Allahu anhu ne ke Rasool Allah salla Allahu alaihi wasallam bahar tashreef laaye aur Jang e Uhud ke shaheedon ke liye is tarah namaz parhi jis tarah murda par namaz parhi jaati hai . Phir Aap salla Allahu alaihi wasallam mimbar par tashreef laaye aur farmaya aakhirat mein main tum se aage jaoon ga aur main tum par gawah hoon ga , wallah main apne hauz ko is waqt bhi dekh raha hoon aur mujhe zameen ke khazanon ki kunjiyan di gayi hain ya (farmaya ke) zameen ki kunjiyan di gayi hain aur Allah ki qasam! Main tumhare mutalliq is se nahi darta ke tum mere baad shirk karo ge balkay mujhe tumhare mutalliq yeh khauf hai ke tum duniya ke liye ek doosre se aage barhne ki koshish karne lago ge .

Hum se Ismail bin Abi Oways ne bayan kiya , kaha ke mujh se Imam Malik ne bayan kiya , in se Zayd bin Aslam ne , in se Ata bin Yasar ne aur in se Abu Saeed razi Allahu anhu ne bayan kiya ke Rasool Allah salla Allahu alaihi wasallam ne farmaya ke main tumhare mutalliq sab se zyada is se khauf khaata hoon ke jab Allah Ta'ala zameen ki barakatein tumhare liye nikaal de ga . Poochha gaya zameen ki barakatein kya hain ? Farmaya ke duniya ki chamak damak , is par ek sahabi ne Nabi Karim salla Allahu alaihi wasallam se poochha kya bhalayi se burayi paida ho sakti hai ? Nabi Karim salla Allahu alaihi wasallam is par khamosh ho gaye aur hum ne khayal kiya ke shayad Aap par wahi nazil ho rahi hai . Is ke baad apni peshani ko saaf karne lage aur daryaft farmaya , poochne wale kahan hain ? Poochne wale ne kaha ke hazir hoon . Abu Saeed Khudri razi Allahu anhu ne kaha ke jab is sawal ka hal hamare samne aa gaya to hum ne in sahab ki tareef ki . Nabi Karim salla Allahu alaihi wasallam ne farmaya ke bhalayi se to sirf bhalayi hi paida hoti hai lekin yeh maal sarsabz aur khush-gawar (ghaas ki tarah) hai aur jo cheez bhi Rabee ke mausam mein ugti hain woh hirs ke saath khane walon ko halak kar deti hain ya halakat ke qareeb pahuncha deti hain . Siwaye is janwar ke jo pait bhar ke khaye ke jab us ne kha liya aur is ki donon kookh bhar gayiein to us ne sooraj ki taraf munh kar ke jugali kar li aur phir pakhana peshab kar diya aur is ke baad phir laut ke kha liya aur yeh maal bhi bahut shireen hai jis ne usay haq ke saath liya aur haq mein kharch kiya to woh behtareen zariya hai aur jis ne usay najaiz tariqa se haasil kiya to woh is shakhs jaisa hai jo khaata hai lekin aasuda nahi hota .