Hum se Qubaysah bin Uqbah ne bayan kiya, kaha hum se Sufyan Sawri ne bayan kiya, in se Abd-ul-Malik bin Umair ne, in se Rabee bin Hirash ne aur in se Huzayfah bin Yaman razi Allahu anhu ne bayan kiya ke Nabi Karim salla Allahu alaihi wasallam jab apne bistar par laytte to yeh kehte «bi-ismika amootu wa ahyaa» ”tere hi naam ke saath main murda aur zinda rehta hoon“ aur jab bedar hote to kehte «al-hamdu lillaahil-lazhee ahyaanaa ba-da maa amaatanaa wa ilaihin-nushooru» ”isi Allah ke liye tamam tareefein hain jis ne hamain zinda kiya. Is ke baad ke us ne maut tari kar di thi aur isi ki taraf lautna hai.“ Quran Shareef mein jo lafz «nunshiruha» hai is ka bhi yahi maani hai ke hum is ko nikaal kar uthate hain.

Hum se Saeed bin Rabee aur Muhammad bin Ar-ara ne bayan kiya, in donon ne kaha ke hum se Shubah ne bayan kiya, in se Abu Ishaq ne bayan kiya, unhon ne Bara bin Azib razi Allahu anhuma se suna ke Nabi Karim salla Allahu alaihi wasallam ne ek sahabi ko hukm diya (doosri sanad) Imam Bukhari rahmahullah ne kaha ke hamase Adam ne bayan kiya, unhon ne kaha hum se Shubah ne bayan kiya in se Abu Ishaq Hamdani ne bayan kiya, aur in se Bara bin Azib razi Allahu anhuma ne bayan kiya ke Nabi Karim salla Allahu alaihi wasallam ne ek sahabi ko wasiyat kiya aur farmaya ke jab bistar par jaane lago to yeh dua parha karo «allaahumma aslamtu nafsee ilaika wa fau-wadtu amree ilaika wa waj-jahtu waj-hee ilaika wa aljatu zhahree ilaika raghbatan wa rahbatan ilaika laa malja-a wa laa manjaa minka illaa ilaika aamantu bi-kitaabikal-lazhee anzalta wa bi-nabiy-yikal-lazhee arsalta» ”Ae Allah! Main ne apni jaan tere supard ki aur apna muamla tujhe saunpa aur apne Aap ko teri taraf mutawaj-jo kiya aur tujh par bharosa kiya, teri taraf raghbat hai tere khauf ki wajah se, tujh se tere siwa koi jaye panah nahi, main teri kitab par iman laya jo tu ne nazil ki aur tere Nabi par jinhein tu ne bheja.“ Phir agar woh mara to fitrat (Islam) par mare ga.

Hum se Musa bin Ismail ne bayan kiya, kaha hum se Abu Awanah ne bayan kiya, in se Abd-ul-Malik bin Umair ne, in se Rabee ne aur in se Huzayfah razi Allahu anhu ne bayan kiya ke Nabi Karim salla Allahu alaihi wasallam jab raat mein bistar par laytte to apna hath apne rukhsar ke neeche rakhte aur yeh kehte «allaahumma bi-ismika amootu wa ahyaa» ”Ae Allah! Tere naam ke saath marta hoon aur zinda hota hoon.“ Aur jab Aap bedar hote to kehte «al-hamdu lillaahil-lazhee ahyaanaa ba-da maa amaatanaa wa ilaihin-nushooru» ”tamam tareefein is Allah ke liye hain jis ne hamain zinda kiya is ke baad ke hamain maut (murad neend hai) de di thi aur teri hi taraf jaana hai.“

Hum se Musaddad ne bayan kiya, unhon ne kaha hum se Abd-ul-Wahid ne bayan kiya, unhon ne kaha hum se Alaa bin Musayyab ne bayan kiya, unhon ne kaha ke mujh se mere baap ne bayan kiya aur in se Bara bin Azib razi Allahu anhuma ne bayan kiya ke Rasool Allah salla Allahu alaihi wasallam jab apne bistar par laytte to dayein pehlu par laytte aur phir kehte «allaahumma aslamtu nafsee ilaika wa waj-jahtu waj-hee ilaika wa fau-wadtu amree ilaika wa aljatu zhahree ilaika raghbatan wa rahbatan ilaika laa malja-a wa laa manjaa minka illaa ilaika aamantu bi-kitaabikal-lazhee anzalta wa nabiy-yikal-lazhee arsalta» aur Rasool Allah salla Allahu alaihi wasallam ne farmaya ke jis shakhs ne yeh dua parhi aur phir is raat agar is ki wafat ho gayi to is ki wafat fitrat par ho gi. Quran Majeed mein jo «starhaboohum» ka lafz aaya hai yeh bhi «rahbah» se nikala hai ( «rahbah» ke maani dar ke hain) «malakoot» ka maani mulk yani sultanat jaise kehte hain ke «rahboot» , «rahmut» se behtar hai yani darana raham karne se behtar hai.

Hum se Ali bin Abdullah Madini ne bayan kiya, kaha hum se Abd-ul-Rahman bin Mahdi ne, in se Sufyan Sawri ne, in se Salama bin Kuhail ne, in se Kurayb ne aur in se Abdullah bin Abbas razi Allahu anhuma ne bayan kiya ke main Maymoonah (razi Allahu anha) ke yahan ek raat soya to Nabi Karim salla Allahu alaihi wasallam uthe aur Aap ne apni hawa-ij zaroorat poori karne ke baad apna chehra dhoya, phir donon hath dhoye aur phir so gaye is ke baad Aap khade ho gaye aur mashkeeza ke paas gaye aur Aap ne is ka munh khola phir darmiyana wuzu kiya (na mubalgha ke saath na mamooli aur halke qism ka, teen teen martaba se) kam dhoya. Albatta pani har jagah pahuncha diya. Phir Aap ne namaz parhi. Main bhi khada hua aur Aap ke peeche hi raha kyunke main isay pasand nahi karta thu ke Nabi Karim salla Allahu alaihi wasallam yeh samjhein ke main Aap ka intizar kar raha thu. Main ne bhi wuzu kar liya thu. Nabi Karim salla Allahu alaihi wasallam jab khade ho kar namaz parhne lage to main bhi Aap ke bayein taraf khada ho gaya. Aap ne mera kaan pakar kar dayein taraf kar diya, main ne Nabi Karim salla Allahu alaihi wasallam (ki iqteda mein) tera rakat namaz mukammal ki. Is ke baad Aap so gaye aur Aap ki saans mein aawaz paida hone lagi. Nabi Karim salla Allahu alaihi wasallam jab sote thay to Aap ki saans mein aawaz paida hone lagne lagi ku. Is ke baad Bilal razi Allahu anhu ne Aap ko namaz ki ittila di chunanche Aap ne (naya wuzu) kiye baghair namaz parhi. Nabi Karim salla Allahu alaihi wasallam apni dua mein yeh kehte thay «allaahummaj-al fee qalbee nooran wa fee basaree nooran wa fee sam-ee nooran wa an yameenee nooran wa an yasaaree nooran wa fauqee nooran wa tahtee nooran wa amaamee nooran wa khalfee nooran waj-al lee nooran» ”Ae Allah! Mere dil mein noor paida kar, meri nazar mein noor paida kar, mere kaan mein noor paida kar, mere dayein taraf noor paida kar, mere bayein taraf noor paida kar, mere oopar noor paida kar, mere neeche noor paida kar mere aage noor paida kar, mere peeche noor paida kar aur mujhe noor ata farma.“ Kurayb (rawi e hadees) ne bayan kiya ke mere paas mazeed saat lafz mahfooz hain. Phir main ne Abbas razi Allahu anhuma ke ek sahab-zade se mulaqat ki to unhon ne mujh se in ke mutalliq bayan kiya ke «asabee wa lahmee wa damee wa shari wa basharee wa zhakara khislataini» ”mere patthe, mera gosht, mera khoon, mere baal aur mera chamra in sab mein noor bhar de.“ aur do cheezon ka aur bhi zikr kiya.

Hum se Abdullah bin Muhammad Musandi ne bayan kiya, unhon ne kaha hum se Sufyan bin Uyaynah ne bayan kiya, unhon ne kaha main ne Sulayman bin Abi Muslim se suna, unhon ne Taoos se riwayat kiya aur unhon ne Ibn Abbas razi Allahu anhuma se ke Nabi Karim salla Allahu alaihi wasallam jab raat mein tahajjud ke liye khade hote to yeh dua karte «allaahumma lakal-hamdu anta noorus-samawaati wal-ardi wa man feehinna wa lakal-hamdu anta qay-yimus-samawaati wal-ardi wa man feehinna wa lakal-hamdu antal-haqqu wa wadukal-haqqu wa qaulukal-haqqu wa liqaa-ukal-haqqu wal-jannatu haqqun wan-naaru haqqun was-saa-atu haqqun wan-nabiy-yoona haqqun wa muhammadun haqqun allaahumma laka aslamtu wa alaika tawak-kaltu wa bika aamantu wa ilaika anabtu wa bika khaasamtu wa ilaika haakamtu fagh-fir lee maa qaddamtu wa maa akh-khartu wa maa asrartu wa maa a-lantu antal-muqaddimu wa antal-muakh-khiru laa ilaaha illaa anta» ”Ae Allah! Tere hi liye tamam tareefein hain tu aasman o zameen aur in mein maujood tamam cheezon ka noor hai, tere hi liye tamam tareefein hain tu aasman aur zameen aur in mein maujood tamam cheezon ka qaim rakhne wala hai aur tere hi liye tamam tareefein hain, tu haq hai, tera wada haq hai, tera qaul haq hai, tujh se milna haq hai, jannat haq hai, dozakh haq hai, Qayamat haq hai, ambiya haq hain aur Muhammad Rasool Allah salla Allahu alaihi wasallam haq hain. Ae Allah! Tere supard kiya, tujh par bharosa kiya, tujh par iman laya, teri taraf rujoo kiya, dushmanon ka muamla tere supard kiya, faisla tere supard kiya, pas meri agli pichhli khatayein maaf kar. Woh bhi jo main ne chhup kar ki hain aur woh bhi jo khul kar ki hain tu hi sab se pehle hai aur tu hi sab se baad mein hai, sirf tu hi mabood hai aur tere siwa koi mabood nahi.“

Hum se Sulayman bin Harb ne bayan kiya, kaha hum se Shubah bin Hajjaj ne bayan kiya, in se Hakam bin Uyaynah ne, in se Ibn Abi Layla ne, in se Ali razi Allahu anhu ne ke Fatima razi Allahu anha ne chakki peesne ki takleef ki wajah se ke in ke mubarak hath ko sadma pahunchta hai to Nabi Karim salla Allahu alaihi wasallam ki khidmat mein ek khadim maangne ke liye hazir huien. Nabi Karim salla Allahu alaihi wasallam ghar mein maujood nahi thay. Is liye unhon ne Aisha razi Allahu anha se zikr kiya. Jab Aap tashreef laaye to Aisha razi Allahu anha ne Aap se is ka zikr kiya. Ali razi Allahu anhu ne bayan kiya ke phir Nabi Karim salla Allahu alaihi wasallam hamare yahan tashreef laaye hum is waqt tak apne bistaron par lait chuke thay main khada hone laga to Aap salla Allahu alaihi wasallam ne farmaya ke kiya main tum donon ko woh cheez na bata doon jo tumhare liye khadim se bhi behtar ho. Jab tum apne bistar par jaane lago to taintis (33) martaba «allaahu akbar» kaho, taintis (33) martaba «sub-haanallaah» kaho aur taintis (33) martaba «al-hamdu lillaah» kaho, yeh tumhare liye khadim se behtar hai aur Shubah se riwayat hai in se Khalid ne, in se Ibn Sireen ne bayan kiya ke sub-haanallaah chountis (34) martaba kaho.

Hum se Abdullah bin Yusuf ne bayan kiya, unhon ne kaha hum se Layth bin Saad ne bayan kiya, unhon ne kaha ke mujh se Aqeel ne bayan kiya, in se Ibn Shihab ne bayan kiya, unhein Urwah ne khabar di aur unhein Umm al-Momineen Aisha razi Allahu anha ne ke jab Rasool Allah salla Allahu alaihi wasallam laytte to apne hathon par phoonkte aur mo-uzhaat parhte aur donon hath apne jism par pherte.

Hum se Ahmad bin Yunus ne bayan kiya, kaha hum se Zuhayr ne bayan kiya, kaha hum se Ubaidullah bin Umar ne bayan kiya, kaha mujh se Saeed bin Abi Saeed Muqbiri ne bayan kiya, in se un ke baap ne aur in se Abu Hurairah razi Allahu anhu ne bayan kiya ke Nabi Karim salla Allahu alaihi wasallam ne farmaya ”jab tum mein se koi shakhs bistar par laytte to pehle apna bistar apne izaar ke kinare se jhaarh le kyunke woh nahi jaanta ke is ki be-khabri mein kiya cheez is par aa gayi hai phir yeh dua parhe «bi-ismika rabbee wadatu jambee wa bika arfauhoo in amsakta nafsee far-ham-haa wa in arsaltahaa fah-fazh-haa bimaa tahfazhu bihis-saaliheena» ”mere paalne wale! Tere naam se main ne apna pehlu rakkha hai aur tere hi naam se uthaoon ga agar tu ne meri jaan ko rok liya to is par raham karna aur agar chhorr diya (zindagi baqi rakkhi) to is ki is tarah hifazat karna jis tarah tu saaliheen ki hifazat karta hai.“ is ki riwayat Abu Dhamra aur Ismail bin Zakariya ne Ubaidullah ke hawale se ki aur Yahya aur Bishr ne bayan kiya, in se Ubaidullah ne, in se Saeed ne, in se Abu Hurairah razi Allahu anhu ne aur in se Nabi Karim salla Allahu alaihi wasallam ne aur is ki riwayat Imam Malik aur Ibn Ajlan ne ki hai. In se Saeed ne, in se Abu Hurairah razi Allahu anhu ne Nabi Karim salla Allahu alaihi wasallam se is tarah riwayat ki hai.

Hum se Abdul Aziz bin Abdullah ne bayan kiya, kaha hum se Imam Malik ne bayan kiya, in se Ibn Shihab ne, in se Abu Abdullah al-Agharr aur Abu Salamah bin Abd-ur-Rahman ne aur in se Abu Hurairah razi Allahu anhu ne ke Rasool Allah salla Allahu alaihi wasallam ne farmaya ke hamara Rabb Tabaarak wa Ta-aala har raat aasman e duniya ki taraf nuzool farmata hai, is waqt jab raat ka aakhri tihayi hissa baqi reh jata hai aur farmata hai kaun hai jo mujh se dua karta hai ke main is ki dua qabool karoon, kaun hai jo mujh se maangta hai ke main usay doon, kaun hai jo mujh se bakhshish talab karta hai ke main is ki bakhshish karoon.