Hum se Qutaybah bin Saeed ne bayan kiya , unhon ne kaha hum se Hammad bin Zayd ne bayan kiya , in se Kaseer bin Shanteer ne bayan kiya , in se Ata bin Abi Rabah ne bayan kiya , in se Jabir bin Abdullah razi Allahu anhuma ne bayan kiya ke Rasool Allah salla Allahu alaihi wasallam ne farmaya ”(sote waqt) bartan dhak liya karo warna darwaze band kar liya karo aur chiragh bujha liya karo kyunke yeh chooha baaz auqat chiragh ki batti khainch leta hai aur ghar walon ko jala deta hai .“

Hum se Hassan bin Abi Abbad ne bayan kiya , unhon ne kaha hum se Humam bin Yahya ne bayan kiya , in se Ata bin Abi Rabah ne aur in se Jabir razi Allahu anhu ne bayan kiya ke Rasool Allah salla Allahu alaihi wasallam ne farmaya ”jab raat mein sone lago to chiragh bujha diya karo aur darwaze band kar liya karo aur mashkeezo ka munh baandh diya karo aur khane peene ki cheezin dhak diya karo .“ Hammad ne kaha ke mera khayal hai ke yeh bhi farmaya ke ”agarche ek lakri se hi ho .“

Hum se Yahya bin Qaza-a ne bayan kiya , unhon ne kaha hum se Ibrahim bin Saad ne bayan kiya , in se Ibn Shihab ne , in se Saeed bin al-Musayyab ne aur in se Abu Hurairah razi Allahu anhu ne bayan kiya ke Nabi Karim salla Allahu alaihi wasallam ne farmaya ”paanch cheezin fitrat se hain , khatna karna , zer e naaf ke baal banana , baghal ke baal saaf karna , moonchh chhoti karana aur nakhun kaatna .“

Hum se Abu al-Yaman ne bayan kiya , unhon ne kaha hum ko Shuayb bin Abi Hamza ne khabar di , unhon ne kaha hum se Abu al-Zinad ne bayan kiya , in se Aaraj ne bayan kiya aur in se Abu Hurairah razi Allahu anhu ne bayan kiya ke Rasool Allah salla Allahu alaihi wasallam ne farmaya ”Ibrahim alaihissalam ne assi (80) saal ki umr mein khatna karaya aur Aap ne «qadoom» (takhfeef ke saath) (kulhari) se khatna kiya .“ Hum se Qutaybah ne bayan kiya , kaha hum se Mugheera ne bayan kiya aur in se Abu al-Zinad ne «bil-qad-doomi» (tashdeed ke saath bayan kiya) .

Hum se Muhammad bin Abd-ur-Rahman ne bayan kiya , kaha hum ko Abbad bin Musa ne khabar di , kaha hum se Ismail bin Jafar ne bayan kiya , kaha hum se Israeel ne , in se Abu Ishaq ne , in se Saeed bin Jubayr ne ke Ibn Abbas razi Allahu anhuma se poochha gaya ke jab Nabi Karim salla Allahu alaihi wasallam ki wafat hui to Aap ki umr kya thi ? Kaha ke in dinon mera khatna ho chuka tha aur Arab logon ki aadat thi jab tak larka jawani ke qareeb na hota is ka khatna na karte thay .

Aur Abdullah ibn Idrees bin Yazid ne apne walid se bayan kiya , in se Abu Ishaq ne , in se Saeed bin Jubayr ne aur in se Ibn Abbas razi Allahu anhuma ne ke jab Nabi Karim salla Allahu alaihi wasallam ki wafat hui to mera khatna ho chuka tha .

Aur jis ne apne saathi se kaha ke aao jua khelein is ka kya hukm hai aur Allah Ta'ala ne Surah Luqman mein farmaya «wa minan-naasi may-yashtaree lahuwal-hadeesi li-yudil-la an sabilillaahi» ”baaz log aise hain jo Allah ki raah se behka dene ke liye khel kood ki baatein bol laite hain .“

Hum se Yahya bin Bukayr ne bayan kiya , kaha hum se Layth bin Saad ne bayan kiya , in se Aqeel ne , in se Ibn Shihab ne , kaha ke mujhe Humayd bin Abd-ur-Rahman ne bayan kiya aur in se Abu Hurairah razi Allahu anhu ne bayan kiya ke Rasool Allah salla Allahu alaihi wasallam ne farmaya ”tum mein se jis ne qasam khayi aur kaha ke Laat o Uzza ki qasam , to phir woh «la ilaha illallahu» kahe aur jis ne apne saathi se kaha ke aao jua khelein to usay sadqa kar dena chahiye .“

Abu Hurairah razi Allahu anhu ne Nabi Karim salla Allahu alaihi wasallam se riwayat kiya ke Qayamat ki nishaniyon mein se yeh bhi hai ke maweshi churane wale log kothiyon mein akarne lagein ge yani buland kothiyaan banwa kar fakhr karne lagein ge .

Hum se Abu Nuaym ne bayan kiya , kaha hum se Ishaq ne bayan kiya woh Saeed ke bete hain , in se Saeed ne aur in se Ibn Abbas razi Allahu anhuma ne bayan kiya ke Nabi Karim salla Allahu alaihi wasallam ke zamana mein apne hathon se ek ghar banaya taake baarish se hifazat rahe aur dhoop se saya haasil ho Allah ki makhlooq mein se kisi ne is kaam mein meri madad nahi ki . Maloom hua ke zaroorat ke laiq ghar banana durust hai .