Quran Majeed mein jo lafz «yoobiq-hunna» hai is ke maani un ko halak kar daale. «maubiqan» ke maani halakat.

Hum se Aasim bin Ali ne bayan kiya, unhon ne kaha hum se Ibn Abi Zib ne bayan kiya, in se Saeed ne bayan kiya, in se Abu Shuraih ne bayan kiya aur in se Nabi Karim salla Allahu alaihi wasallam ne bayan kiya ”wallah! Woh iman wala nahi. wallah! Woh iman wala nahi. wallah! Woh iman wala nahi.“ Arz kiya gaya kaun: ya Rasool اللہ? Farmaya woh jis ke shar se is ka parosi mahfooz na ho. Is hadees ko Shababa aur Asad bin Musa ne bhi riwayat kiya hai aur Humayd bin al-Aswad aur Usman bin Amr aur Abu Bakr bin Ay-yash aur Shuayb bin Ishaq ne is hadees ko Ibn Abi Zib se yun riwayat kiya hai, unhon ne Muqbiri se, unhon ne Abu Hurairah razi Allahu anhu se.

Hum se Abdullah bin Yusuf ne bayan kiya, kaha hum se Layth ne bayan kiya, kaha hum se Saeed ne bayan kiya woh Saeed Muqbiri hain, in se un ke walid ne aur in se Abu Hurairah razi Allahu anhu ne bayan kiya ke Nabi Karim salla Allahu alaihi wasallam farmaya karte thay ”Ae Musalman aurato! Tum mein se koi aurat apni kisi parosan ke liye kisi bhi cheez ko (hadiya mein) dene ke liye haqeer na samjhe khwah bakri ka paaya hi kyun na ho.“

Hum se Qutaybah bin Saeed ne bayan kiya, unhon ne kaha hum se Abu al-Ahwas ne bayan, in se Abu Haseen ne, in se Abu Salih ne aur in se Abu Hurairah razi Allahu anhu ne bayan kiya ke Rasool Allahsalla Allahu alaihi wasallam ne farmaya ”jo koi Allah aur aakhirat ke din par iman rakhta ho woh apne parosi ko takleef na pahunchaye aur jo koi Allah aur aakhirat ke din par iman rakhta ho woh apne mehman ki izzat kare aur jo koi Allah aur aakhirat ke din par iman rakhta ho woh achhi baat zaban se nikale warna khamosh rahe.“

Hum se Abdullah bin Yusuf ne bayan kiya, unhon ne kaha hum se Layth bin Saad ne bayan kiya, unhon ne kaha ke mujh se Saeed Muqbiri ne bayan kiya, in se Abu Shuraih Adawi razi Allahu anhu ne bayan kiya unhon ne kaha ke mere kaanon ne suna aur meri aankhon ne dekha jab Rasool Allahsalla Allahu alaihi wasallam guftagu farma rahe thay. Nabi Karim salla Allahu alaihi wasallam ne farmaya ke jo shakhs Allah aur aakhirat ke din par iman rakhta ho woh apne parosi ka ikram kare aur jo shakhs Allah aur aakhirat ke din par iman rakhta ho woh apne mehman ki dastoor ke muwafiq har tarah se izzat kare. Poochha: ya Rasool اللہ! Dastoor ke muwafiq kab tak hai. Farmaya ek din aur ek raat aur mezbani teen din ki hai aur jo is ke baad ho woh is ke liye sadqa hai aur jo Allah aur aakhirat ke din par iman rakhta ho woh behtar baat kahe ya khamosh rahe.

Hum se Hajjaj bin Minhal ne bayan kiya, kaha hum se Shubah ne bayan kiya, kaha ke mujhe Abu Imran ne khabar di, kaha ke main ne Talha se suna aur in se Aisha razi Allahu anha ne bayan kiya ke main ne arz kiya: ya Rasool اللہ! Meri parosnein hain (agar hadiya ek ho to) main in mein se kis ke paas hadiya bheijoon? Aap salla Allahu alaihi wasallam ne farmaya ”jis ka darwaza tum se (tumhare darwaze se) zyada qareeb ho.“

Hum se Ali bin Ay-yash ne bayan kiya, unhon ne kaha hum se Abu Ghassan ne bayan kiya, unhon ne kaha mujh se Muhammad bin al-Munkadir ne bayan kiya, in se Jabir bin Abdullah razi Allahu anhuma ne ke Nabi Karim salla Allahu alaihi wasallam ne farmaya ”har naik kaam sadqa hai.“

Hum se Adam ne bayan kiya, kaha hum se Shubah ne, in se Saeed bin Abi Burdah bin Abi Musa Ash'ari ne bayan kiya, in se un ke walid ne aur in se un ke dada (Abu Musa Ash'ari razi Allahu anhu) ne bayan kiya ke Nabi Karim salla Allahu alaihi wasallam ne farmaya ”har Musalman par sadqa karna zaroori hai.“ Sahabah ikraam razi Allahu anhum ne arz kiya agar koi cheez kisi ko (sadqa ke liye) jo mayassar na ho. Aap salla Allahu alaihi wasallam ne farmaya ke phir apne hath se kaam kare aur is se khud ko bhi faida pahunchaye aur sadqa bhi kare. Sahabah ikraam razi Allahu anhum ne arz ki agar is mein is ki taqat na ho ya kaha ke na kar sake. Nabi Karim salla Allahu alaihi wasallam ne farmaya ke phir kisi hajat-mand pareshan-haal ki madad kare. Sahabah ikraam razi Allahu anhum ne arz kiya agar woh yeh bhi na kar sake. Farmaya ke phir bhalayi ki taraf logon ko raghbat dilaye ya amr bil-maroof ka karna arz kiya aur agar yeh bhi na kar sake. Nabi Karim salla Allahu alaihi wasallam ne farmaya ke phir burayi se ruka rahe ke yeh bhi is ke liye sadqa hai.

Aur Abu Hurairah razi Allahu anhu ne bayan kiya ke Nabi Karim salla Allahu alaihi wasallam ne farmaya ”naik baat karne mein bhi sawab milta hai.“

Hum se Abu al-Waleed ne bayan kiya, kaha hum se Shubah ne, kaha ke mujhe Amr ne khabar di, unhein Khaisama ne aur in se Adi bin Hatim razi Allahu anhu ne bayan kiya ke Nabi Karim salla Allahu alaihi wasallam ne jahannum ka zikr kiya aur is se panah maangi aur chehre se earaz o nagowari ka izhar kiya. Phir Nabi Karim salla Allahu alaihi wasallam ne jahannum ka zikr kiya aur is se panah maangi aur chehre se earaz o nagowari ka izhar kiya, Shubah ne bayan kiya ke do martaba Nabi Karim salla Allahu alaihi wasallam ke jahannum se panah maangne ke silsile mein mujhe koi shak nahi hai. Phir Nabi Karim salla Allahu alaihi wasallam ne farmaya ke jahannum se bacho. Khwah aadhi khajoor hi (kisi ko) sadqa kar ke ho sake aur agar kisi ko yeh bhi mayassar na ho to achhi baat kar ke hi.