Hum se Muhammad bin Yusuf ne bayan kiya, kaha hum se Sufyan ne bayan kiya, in se Hisham ne, in se Urwah ne aur in se Aisha razi Allahu anha ne bayan kiya ke ek dehati Nabi Karim salla Allahu alaihi wasallam ki khidmat mein hazir hua aur kaha Aap log bachon ko bosa dete hain, hum to unhein bosa nahi dete. Nabi Karim salla Allahu alaihi wasallam ne farmaya ke agar Allah ne tumhare dil se raham nikaal diya hai to main kya kar sakta hoon.

Hum se Ibn Abi Maryam ne bayan kiya, kaha hum se Abu Ghassan ne, kaha ke mujh se Zayd bin Aslam ne, in se un ke walid ne aur in se Umar bin Khattab razi Allahu anhu ne bayan kiya ke Nabi Karim salla Allahu alaihi wasallam ke paas kuch qaidi aaye qaidiyon mein ek aurat thi jis ka pistan doodh se bhara hua tha aur woh dor rahi thi, itne mein ek bacha is ko qaidiyon mein mila us ne jhat apne pait se laga liya aur is ko doodh pilane lagi. Hamase Nabi Karim salla Allahu alaihi wasallam ne farmaya ke kya tum khayal kar sakte ho ke yeh aurat apne bache ko aag mein daal sakti hai hum ne arz kiya ke nahi jab tak is ko qudrat ho gi yeh apne bache ko aag mein nahi phenk sakti. Nabi Karim salla Allahu alaihi wasallam ne is par farmaya ke Allah apne bandon par is se bhi zyada raham karne wala hai jitna yeh aurat apne bacha par meherban ho sakti hai.

Hum se Hakam bin Nafi ne bayan kiya, kaha hum ko Shuayb ne khabar di, unhein Zuhri ne, kaha hum ko Saeed bin al-Musayyab ne khabar di ke Abu Hurairah razi Allahu anhu ne bayan kiya ke main ne Rasool Allah salla Allahu alaihi wasallam se suna, Nabi Karim salla Allahu alaihi wasallam ne farmaya ke Allah ne rahmat ke sau hisse banaye aur apne paas un mein se ninaanway hisse rakkhe sirf ek hissa zameen par utara aur isi ki wajah se tum dekhte ho ke makhlooq ek doosre par raham karti hai, yahan tak ke ghori bhi apne bacha ko apne sum nahi lagne deti balkay sumon ko utha laiti hai ke kahin is se is ke bacha ko takleef na pahunchye.

Hum se Muhammad bin Kaseer ne bayan kiya, kaha hum ko Sufyan Sawri ne khabar di, unhein Mansoor bin Mutamir ne, unhein Abu Wail ne, unhein Amr bin Sharhabeel ne aur in se Abdullah bin Masood razi Allahu anhu ne bayan kiya ke main ne kaha: ya Rasool Allah! Kaun sa gunah sab se bara hai. Farmaya yeh ke tum Allah Ta'ala ka kisi ko shareek banao haalan ke usi ne tumhein paida kiya hai. Unhon ne kaha phir, is ke baad farmaya yeh ke tum apne larke ko is khauf se qatl karo ke agar zinda raha to tumhari rozi mein shareek ho ga. Unhon ne kaha is ke baad, Nabi Karim salla Allahu alaihi wasallam ne farmaya yeh ke tum apne parosi ki biwi se zina karo. Chunanche Allah Ta'ala ne bhi Nabi Karim salla Allahu alaihi wasallam ke is irshad ki taeid mein yeh aayat «wal-lazheena laa yad-oona ma-allahi ilaahan aakhara» alkh, nazil ki ke ”aur woh log jo Allah ke siwa kisi doosre mabood ko nahi pukarte aur na woh nahaq kisi ko qatl karte hain aur na woh zina karte hain.“

Hum se Muhammad bin Musanna ne bayan kiya, kaha hum se Yahya bin Saeed ne bayan kiya, in se Hisham ne bayan kiya, kaha mujhko mere walid Urwah ne khabar di aur unhein Aisha razi Allahu anha ne ke Nabi Karim salla Allahu alaihi wasallam ne ek bacha (Abdullah bin Zubayr) ko apni goad mein bithlaya aur khajoor chaba kar is ke munh mein di, us ne Aap par peshab kar diya Aap ne pani mangwa kar is par baha diya.

Hum se Abdullah bin Muhammad Musandi ne bayan kiya, unhon ne kaha hum se Aarim Muhammad bin Fadl ne bayan kiya, kaha hum se Mutamir bin Sulayman ne bayan kiya, kaha ke in se un ke walid ne bayan kiya, kaha ke main ne Abu Tameema se suna, woh Abu Usman Nahdi se bayan karte thay aur Abu Usman Nahdi ne kaha ke in se Usamah bin Zayd razi Allahu anhuma ne bayan kiya ke Rasool Allah salla Allahu alaihi wasallam mujhe apni ek raan par bithate thay aur Hasan razi Allahu anhu ko doosri raan par bithlate thay. Phir donon ko milaate aur farmate, Ae Allah! In donon par raham kar ke main bhi in par raham karta hoon. Aur Ali bin Abdullah Madini ne bayan kiya ke hum se Yahya ne bayan kiya, kaha hum se Sulayman Taymi ne bayan kiya, in se Abu Usman Nahdi ne isi hadees ko bayan kiya. Sulayman Taymi ne kaha jab Abu Tameema ne yeh hadees mujh se bayan ki Abu Usman Nahdi se to mere dil mein shak paida hua. Main ne Abu Usman se bahut si ahadees suni hain par yeh hadees kyun nahi suni phir main ne apni ahadees ki kitab dekhi to is mein yeh hadees Abu Usman Nahdi se likhi hui ku.

Hum se Ubaid bin Ismail ne bayan kiya, kaha hum se Abu Usamah ne bayan kiya, in se Hisham bin Urwah ne, in se un ke walid Urwah ne aur in se Aisha razi Allahu anha ne bayan kiya ke mujhe kisi aurat par itna rashk nahi aata thu jitna Khadija razi Allahu anha par aata thu haalan ke woh Nabi Karim salla Allahu alaihi wasallam ki mujh se shadi se teen saal pehle wafat pa chuki thien. (Rashk ki wajah yeh thi) ke Nabi Karim salla Allahu alaihi wasallam ko main kasrat se in ka zikr karte sunti ku aur Nabi Karim salla Allahu alaihi wasallam ko in ke Rabb ne hukm diya thu ke Khadija ko jannat mein ek khol-dar motiyon ke ghar ki khush-khabri suna dein. Nabi Karim salla Allahu alaihi wasallam kabhi bakri zibah karte phir is mein se Khadija razi Allahu anha ki saheliyon ko hissa bheij-te thay.

Hum se Abdullah bin Abd-ul-Wahhab ne bayan kiya, kaha ke mujh se Abd-ul-Aziz bin Abi Hazim ne bayan kiya, kaha ke mujh se mere walid ne bayan kiya, kaha ke main ne Sahl bin Saad razi Allahu anhu se suna, in se Nabi Karim salla Allahu alaihi wasallam ne farmaya ke main aur yateem ki parwarish karne wala jannat mein is tarah hon ge aur Aap ne shahadat aur darmiyani ungliyon ke isharah se (qurb ko) bataya.

Hum se Ismail bin Abdullah ne bayan kiya, kaha ke mujh se Imam Malik ne bayan kiya, in se Safwan bin Sulaym tabi is hadees ko mursalan riwayat karte thay ke Nabi Karim salla Allahu alaihi wasallam ne farmaya ke bewaon aur miskeenon ke liye koshish karne wala Allah ke rasta mein jihad karne wale ki tarah hai ya is shakhs ki tarah hai jo din mein roze rakhta hai aur raat ko ibadat karta hai.

Hum se Ismail bin Abi Oways ne bayan kiya, kaha ke mujh se Imam Malik ne bayan kiya, in se Sawr bin Zayd Dili ne, in se Ibn Mutie ke mola Abu al-Ghais ne, in se Abu Hurairah razi Allahu anhu ne aur in se Nabi Karim salla Allahu alaihi wasallam ne isi tarah farmaya.